Genese

32 KUA aere ua aturā Iakoba i tona tere i reira, e kua aravei maira te au angela a te Atua iaia ra.

2 E kite akerā Iakoba ia ratou, kua tuatua akera, Ko te nuku teia a te Atua: tapa iora aia i te ingoa o taua ngai ra ko Mahanaima.

3 I tono anā Iakoba i te karere na mua iaia, ki tona tuakana ra, kia Esau, ki te enua ra ki Seira, ko te enua ko Edoma ra.

4 E kua akaue atu aia ia ratou, karanga atura, E na ko atu ki taku rangatira ra kia Esau; Te na ko maira to tavini ra ko Iakoba, i tuitarere ua ana au ki o Labana ra, e i reira au e teia noaʼi:

5 E e puakatoro taku, e te asini, e te anana, e te tavini tane, e te tavini vaine; e kua tono oki au i te tangata e akakite kia koe, e taku rangatira e, kia kite aroaia mai au e koe na.

6 Kua oki maira nga karere ra kia Iakoba ra, na ko maira, Kua tae atura matou ki to tuakana ra kia Esau, e te aere maira oki aia, e te au tangata e a katoa anere, kia aravei mai ia koe nei.

7 Mataku roa akerā Iakoba, e kua tumatetenga: kua vee iora aia i te au tangata o tona tere, e te au anana, e te au puaka-toro, e te au kamela, e rua motuanga;

8 Kua tuatua akera oki aia, Kia aere mai a Esau ki tetai motuanga ra, e kia ta i te reira, e ora atu tetai motuanga ko tei toe ra.

9 Kua tuatua iorā Iakoba, E te Atua no toku metua ra no Aberahama, e te Atua no toku metua oki no Isaaka, e Iehova e, i tei tuatua mai kiaku e, E oki koe ki toou ra enua, e toou ra kopu-tangata, e naku e takinga-meitaki atu ia koe na:

10 E mea ngiti rava au nei i te au takinga-meitaki katoa, e te tuatua-mou katoa, taau i akatupu mai ki toou tavini nei; i na teianei Ioridana oki au ma toku tokotoko ra; e teianei, e rua katoa oku motuanga.

11 Teia taku tuatua, e akaora koe iaku nei, i te rima o toku tuakana, i te rima o Esau nei; te mataku nei oki au iaia, ko te aere mai aea aia e ta iaku, nga metua vaine nei, e nga tamariki katoa.

12 Kua tuatua mairai koe e, E takinga-meitaki atu rai au ia koe, e ka akariro au i toou na uanga mei te onetea i taatai, kare e tika kia tatau ra i te maata.

13 E noo ua iora aia i reira i taua po ra, kua rave iora aia i tei tae ua mai ki tona rima, ei taoonga rima nana ki tona tuakana ra kia Esau;

14 E rua anere puaka-nio ua, e rua ngauru puaka-nio toa, e rua anere mamoe ua, e rua ngauru mamoe toa,

15 E toru ngauru kamela tinana, ma ta ratou katoa ra au punua, e a ngauru puaka-toro ua, okotai ngauru puaka-toro, e rua ngauru asini ua, e okotai ngauru punua.

16 E kua tuku atura ki te rima o te au tavini nona ra, akataka atura i taua aronga anana ra; kua karanga atura ki taua au tavini nona ra, E aere kotou na mua iaku, e akataka ke rai te anana, kia atea tetai e tetai.

17 Kua akaue atura aia ki tei na mua ra, na ko atura, Kia aravei mai toku tuakana nei ko Esau ia koe ra, e kia na ko mai i te ui kia koe e, E tavini koe noai? e aere ki ea? naai teianei au puaka i mua ia koe na?

18 E karanga atu koe i reira, Na toou tavini ra na Iakoba; e apinga akau uaia teia naau, e taku rangatira e Esau e; e i na, tera ake aia tei muri ia matou.

19 Kua pera katoa oki aia i te akaue atu ki te rua, e te toru, e te aronga katoa i aru i taua au anana ra, i karanga atura ra e, E na ko kotou i te karanga atu kia Esau, kia aravei atu kotou aia.

20 E e karanga katoa atu e, I na, tera ake to tavini ko Iakoba tei muri mai ia matou. Kua tuatua akera oki aia, E akamaru ana au iaia i te apinga i te apai anga na mua, ka kite atu ei au i tona mata i muri ake; peneiake ko te kite mai aia iaku i reira.

21 Riro atura taua apinga ra na mua: kareka aia uaorai, noo iora i te puakapa i taua po ra.

22 Kua tu akera aia ki runga i taua po ra, kua arataki atura i nga vaine nana ra, e nga tavini vaine nana, e tana katoa ra au tamariki tino ngauru ma tai ra, e aere ki tetai pae i te kauvai ra ko Iaboka. Iakoba

23 Kua arataki atura aia ia ratou, kua tuku atura ki tetai pae i taua kauvai ra, e kua apai katoa oki i te au mea katoa nana ra.

24 Toe iorā Iakoba anake ra; e kua kukumi maira tetai tangata iaia e ao ua akera.

25 E kite akera aia e, kare aia i rauka iaia, kua moto iora aia i te ūā nona; ngaoi iora te ūā o Iakoba i tana kukumi anga iaia ra.

26 Kua tuatua maira aia, E tuku koe iaku, kua ao. Kua karanga atura aia, Kia kore koe e akameitaki mai iaku nei, kare au e tukuia koe.

27 Kua tuatua mairai aia kiaia, Koai toou ingoa? Kua karanga atura aia, Ko Iakoba.

28 Kua tuatua maira aia, Teia koe, kare e tuatuaia ia Iakoba, ia Iseraela ra: mei te ariki ra oki koe i te mana i te Atua ra, e te tangata nei, e kua upokotu.

29 Kua ui aturā Iakoba, e karanga atura, E akakite mai ana koe kiaku i toou ingoa. Kua tuatua maira aia, Eaa koe i ui mai ei i toku ingoa? kua akameitaki maira aia iaia i reira.

30 Tapa iorā Iakoba i te ingoa o taua ngai ra ko Peniela: kua akara oki au i te Atua i tona mata e toku mata, e te ora ua nei rai au.

31 E iaia oki i aere na Peniela, kua iti maira te rā iaia, e akaea iora aia i te ūā nona ra.

32 I kore ei te tamariki a Iseraela i kai i te uaua maata i raro ake i te ūā, e tae rava akenei ki teianei rā: no te mea i motoia te ūā o Iakoba i te uaua maata ra.