Koheleta

8 KOAI tei aite ki te tangata pakari? koai tei kite i te aiteanga o te au mea katoa nei? e kakā te mata tangata i te pakari; e maru mai ei te akama kore o tona ra mata.

2 Teia taku tuatua kia koe, E akono i te akauenga a te ariki, no te taputou oki a te Atua.

3 Auraka e aere mei mua mai i tona aroaro ma te tumatetenga: auraka e māro ua atu i te mea kino ra; te rave ra oki aia i tana i inangaro.

4 Tei te tuatua a te ariki te mana; e koai te karanga atu kiaia e, Eaa na koe?

5 Ko tei akono i te akauenga ra, kare ïa e kite i te kino: e akono rai oki te ngakau o te tangata pakari i te tuatau e te tuatua-tau.

6 Te vai ra oki te tuatau e tau ei te au mea katoa i akakoroia ra; e mate maata ra to te tangata i te reira;

7 Koia kare i kite i te au mea e tupu ra: e tika oki iaai kia akakite atu iaia i te au mea te ka tupu ra?

8 Kare o te tangata nei mana ki runga i te vaerua kia tāpu i taua vaerua ra; kare oki e mana i te rā e mate ei ra: kare rava e oroanga i te reira tamaki; kare oki te aronga rave ara ra e ora ï te reira.

9 Kua ope te reira i te kiteia e au, e kua tavaitai au i toku ngakau i te au angaanga katoa i raveia i raro ake i te rā nei; e i tetai tuatau te tutara ra tetai tangata ki rungao i tetai, ei mate nona uaorai:

10 E kua kite oki au i te aronga kino i te tanu angaia, e ngaro atura; mei te ngai tapu atu ratou i te riro anga, ngaropoina atura i roto rai i te oire ta ratou i akapera ra: e mea puapinga kore katoa oki te reira.

11 No te mea kare te utunga no te tuatua kino ra i tuku vaveia atu, i māro ketaketaʼi te ngakau o te tamariki a te tangata nei i te rave i te kino ra.

12 Rave ua rai te rave ara e ka anere ua atu i te rave anga, e roa ua atu rai ona puke rā; kua kite ra au e meitaki to te aronga i mataku i te Atua, tei mataku ki mua i tona aroaro:

13 Kare ra o te aronga kino e meitaki, kare oki ona puke rā e akaroaia, mari ra mei to te ata ra; koia kare i mataku ki mua i te aroaro o te Atua ra.

14 Teia katoa tetai mea puapinga kore i raveia i te ao nei: te vai nei te aronga tuatua-tika, i rokoia mai i tei tau i te angaanga a te aronga kino ra; e te aronga kino, i rokoia mai i tei tau i te angaanga a te aronga tuatua-tika ra: kua na ko iora au, E puapinga kore

katoa ïa.

15 Kua akameitaki atura au i te rekareka; kare oki o te tangata nei meitaki i raro ake i te rā nei, mari ra kia kai, e kia inu, ka rekarekaʼi: ko tei vaooia mai ïa nana i tana ra rave anga angaanga, koi vai ake ona puke rā i te ora anga nei, ta te Atua i oronga mai nona i raro ake i te rā nei.

16 Kia tavaitai ra toku ngakau kia kite i te pakari, e kia kite oki au i te au angaanga i raveia i te ao nei; (kare oki i te ao, e kare oki i te po, to tetai mata e kite i te moe:)

17 E te kite ra oki au, i te au angaanga katoa a te Atua ra, kare i kitea e te tangata nei, te au angaanga katoa i raveia i raro ake i te rā nei: e kimi ua atu rai te tangata kia kite, kare rai e kitea e ia; koia rai, kia akamaaraara ua te tangata pakari kia kite, kare rai e kitea e ia.