Ezera

9 E OTI akera te reira, kua are maira te aronga mamaata kiaku nei, kua tuatua maira, Te au tangata o Iseraela, e te kau taunga, e te au ngati Levi, kare i akataka ke ia ratou i te au tangata o te pa enua nei, i te rave katoa anga i to ratou au mea viivii, i ta te ngati Kanaana, te ngati Heta, te Perizi, te ngati Iebusi, te ngati Amona, te ngati Moabi, to Aiphiti, e te ngati Amori.

2 Kua rave oki ratou i ta ratou au tamaine na ratou uaorai, e na ta ratou au tamariki: e kua iropu ua te uanga tapu ki te au tangata no taua pa enua nei; e te aronga mamaata e te aronga tutara tei maata ïa i taua ara nei.

3 E tei te akarongo anga atu au i te reira tuatua, kua aae au i toku kakau, e toku pona roroa, e kua uuti au i te rauru o toku mimiti, e toku kumikumi, e kua noo iora ma te poitirere.

4 Kua akaputuputuia maira kiaku te aronga ravarai ko tei rutetetete i te au tuatua a te Atua o Iseraela, no te ara a te aronga i apai keia ra; noo poitirere ua iora au e tae ua atura ki te apai anga i te atinga aiai ra.

5 E i te apai anga i te atinga aia ra, kua tu akera au i taua teiaa noku ra; kua ngae iora oki toku kakau ra, e toku pona roroa; kua tuku iora au i oku turi ki raro, kua oora akera i oku rima ki taku Atua kia Iehova,

6 E kua karanga atura, E taku Atua e, kua akama au e kua aringaringa oki, kia nānā ua atu au i toku mata kia koe, e taku Atua, kua pani io nei oki ta matou ara ki runga i to matou upoko, e kua tae taua ara maata na ratou nei ki runga i te au rangi.

7 Mei te au rā mairai o to matou ai metua ra e tae ua akenei ki teianei rā, kua maata rai ta matou ara; e no ta matou ara i tukuiaʼi matou, to matou au ariki, e to matou kau taunga, ki te rima o te au ariki no te pa enua nei, ki te koke, ki te tuikaa, e kia noniia, e te mata akama, mei tei teianei rā.

8 E teianei vaʼi iti poto ake, kua takinga-meitaki mai to matou Atua ko Iehova ia matou, i te vaoo ua anga mai i tetai toenga kia ora, i te oronga anga mai i tetai mouranga i tona nei ngai tapu; kua mārama to matou mata i to matou Atua, e kua oronga mai tetai manga aʼo no matou i to matou tapeka anga nei.

9 E aronga tuikaa oki matou; kare ra to matou Atua i akaruke mai ia matou nei i to matou tuikaa anga ra, kua akatupu ra aia i te aroa ia matou i mua i te au ariki no Peresia, kia oronga mai i tetai manga aʼo no matou nei, kia akatu i te are o to matou Atua, e kia meitaki akaou tona au ngai i pou, e kia oronga mai i te patu no matou i Iuda nei e Ierusalema.

10 E teianei, e to matou Atua, e akapeea atu oki matou i teianei? kua akaruke oki matou i taau akauenga,

11 I taau i akaue mai i to au tavini ra i te au peroveta, ka tuatua mai ei ra e, Te enua ta kotou e aere e noo nei, e enua viivii ïa, no te viivii o to te pa enua nei, e ta ratou au ravenga rikarika: kua ki rava oki te reira i ta ratou au ravenga viivii, mei tetai matamata e tae ua atu ki tetai matamata;

12 E tenana, auraka e orongaia ta kotou au tamaine ki ta ratou au tamaroa, auraka oki e rave i ta ratou au tamaine na ta kotou au tamaroa; auraka rava e kimiia te au no ratou, e te meitaki no ratou, e tuatau ua atu; kia maroiroi oki kotou, e kia kai kotou i te meitaki o te enua nei, ka vaoo ei ei ipukarea no ta kotou au tamariki e tuatau ua atu.

13 E teianei tei iri mai ki runga ia matou i ta matou nei au ravenga kino, e ta matou nei ara maata, ko koe oki, e to matou Atua, kua akaiti koe i ta matou utunga, kare e aite ki ta matou nei ara, e kua oronga mai oki koe i te ora mei teianei;

14 E tika ainei oki kia atikau akaou matou i taau au akauenga, ka akaaiteite ei i te tuatua i te aronga i rave i teianei au mea viivii? kare ainei koe e riri mai ia matou e pou takiri rava matou nei, e kia kore rava e toe te tangata kia ora?

15 E te Atua o Iseraela, e Iehova e, e tuatua-tika taau; te vai nei rai matou, kua ora, mei tei teianei rā: i na, teia matou tei mua i to aroaro ma ta matou au ara katoa, no te reira i kore ei matou nei e mou ki mua ia koe na.