Salamo
78 E AKARONGO mai, e toku au tangata, i taku ra ture: e ariu mai i to kotou taringa ki te tuatua a toku vaa.
2 Ka tuatua toku vaa i te maseli: ka akakite au i te tuatua pikipiki taito ra.
3 Ko ta tatou i akarongo e kua kitea, e kua akakite mai to tatou ai metua kia tatou:
4 Kare te reira e uunaia e tatou i ta ratou au tamariki, ka akakite ra tatou ki tetai uki atu, i te akameitaki anga ia Iehova, e tona mana, e te angaanga taka ke i raveia e ia ra.
5 Kua tuku mai aia i te tuatua-akakite na Iakoba, e kua akono i te ture na Iseraela, tana i akaue mai i to tatou ai metua, kia akakite atu ratou ki ta ratou ra au tamariki:
6 Kia kite te uki i paʼu atu; te au tamariki e anau mai; kia tu ki runga, e kia akakite atu ratou ki ta ratou ra au tamariki:
7 Kia akariro ratou i te Atua ei irinaki anga no ratou, auraka e akangaropoina i ta te Atua ra au angaanga, e akono ra ratou i tana ra au akauenga:
8 E auraka ratou kia aite ki to ratou ra ai metua, ei uki māroketaketa e te meameaau; e uki kare i akonokono i to ratou ngakau, e kare to ratou vaerua i tika tikai i te Atua.
9 Te au tamariki a Epheraima, e aronga toa e ana te taoonga ra, ko tei iki maira te tua i te rā tamaki ra,
10 Kare ïa i akono i te koreromotu a te Atua, kare akera i tika ia ratou kia aaere i tana ra ture:
11 Akapoina atura ratou i tana ra au angaanga, e te au angaanga taka ke tana i akakite kia ratou:
12 Te au mea taka ke i raveia e ia ki mua i te aroaro o to ratou ai metua, i te enua ra i Aiphiti, i te tapere ra i Zoana:
13 Kua vaʼi aia i te tai kia tae ratou kia aere; e kua akaututua aia i te vai, vaoo atura kia auau.
14 I te ao ra, kua arataki aia ia ratou i te tumurangi ra, e te po ra e ao ua ake, i te mārama ai ïa.
15 Kua akangaangaa aia i nga mato i te medebara, e kua akainu maira ki te vai mei te moana maata ra.
16 Kua akataʼe mai aia i te vai peka no roto i te mato ra, e kua taʼe maira te vai mei te au kauvai ra.
17 Kua tamou rai ratou i te rave i te ara iaia, i te akariri anga atu i Tei Teitei i te medebara ra.
18 Kua akakoko ratou i te Atua i to ratou ngakau, i te pati anga i te kai ta ratou i kaki ra.
19 Kua tuatua kino oki ratou i te Atua, kua na ko akera, E tika aina i te Atua kia akanoonoo mai i te kaingakai i te medebara nei?
20 Ta ua mairai aia i te mato, e kua maringi ua maira te vai, e kua taʼe maira mei te au vai peka ra, e tika katoa aina iaia kia oronga mai i te kai? e rauka ainei iaia te kinaki na tona au tangata nei?
21 Kite akerā Iehova i te reira, kua riri iora; ka akera te ai ia Iakoba, tupu akera oki te riri ia Iseraela;
22 No te mea, kare ratou i akarongo i te Atua, kare oki i irinaki i te ora nana.
23 Kua akaueia ra e ia te au tumurangi i runga ra, e kua kiritia e ia te au ngutupa o te rangi ra;
24 E kua akatopa ua maira i te māna ki runga ia ratou ei kai; e te kai no te au rangi ra tei orongaia mai e ia na ratou:
25 Kua kai te tangata katoa i te kai a te aronga mana; kua tuku maira aia i te kai na ratou e kia merengo tikai.
26 Kua akaarara maira aia i te maoake mei te rangi mai; e na tona ririnui i akaarara mai i te marangai:
27 Kua akatopa maira i te kinaki ki runga ia ratou mei te one-pueu ra, e te manu peau mei te one taatai ra.
28 Kua akatopa maira aia i te reira i rotopu i to ratou puakapa, e pini rava ake to ratou ra nooanga.
29 Kua kai iora ratou e pangia rava akera: kua apai mai oki aia i ta ratou i kaki ra.
30 Kare ratou i tāpu i to ratou kaki: e te vai ua ra ta ratou kai i to ratou vaa,
31 I rokoia mai ei ratou e te riri o te Atua; mate iora te aronga matu o ratou ra iaia, e taia iora te tangata memeitaki o Iseraela.
32 Oti akera taua au mea katoa ra, kua ara akaou iora ratou, e kare i akarongo i te au angaanga taka ke nana ra.
33 I akapou ei aia i to ratou au rā i te puapinga kore, e to ratou au mataiti i te tumatetenga.
34 Kia ta aia ia ratou ra, kua kimi iora ratou iaia i reira: e kua anga tika mai e kua uiui ki te Atua.
35 Kua manako akera ratou e, ko te Atua to ratou mato; e ko te Atua ko Tei Teitei ra, to ratou ïa Ora.
36 Kua koperepere ua ra to ratou vaa iaia, e kua pikikaa iaia to ratou arero:
37 Kare oki to ratou ngakau i tau meitaki iaia, kare oki ratou i akono tikai i tana koreromotu.
38 Koia ra, no te ki i te aroa, kua tapoki akera i ta ratou ara, kare akera i tamate ia ratou; kua akaoki putuputu ra aia i te riri nona ra, kare oki tona riri i akaope takiriia:
39 Kua manako oki aia ia ratou e e tangata: e aʼo e peke ua ra, e kare e oki mai.
40 Te putuputu o ta ratou meameaau anga atu iaia i te medebara e! ta ratou akaongoongo anga atu iaia i te ngai motutaa e!
41 Koia ïa, kua na rungao na rungao ratou i te akakoko i te Atua, e kua akaongoongo atu i Tei Tapu i Iseraela nei.
42 Kare ratou i manako i tona rima, e te rā i akaoraʼi aia ia ratou i te enemi:
43 Te au akairo tana i rave i Aiphiti; e te au angaanga taka ke nana i te enua ra i Zoana:
44 I te akariro anga i ta ratou au vai ei toto, e ta ratou au vai peka ra, kare atura e tika kia inu.
45 Kua tuku atura i te rango i rotopu ia ratou, e pou iora; e te rana, e mate atura ratou.
46 Kua oronga oki aia i ta ratou kai na te anue; e ta ratou i angaanga ra na te tāpaki.
47 Kua tamate iora aia i ta ratou au vine i te ua toka, e ta ratou au sukamino i te anu.
48 Kua oronga aia i ta ratou au puaka ki te ua toka, e ta ratou au anana ki te uira.
49 Kua uri ua maira i tona riri maata ki runga ia ratou, te riri maata, e te makitakita, e te tumatetenga, i te tono anga mai i te au angela kikino ra.
50 Kua akamaka aia i te ara no tona riri, kua tuku ua atu aia ia ratou uaorai no te mate, kua oronga ua atu aia ia ratou no te makimate ra.
51 Kua ta aia i te au tama mua ravarai no Aiphiti, te muatangana o to ratou ririnui i te au puakapa o Hama ra.
52 Kua arataki ra aia i tona uaorai tangata mei te mamoe ra, e kua tiaki aia ia ratou mei te anana i te medebara ra.
53 Kua arataki aia ia ratou ma te ora, e kare ratou i mataku: kua pou oki to ratou au enemi i te apukuia e te tai ra.
54 Kua arataki aia ratou ki te pae o tona ra ngai-tapu, ki teianei maunga i rauka i tona rima katau.
55 Kua tuaru aia i te au etene ki mua ia ratou, e kua akaaite i te tuanga na ratou ki te taura, e kua akanoo i te au kopu o Iseraela i to ratou ra puakapa.
56 Kua akakoko ra ratou e kua akariri i te Atua, i Tei Teitei ra, e kare i akono i tana ra tuatua-akakite.
57 Kua akatitima rai ratou, e kua pikikaa, mei to ratou ai metua ra; kua oki akaou i te tu taito ra mei te ana i tāraia te ao ra.
58 Kua akariri ratou iaia i to ratou au ngai teitei ra, e kua akavareae atura iaia i to ratou au idolo kotikotiia.
59 Kia akarongo te Atua i te reira, kua riri iora, e kua akaviivii roa ia Iseraela.
60 E kua akaruke iora aia i te puakapa i Silo ra, i te Are tana i noo i roto i te tangata nei.
61 Kua tuku atura aia i te aruna o tona maroiroi ei tuikaa, e tona kakā ki te rima o te enemi.
62 Kua tuku atu oki aia i tona uaorai au tangata no te koke; riri akera oki aia i tana uaorai tuanga.
63 Pou iora to ratou au tangata ou i te ai, e kare ta ratou au tamaine i akaipoipoia ra.
64 Kua inga ta ratou au taunga i te koke, e kare ta ratou au vaine takaua i aue.
65 E roa poto akera, kua ara maira te Atu mei te ara moe ra, mei te tangata ririnui i maeva i te wina ra.
66 E kua ta iora i tona au enemi i muri ra: kua tuku atura te akakino mutu kore kia ratou.
67 Kua akaruke oki aia i te puakapa o Iosepha; e kare oki i iki i te kopu o Epheraima:
68 I iki akera ra i te kopu o Iuda, te maunga ra ko Ziona tana i inangaro ra.
69 Kua patu iora aia i tona ngai-tapu ra mei te are teitei ra, mei te enua tana i akatinamou e tuatau ua atu.
70 I iki akera aia i tona tavini ia Davida, tana i rave mai mei te koro mamoe ra;
71 Kua arataki maira aia iaia mei te aru anga i te au mamoe i akangote i te u ra, kia angai aia i tona tangata ia Iakoba, e ia Iseraela tana ra tuanga.
72 Kua angai aia ia ratou ma te ngakau apa kore, e kua arataki aia ia ratou i te karape o tona rima.