Isaia

47 KA EKE mai, ka noo ki raro i te one-pueu, e te tamaine paretenia o Babulonia; e noo ki raro i te one, auraka ei terono, e te tamaine o te Kaledea: kare atura koe e tuatuaia i te aneane e te piritumarae.

2 Ka rave i te taviri, ka taviri i te sitona: ka kiriti i te vaî o te makave rauru, ka tataki ana i to kakau ki runga; vaoo ua nga vaevae; e na raro i te vai te aere.

3 Ka eeuia koe kia vai taaka ua, e kitea toou akama: ko au uaorai te tutaki atu, e kare rava au e akaperepere i te tangata.

4 Ko to tatou Akaora, ko Iehova Sabaota tona ingoa, Tei Tapu i Iseraela nei.

5 E noo muteki ua; e aere koe ki roto i te poiri, e te tamaine o te Kaledea: kare oki koe e tuatua akaouia e, Ko te ariki vaine o te au basileia ra.

6 I riri ana au ki toku ra iti-tangata; kua viivii atura taku ra tuanga iaku, e kua tuku atura au ia ratou ki to rima: kare roa ratou i aroaia mai e koe; kua akateiaa tukituki ra koe i taau zugo ki runga i te ruaine ra.

7 E kua na ko akera koe, E vai ariki vaine ua au nei e tuatau ua atu: kare to ngakau i maara meitaki i te reira ra; kare koe i manako i to reira openga ra.

8 E tenana, e akarongo maira i teia, e tei akarekareka ua ra, ko tei noo vareaau ua; ko tei tuatua i roto i to ngakau na e, Ko au nei, e kare atu mari ra ko au; kare au e noo vaine takaua, kare au e kite i te tamariki i te ngaro ke anga:

9 E rokoia maira koe i eianei puke mea e rua, mei te kamoanga mata nei, i te rā okotai nei, te au tamariki i te ngaro ke anga, e te noo vaine takaua anga; e rokoia uaia mai koe kare e raveraveaia; maata oti taau au peu purepure, e rai ua rai oki taau au ravenga tauraatua.

10 Kua irinaki ra koe ki taau tuatua kino: kua na ko oki koe, Kare au i kitea mai. Kua tareva ke ïa koe i to pakari, e toou ra kite; i tuatuaʼi koe ki roto i to ngakau ra, Ko au nei ïa, e kare atu ko au anake nei rai.

11 E tenana, e rokoia mai koe e te kino; kare koe e kite i te peke anga atu: e rokoia mai oki koe e te mea manamanata; kare rava e matara ia koe: e rokoia vaveia mai oki koe e te pou maata, kare ra koe e kite.

12 Ka tamou ana i to au tauraatua, e te akamaata katoa anga o to au peu purepure, taau i tauta ana mei to tamariki anga mairai: peneiake ko te puapingaia taau; peneiake ko te maroiroi koe.

13 Kua roiroi koe i te maata anga o taau tuatua: ko tei akara i te au rangi ra, tei akara matariki i te au etu ra, ko tei akakite atea mai i te au marama ou nei, kia tu maira ratou i tenana e akaora ia koe, i te au mea i rokoia mai ei koe ra.

14 I na, e tu a teita ua ratou; e ka ratou i te ai; kare ratou e ora ia ratou uaorai i te ririnui o te ai mura ra: kare ïa e ngarau ei murumuru; kare roa e manga ai kia noo ki vaitatao.

15 Ko te tu ïa o teianei aronga ia koe, i taau i rave katoa i te angaanga ra; i taau i kapiti i te oko anga mei to ou anga mairai. Ka aere anake ra ratou ki tona ngai, ki tona ngai; kare rava tetai e akaora ia koe.