Ieremia

32 TE TUATUA i tae mai kia Ieremia no ko ia Iehova ra, i te mataiti okotai ngauru o Zedekia ariki no Iuda, i te ngauru ma varu o te mataiti o Nebukanesa ra:

2 Te akapini ua ra te nuku o te ariki o Babulonia ia Ierusalema i reira: te tapekaia ra te peroveta ra ko Ieremia ki roto i te paepae o te are tapeka anga ra, i roto i te are o te ariki o Iuda.

3 Kua tapekaia oki aia e te ariki o Iuda e Zedekia, na ko atura, Eaa oki koe i totou ei, e i na ko mai ei e, Te na ko mairā Iehova, I na, ka tuku atu au i teianei oire ki roto i te rima o te ariki o Babulonia, e rauka oki iaia;

4 Kare oki te ariki o Iuda ra ko Zedekia e ora i te rima o te Kaledea, e tuku tikaia ra aia ki te rima o te ariki o Babulonia, e tuatua atu aia kiaia, tona vaa ki tona vaa, e na tona mata e akara atu i tona atu mata;

5 E nana e arataki ia Zedekia ki Babulonia, e ei reira aia noo ei e kia atoroia atu e au ra, te tuatua mairā Iehova: tamaki ua atu kotou ki te Kaledea, kare rai kotou e manuia.

6 Kua tuatua mairā Ieremia, I tae maira te tuatua a Iehova kiaku nei, na ko maira,

7 I na, Hanameela, te tamaiti a Saluma, i to metua ra, te ka aere mai kia koe ra, e ka na ko mai e, E oko koe i te kainga noku i Anatota: i te ture oki i te oko akaou anga ra, e tau ïa ia koe kia oko ra.

8 Kua aere mairā Hanameela, te tamaiti na toku ra metua, kiaku nei, ta Iehova oki i tuatua maira, ki roto i te paepae o te are tapeka anga ra, e kua na ko maira kiaku, Teia taku tuatua kia koe, e oko koe i te kainga noku i Anatota, i te enua o Beniamina: taua tuanga ra oki, e te oko katoa, tei tau ïa ia koe; e oko koe noou uaorai: kite akera au e, na Iehova ïa tuatua.

9 Oko atura au i taua kainga ra i Anatota ia Hanameela, i te tamaiti a toku metua ra, e kua akaaite atura au i te moni, e okotai ngauru ma itu i te sekela ario.

10 Kua tata atura au ki roto i tetai tuatua, e kua akairoia iora, e akataka iora au i te aronga kite ei kite, e kua akaaite iora au i te moni ki roto i te aite tuatau.

11 Kua rave iora au i te tuatua oko ra, i tei akairoia ra, i tei tau i te ture, e te akonoanga, e tei kore i akairoia.

12 Kua tuku atura i taua tuatua oko ra kia Baruka, te tamaiti a Neria, te tamaiti a Maaseia, ki mua i te aroaro o Hanameela, i te tamaiti a toku metua ra, e ki mua katoa oki i te aroaro o te aronga i kite ra, tei tata i to ratou ingoa ki roto i te tuatua oko ra, ki mua katoa oki i te aroaro o te au ngati Iuda katoa ra, tei noo ki roto i te paepae o te are tapeka anga ra.

13 E kua ako atura au ia Baruka ki mua i to ratou mata, na ko atura,

14 Te na ko mairā Iehova Sabaota ra, te Atua no Iseraela; Ka rave na i nga tuatua i tataia nei, i teianei tuatua oko, tei akairoia; e teianei tuatua, tei kore i akairoia; ka tuku ei ki roto i tetai āriki karakaraea, kia vaio ngata e kia manganui ua atu te rā.

15 Te na ko maira oki a Iehova Sabaota ra, te Atua no Iseraela; E rauka akaou mairai te are, e te kainga, e te kainga vine, i teianei rai enua.

16 Pure atura au kia Iehova, i muri ake te tuatua oko i te tuku angaia e au kia Baruka, te tamaiti a Neria ra, e kua na ko atura,

17 Aue, e te Atu e! e Iehova! I na, naau te rangi nei i anga, e te enua, i te mana maata noou ra, e to rima i akatikaia ra; kare rava e mea rave ngata ia koe:

18 Ko tei akakite i te aroa ki te tangata e tausani ua atu, e ko tei tutaki i te ara a te au metua ra ki runga i te umauma o ta ratou au tamariki i muri ia ratou ra: ko te Atua Maata, ko tei Ririnui, ko Iehova Sabaota ra, ko tona ïa ingoa;

19 Ko tei maata kia tuatua ra, e te ravenga rau ra: ko tei puera ua to mata ki runga i te au aerenga katoa o te tamariki a te tangata nei: ei akautunga i te tangata katoa, kia tau marie i tona aerenga, kia tau i te ua o tana i rave ra:

20 Ko tei akakite i te au akairo e te ravenga taka ke i te enua ra i Aiphiti, e tae rava akenei ki teianei rā, e ia Iseraela nei, e te tangata katoa ra; e kua rauka ia koe te ingoa, mei tei teianei rā;

21 E kua arataki mai koe i to au tangata ia Iseraela mei te enua maira mei Aiphiti, ma te au akairo, e te ravenga taka ke, e ma te rima ririnui, e te rima akatikaia ra, e te rikarika maata;

22 E kua oronga i teianei enua no ratou, taau i taputou atu i to ratou au metua e e oronga no ratou, e enua taʼe a vai ua te u e te meli;

23 E kua tomo ratou ki roto, e kua noo ki reira; kare ra ratou i akarongo i to reo, kare oki i aaere i taau ra ture; i te au mea katoa taau i akaue ia ratou e rave, kare ïa ratou i rave: i tuku mai ei koe i teianei au kino katoa kia iri ki runga ia ratou.

24 I na, kua tae te ravenga tamaki ki te oire nei e rave, e kua tukuia te oire ki te rima o te Kaledea tei kaitamaki maira, i te koke, e te onge, e te maki-mate: e taau oki i karanga ra, kua tupu ïa; e i na, te kite ra oki koe.

25 E kua tuatua maira koe kiaku, e te Atu, e Iehova e; E oko koe i te kainga i te moni, e akataka oki i te kite ei kite; e kua orongaia te oire ki te rima o te Kaledea.

26 I reira te tuatua a Iehova i te tae anga mai kia Ieremia ra, na ko maira,

27 I na, ko au ko Iehova, te Atua no te tangata katoa nei; te vai ra ainei tetai mea rave ngata iaku ra?

28 E teianei, te na ko mairā Iehova, I na, e oronga ua i teianei oire ki te rima o te Kaledea, e ki te rima o te ariki o Babulonia, ko Nebukanesa ra, e rauka oki iaia:

29 E na te Kaledea, e tamaki mai ki teianei oire, e e aere mai, e taʼu oki i teianei oire ki te ai, e kia ka atu; e te au are katoa, tei taʼuia e ratou i te rakau kakara na Baala ki rungao ra, e kua riringi oki i te atinga inu na te au atua ke, ei akakoko mai iaku kia riri.

30 I rave ua ana oki te tamariki a Iseraela, e te tamariki a Iuda, i te mea kino anake ra ki mua iaku nei, mei to ratou ou anga mairai: ko te akakoko anake ra iaku kia riri, ta te tamariki a Iseraela i rave i to ratou rima, te tuatua mairā Iehova.

31 Toku riri, e toku riri otooto ra, ta teianei oire i akatupu io nei, mei te rā mairai i akatu ei ratou i te reira, e tae ua akenei ki teianei rā, kia akataka keia e au ra i mua i toku mata nei.

32 I te au kino katoa oki a te tamariki a Iseraela, e te tamariki a Iuda, ta ratou i rave, ei akakoko mai iaku kia riri; ratou, to ratou au ariki, to ratou ui mataiapo, to ratou kau taunga, e to ratou au peroveta ra, e te au tangata o Iuda, e tei noo i Ierusalema.

33 Kua ariu mai oki ratou i te tua iaku nei, kare te aro; e iaku oki i apii ia ratou, ma te tu popongi anga, e te apii anga atu, kare ra ratou i akarongo mai, ka āriki mai ei te ako.

34 E kua akatu mai ratou i to ratou mea viivii ki roto i te are i tapaia i toku nei ingoa, kia viivii atu te reira.

35 E kua akatu ratou i te au ngai teitei o Baala, i te o o te tamaiti a Hinoma, ei akatae anga atu i ta ratou au tamaroa e ta ratou au tamaine kia Moleka; i tei kore i akaueia e au, kare oki i o ki roto i toku nei ngakau; rave iora ratou i te reira mea viivii kia araia Iuda.

36 I teianei ra, te na ko maira te Atua o Iseraela, ko Iehova, i teianei oire, ta kotou e karanga nei e, Kua tukuia atu ki te rima o te ariki o Babulonia, i te koke, e te onge, e te maki-mate;

37 I na, e akaputuputu mai au i a ratou mei te au enua katoa mai i tuaruia atu ei ratou e au i te riri noku ra, e te riri otooto noku ra, e te riri maata ra; e arataki mai au ia ratou ki teianei ngai, e e akanoo au ia ratou ma te ora:

38 Ei tangata oki ratou noku, e ei Atua au no ratou:

39 E oronga atu au i te ngakau okotai no ratou, e te aerenga okotai, kia mataku mai ratou iaku i te au rā katoa, kia meitaki ratou, e ta ratou tamariki i muri ake ia ratou:

40 E e papau au i t koreromotu mutu kore ia ratou, e kare oki au e ariu ke ia ratou ra, kia takinga-meitaki ia ratou ra; e tuku oki au i te mataku iaku ki roto i to ratou ngakau, e kare oki ratou e akaruke mai iaku ra.

41 E e rekareka au ki runga ia ratou i te takinga-meitaki anga atu ia ratou, e tanu tikai au ia ratou ki teianei enua, ma oku ngakau katoa, e ma toku vaerua katoa.

42 Te na ko maira oki a Iehova, Mei iaku i apai mai i teianei kino maata katoa ki runga i teianei iti-tangata, e apai katoa mai oki au ki runga ia ratou i te au meitaki katoa taku i karanga ia ratou ra.

43 E okoia te au kainga i teianei enua, ta kotou i karanga na e, Kua tanea, kare e tangata, kare oki e puaka; kua tukuia atu ki te rima o te Kaledea.

44 E kainga rai ta te tangata nei e oko ki te moni, e te tuatua katoa i te tata angaia, e te akairo anga, e te akataka anga i te kite ei kite, i te enua o Beniamina, e i vaitata katoa uaorai i Ierusalema, e te au oire o Iuda, e te au oire i te maunga, e te au oire katoa i te ngai akaaka, e te au oire katoa i te pae i apatonga: e ruri ke oki au i to ratou tuikaa anga, te tuatua mairā Iehova.