Exodo

36 KUA rave iorā Bezaleela, e ko Aholiaba, e te au tangata katoa i karape te ngakau, i ta Iehova i tuku i te pakari ki roto ra, e te kite ra e kite ei i te rave i te angaanga katoa no te ngai-tapu ra, i te au mea katoa ta Iehova i akaue maira.

2 Na Mose oki i tuatua kia Bezaleela e kia Aholiaba, e te au tangata ravarai i karape te ngakau, i ta Iehova i tuku i te pakari ki roto ra, e te aronga katoa i tae te ngakau e aere mai e rave i taua angaanga ra:

3 E kua tiki maira ratou mei mua i te aroaro o Mose i taua atinga katoa ra, ta te tamariki a Iseraela i apai mai no taua angaanga ra, no te ngai-tapu kia rave ra. E kua apai ua maira ratou i te apinga i tera popongi, i tera popongi.

4 E taua au tangata pakari katoa, tei rave i te au angaanga katoa o te ngai-tapu ra, kua aere anake maira te tangata ravarai, ei te angaanga mai tana i rave ra;

5 E kua tuatua maira ratou kia Mose, na ko maira, E apinga maata rava atura ta te au tangata i apai mai nei, no te angaanga ta Iehova i akaue maira e rave, e toe ïa.

6 E kua akaue iorā Mose, e tutu aereia atura e pini ua ake te puakapa, i na koia e, Otira ua te au tane e te au vaine katoa i te rave i te atinga no te ngai tapu ra. Kore akera te au tangata i apai akaou mai.

7 E apinga maata oki tei rauka, e ope roa te au angaanga katoa i te oti, e e toe rai.

8 E taua au tangata ngakau karape katoa ra i tei rave i te angaanga puakapa ra, kua anga iora ratou i te tapoki orongā i taviriia ra okotai ngauru, e te kerekere, e te purapura, e te muramura; ma te kerubi e angaanga na te taunga karape i te rave angaia.

9 Okotai takau ma varu kubiti te roa o te tapoki okotai, e a oki kubiti te pararauare o te tapoki okotai; okotai rai tu aite o taua au tapoki ravarai.

10 Ko e rima tapoki i tupaupauia ïa e ia; e ko e rima oki tapoki i tupaupauia ïa e ia.

11 E kua anga iora aia i te tātai kerekere i te tapa o tetai tapoki ra, i te tapa ki vao i te tupaupauanga ra; i akapera katoa aia i te anga i te tapa ki vao i tetai tapoki ra, ei tupaupau anga atu ki tetai.

12 E rima ngauru ana tātai i anga i te tapa o tetai tapoki, e rima ngauru oki ana tātai i anga i te tapa o tetai tapoki, ko te tupaupauia ki tetai ra; ko te tātai i piri ei tetai tapoki ki tetai.

13 Anga iora oki aia i te tapeka auro e rima ngauru, e kua topiri iora i taua au tapoki ra tetai ki tetai ki taua au tapeka ra: riro atura ei puakapa okotai.

14 Anga iora oki aia i te au tapoki uru puakanio ei are ki rungao i te puakapa ra; okotai ngauru tapoki i angaia e ia e tai ara.

15 E toru ngauru kubiti i te tapoki okotai i te roa, e a oki kubiti te pararauare i te tapoki okotai: okotai rai tu aite i taua au tapoki ra okotai ngauru ma tai ra.

16 E topiri iora aia i nga tapoki e rima ra, e taka atura ïa, e nga tapoki oki e ono ra, e taka ke atura te reira.

17 E anga iora aia i te tātai e rima ngauru i te tapa i vao i taua tapoki ra i te topiri anga, e kua anga katoa aia i te tātai e rima ngauru i te tapa o tetai tapoki kia topiriia atu ki tetai.

18 E kua anga oki aia i te tapeka veo e rima ngauru ei topiri i taua are ra, kia riro ei okotai.

19 Anga iora oki aia i te tapoki kiri mamoe rapakau muramuraia no taua Are ra, e tetai tapoki kiri tutu ki rungao.

20 Tarai iora oki aia i te tapaanga rakau no te puakapa, i te rakau ra e sitima, e akatu ua ki runga:

21 Okotai ngauru kubiti i te roa i te tapaanga rakau okotai, okotai oki kubiti e afa kubiti i te pararauare i te tapaanga rakau okotai.

22 E rua auri i te tapaanga rakau okotai, kia aite tikai te tu tetai e tetai; i akapera aia i te rave i taua au tapaanga rakau ravarai no te puakapa ra.

23 Okotai takau ana tapaanga rakau i tarai no te puakapa, i te pae i apatonga:

24 E anga iora oki aia i te turanga ario e a ngauru no raro ake i nga tapaanga rakau okotai takau ra; e rua turanga to te tapaanga okotai no nga auri e rua ra, e rua oki turanga to te tapaanga okotai no nga auri e rua ra.

25 E anga iora oki aia i te tapaanga rakau okotai takau, no tetai pae puakapa i te pae i apatokerau ra,

26 E te turanga ario oki e rua takau; e rua turanga ki raro ake i te tapaanga okotai, e rua oki turanga i raro ake i tetai tapaanga rakau.

27 Tarai iora oki aia i nga tapaanga rakau e ono, no tetai pae puakapa, i te pae i te opunga o te rā ra.

28 E kua tarai iora aia i e rua tapaanga rakau no nga poo puakapa i tetai pae e tetai pae.

29 E i tamouia te reira ki raro, e ki runga katoa, i te mouranga okotai: okotai rai tu i aua nga tapaanga rakau ra i te anga anga no nga poo e rua ra.

30 E varu oki tapaanga rakau; okotai ngauru ma ono oki turanga, e turanga ario, taki rua turanga i raro ake i te tapaanga rakau okotai e pini ua ake.

31 Tarai iora oki aia i te tea sitima; ko e rima ra no te au tapaanga rakau i tetai pae puakapa,

32 E ko e rima oki tea no te au tapaanga rakau i tetai pae puakapa, e ko e rima oki tea no te au tapaanga rakau i te puakapa i te pae i te opunga o te rā ra.

33 E i apai roaia e ia tei rotopu ra tea na runga i te au tapaanga rakau, e tae roa atura ki tetai openga e tetai openga ei tamou anga.

34 E kua vaî oki aia i te au tapaanga rakau ki te auro, e auro oki te au tātai tana i anga ei momonoanga no te au tea ra, e kua vaî katoa oki aia i te au tea ki te auro.

35 E anga iora oki aia i te paruru, te kerekere, e te purapura, e te muramura, e te orongā i taviriia; ma te kerubi e angaanga na te taunga karape i te rave angaia ra.

36 Tarai iora aia i nga pou sitima e a no taua paruru ra, e vaî iora ki te auro; e e auro katoa oki te tapeka; e kua akato iora aia i nga turanga ario e a no aua nga pou ra.

37 E anga katoa iora aia i te paruru kakau kerekere, e te purapura, e te muramura, e te orongā i taviriia, te angaanga akamanea na te tui, no te ngutupa Are ra;

38 E to reira oki nga pou e rima e nga tapeka oki; e kua vaî aia i nga mimiti, e nga tatua, ki te auro: kareka nga turanga e rima ra, e veo ïa.