Genese

33 KUA nānā akerā Iakoba i tona mata ki runga, e akara atura, e i na, te aere mairā Esau, e te tangata oki e a katoa anere. Kua akamavete iora aia i te au tamariki ra, i ta Lea, e ta Rahela, e ta nga vaine tavini ra.

2 Kua tuku atura aia i nga vaine tavini, e a raua puke tamariki, ki mua, e muri ake ko Lea ïa, e ana puke tamariki, e muri roa ake ko Rahela ïa raua ko Iosepha.

3 Kua aere atura aia na mua ia ratou, kua tupou iora aia ki raro i te one, e itu akera tupou anga, e vaitata rava akera aia ki tona tuakana.

4 Kua oro mairā Esau e aravei iaia, takave maira iaia i runga i tona kaki, e kua ongi maira iaia: aue iora raua ravarai.

5 Kua nānā akera tona mata ki runga, kite maira i nga vaine, e te au tamariki; e kua tuatua maira, Koai teianei aronga e aru ia koe nei? Kua karanga atura aia, Ko te au tamariki ïa ta te Atua i oronga mai na toou tavini nei.

6 Kua aaere maira nga vaine tavini, e a raua puke tamariki, i vaitata, kua tupou iora ki raro.

7 Kua aere katoa maira oki a Lea, e ana puke tamariki, i vaitata, e kua tupou iora ki raro: e muri akera, kua aere mairā Iosepha raua ko Rahela i vaitata, e kua tupou iora ki raro.

8 Kua tuatua maira aia, Eaa naau te motuanga ravarai taku i aravei i ko nei? Kua karanga atura aia, Kia kite aroaia mai au e koe, e taku rangatira.

9 Kua tuatua mairā Esau, E apinga maata taku, e taku teina; e mou koe i taau ra naau uaorai.

10 Kua karanga aturā Iakoba, Eiaa, teia taku tuatua kia koe, kua kite aroaia mai au e koe ra, e āriki mai koe i taku nei atinga i toku rima nei; i tae mai ei au ki mua i toou aroaro nei, mei te mea e, i aere mai ki mua i te aroaro o te Atua ra, e kua kite mai koe iaku.

11 E tenana, ka rave mai koe i taku nei atinga i apaiia mai kia koe nei; no te mea, kua takinga-meitaki mai te Atua iaku nei, e no te mea, kua maata taku apinga. Manono atura aia, e kua rave iora aia.

12 Kua tuatua mairā Esau, Taki aere tatou, e na mua au ia koe.

13 Kua karanga atura aia kiaia, Kua kite oki koe, e taku rangatira e, e mea apikepike te tamariki, e e mamoe tinana, e te puaka-toro teia; e kia rapurapu ua i te taki, e rā okotai ua, ka mate ïa taua anana ravarai nei.

14 Ka aere koe, e taku rangatira, na mua i toou tavini nei; e naku teia e taki marie atu i te taki e tau ki te au puaka e na mua iaku nei, e te au tamariki nei, e tae ua atu ki Seira kia koe na, e taku rangatira e.

15 Kua tuatua mairā Esau, E vaio mari au i tetai papaki tangata oku i ko nei ia koe nei. Kua karanga atura aia, Eaa ïa te reira? ko au, kia kite aroaia mai au e koe, e taku rangatira e.

16 Kua oki aturā Esau i tona tere ki Seira i taua rā ra.

17 Aere aturā Iakoba ki Sukota, e akatu iora i te are nona, e kua anga i te au pekau are no tana au puaka: i tapaiaʼi te ingoa o taua ngai ra ia Sukota.

18 Tae ora mairā Iakoba ki te oire ra ki Sekema, i te enua ra i Kanaana, ka aere mai ei aia mei Padana-arama maira; e kua patia iora aia i tona puakapa i mua ake i taua oire ra.

19 E kua oko iora aia i tetai pae kainga, i taua patia anga puakapa nona ra, i te tamariki a Hamora, te metua no Sekema ra, i te au moni okotai anere ra.

20 E kua akatu aia i tetai atarau i reira, e kua tapa iora aia i te reira ia Eli-Eloe-Iseraela.