Ieremia

3 TE TUATUA nei, Kia kopae atu tetai tane i tana vaine, e kia aere ke aia iaia, e riro atura na tetai tane ke, e oki akaou mai aina aia kiaia? kare ainei e viivii rava te reira enua? kua akaturi aere ra koe ki te au tane e manganui, e oki akaou maira koe kiaku nei, te tuatua mairā Iehova.

2 Ka nānā ana i to mata i te au ngai teitei, ka akara i te ngai i kore ei koe i moeiaʼi. I tapapa ua ana koe ia ratou i te au arataa, mei te Arabia i te medebara ra; kua viivii rava te enua i to akaturi, e to kino.

3 I kore ei oki te ua i paria mai, e kare rai te ua openga; e tei ia koe te rae o te vaine akaturi ra, e mea tau kore ia koe te akama.

4 Kare ainei koe mei ko nei atu e kapiki mai kiaku e, E taku metua, ko koe te tiaki i toku ou anga ra?

5 Ka akamouriri ainei aia e tuatau ua atu? e tamouia ainei e kare e mutu? i na, kua tuatua oki koe, e kua rave i te kino i tika ia koe kia rave ra.

6 Kua tuatua mairai oki a Iehova iaku i te au rā o te ariki ra o Iosia, Kua kite ainei koe i ta Iseraela akatitima i rave? Kua aere akenei aia ki runga i te au maunga teitei katoa ra, e ki raro i te au rakau ruperupe ravarai, e kua akaturi ki reira.

7 E kia ope teia au mea katoa nei i te raveia e ia, karanga atura au e, Ka oki mai na koe kiaku nei! Kare ra aia i oki mai. E kua kite oki tona tuakana pikikaa ra ko Iuda.

8 E kite akera au, no te māro o Iseraela akatitima i te akaturi i kopae atu ei au iaia, e i tuku atu ei iaia i te tuatua kopae; kare rai tona tuakana pikikaa ko Iuda i mataku, kua aere ra e kua rave katoa aia i te peu akaturi.

9 E viivii roa akera te enua i te rongonui o tana akaturi, e kua akaturi aere ki te toka e ki te rakau.

10 E oti roa akera, kare rai tona tuakana pikikaa ko Iuda i oki mai kiaku ma tona ngakau katoa, ma te pikikaa ra, te tuatua maira Iehova.

11 E kua tuatua mai a Iehova kiaku, E tu tuatua-tika to Iseraela akatitima, i ta Iuda pikikaa ra.

12 Ka aere ka tutu aere i teianei tuatua ki te pae ki apatokerau, kia na ko atu ei. Ka oki mai koe e Iseraela akatitima e, te tuatua mairā Iehova; e kare au e akatopa atu i toku riri ki runga ia kotou; e aroa oki toku, te tuatua mairā Iehova, kare au e akamouriri e tuatau ua atu.

13 E aaki maira koe i toou kino e, kua ara rai koe i toou atua ra ia Iehova, e kua koka aere ua koe ma te au tangata ke, ki raro ake i te au rakau ruperupe katoatoa; e kare akenei kotou i akarongo i toku reo, te tuatua mairā Iehova.

14 Ka oki mai, e te au tamariki akatitima e; te tuatua maira Iehova, e akaipoipoia oki au ia kotou, ka rave rai au ia kotou, tataki tai i te oire, e tataki rua i te kopu-tangata, ka arataki ei au ia kotou ki Ziona.

15 E e oronga atu au i te tiaki no kotou e tau ki toku uaorai ngakau, ko te ka angai ia kotou ki te kite e te pakari.

16 E kia akamaataia ra kotou, e kia rai ki runga i te enua ra, i taua au rā ra, te tuatua mairā Iehova, kare ratou e tuatua akaou, Te aruna koreromotu a Iehova; kare oki e tupu ki roto i te ngakau; kare oki te reira e maaraia atu; kare oki e atoro akaouia; kare rai e anga akaouia.

17 I te reira tuatau e tapaiaʼi Ierusalema, Ko te terono o Iehova; e uipa anakeia te pa enua ki reira, ki Ierusalema, ki te ingoa o Iehova ra: kare oki ratou e aere akaou i te ketaketa o to ratou uaorai ngakau kino.

18 I te reira au rā e aere atu ei te ngutuare o Iuda ma te ngutuare o Iseraela, e aere kapipiti mai raua, mei te enua maira i apatokerau, ki te enua i akanooia e au to kotou ai metua ra.

19 Kua karanga ra au e, Eaa e tikaʼi iaku kia tuku mai ia koe ki rotopu i te au tamariki ra? ka oronga atu ei i taua enua inangaroia noou ra, te tuanga meitaki roa atu o te pa enua ra? e kua tuatua iora au e, Ka kapiki mai koe kiaku nei, E taku Metua e; e kare koe e anga ke i te aru anga mai iaku nei.

20 Koia ïa, mei te vaine i akaruke pikikaa i tana tane, kua pera rai ta kotou pikikaa anga mai iaku nei, e te ngutuare o Iseraela e, te tuatua mairā Iehova.

21 E reo tei kitea i runga i te au ngai teitei, te aue, e te pure anga, o te au tamariki a Iseraela: no te mea kua akamingi ratou i to ratou aerenga, kua akangaropoina ratou i to ratou Atua ia Iehova.

22 E oki mai kotou, e te au tamariki akatitima e, ka akaoraia e au to kotou akatitima anga. I na, te aere atu nei matou ia koe, ko to matou Atua oki koe, ko Iehova.

23 E pikikaa tika rai to te au tuaivi, e to te au maunga ra e manganui ua atu; tei to tatou Atua tikai ra, tei ia Iehova, te ora o Iseraela.

24 Na te mea akama i akapou i te apinga a to matou ai metua mei to matou ou anga mairai; ta ratou au tamaroa, e ta ratou au tamaine.

25 Te moe nei matou ki raro ma to matou akama, e te tapokiia nei matou e to matou uaorai aringaringa: no te mea kua ara akenei matou i to matou Atua ra ia Iehova; ko matou e to matou au metua, mei to matou ou anga mairai, e tae rava akenei ki teianei rā, e kare akenei i akarongo i te reo o to matou Atua ra o Iehova.