2 Korinetia

12 KARE rava oki e tika iaku kia akatietie. Ei te orama ra au e i te tuatua i akakiteia mai e te Atu ra.

2 Kua kite au i tetai tangata i roto i te Mesia, okotai akenei ngauru mataiti e a ara: (kare au i kite e, i roto i te kopapa, kare oki au i kite e, kare i roto i te kopapa: ko te Atua tei kite;) i apai ravaia taua tangata ra ki runga rava i te rangi tua toru ra.

3 Kua kite au i taua tangata ra, (kare au i kite e, i roto i te kopapa, me kare i roto i te kopapa; ko te Atua tei kite;)

4 E i apai naia aia ki runga i paradaiso, e kua akarongo i te tuatua, kare e tau akarongo i te tuatua, kare e tau kia tuatua, kare oki e tika i te tangata nei kia tuatua.

5 Mei te reira te tu e akatietie ïa au iaia; kareka iaku uaorai, kare ïa au e akatietie, mari ra i toku nei paruparu.

6 Naringa ra au i inangaro i te akatietie, kare au e riro ei neneva; ko te tuatua-mou oki taku e tuatua: te akakoromaki nei ra au, ko te teitei ua aea oki to tetai tangata manako iaku i tana i kite iaku nei, e tana oki i akarongo iaku nei ra.

7 E kia kore au e teitei rava i te maata o tei akakiteia mai iaku ra, i tukuia mai tetai tara i roto i taku kopapa nei, e karere na Satani ei pāpā mai iaku, kia kore au e teitei maata roa.

8 E e toru oki aku pati anga atu i te Atu i taua mea ra, kia akataka keia iaku.

9 Kua tuatua maira ra aia, Toku nei aroa ua, oti ra ua ïa taau: ei te apikepike e taka meitaki ravaʼi toku maroiroi. E teianei, e mea rekareka ïa iaku kia akatietie i toku nei paruparu, kia vai marie te maroiroi o te Mesia i runga iaku nei.

10 E teianei e mea rekareka iaku te paruparu, te akakino, te pini, te takinga-kino, e te tumatetenga i te Mesia nei; kia paruparu oki au ra, te maroiroi ra au i reira.

11 Kua riro aina au ei neneva i teianei akatietie anga? no kotou ïa, ko kotou oki te akameitaki mai iaku e tikaʼi: kare rava oki au i topa ki muri i te au aposetolo mamaata ra, puapinga kore uaʼi au nei.

12 I rave tikaia oki te akairo aposetolo i roto ia kotou na, ma te akakoromaki maata, e te au akairo, e te peu tu ke, e te angaanga mana.

13 Eaa oki te mea i toe ia kotou i tetai au ekalesia ra, mari ra ko au kare i akateimaa ia kotou? e akakore mai i taua apa naku ra.

14 I na, ko te toru teia o toku vave anga e aere atu ia kotou na; e kare rai au e akateiaa ia kotou: kare oki au i umuumu atu i ta kotou, ko kotou ra taku i umuumu. Kare oki te tamariki e akaputu i te apinga na te metua, ko te metua ra te akaputu na te tamariki.

15 E kua tika rava iaku i te akaope i toku nei ririnui e kia ope rava no to kotou vaerua; iti ua rai toku aroaia mai i te rai o toku aroa ia kotou.

16 Pera ua atu, kare au i akateiaa ia kotou: te tuatua na ra ratou, no te pakari ra oku, rauka iora kotou iaku i te pikikaa.

17 E apinga aina taku i rauka ia kotou i tetai i te aronga taku i unga atu ia kotou?

18 Kua akaue au ia Tito e kua unga katoa atu au i tetai taeake: e apinga aina ta Tito i rauka ia kotou na? kare aina okotai rai Vaerua i to matou aaere anga? kare aina okotai rai o matou ruatapuae?

19 Te manako na kotou e te akatika akaou nei matou ia matou uaorai ia kotou na? te tuatua nei matou i ta te Mesia i mua i te aroaro o te Atua: te rave nei ra matou i te au mea katoa nei, e aku au akaperepere, kia meitaki kotou.

20 Te mataku nei ra au, ko te rokoia atu kotou e au, kia aere atu au ra, ko te kore aea e tau i taku e inangaro nei, e ko te riro oki au mei tei kore i inangaroia e kotou na? peneiake te vai na te tauetono, te vareae, te makitakita, te karo, te urutoe, te tuatua koumuumu, te akamaata, te vaavaanunui:

21 Ko te taakaaka aea taku Atua iaku, kia tae akaou atu au i roto ia kotou na, ko te aue oki au i te aronga i araia na e manganui, e kare i tataraara i te tuatua viivii, e te akaturi, e te kanga, i raveia e ratou ra.