Mataio

10 KUA karanga atura aia ki tana au pipi tino ngauru ma rua, e aere mai kiaia, kua tuku atura i te mana no ratou, kia tuaru i te au vaerua viivii ki vao, e kia akaora i te au maki ravarai, e te au mate katoa.

2 Teia oki te au ingoa o te au aposetolo tino ngauru ma rua ra; Ko Simona te momua, ko tei karangaia ia Petero ra, e tona taeake ko Anederea; ko Iakobo a Zebedaio ra, e tona taeake ko Ioane;

3 Ko Philipa, e ko Baratolomea; ko Toma, e te telona ra ko Mataio; ko Iakobo a Alephaia ra, e ko Lebaio, ko tei karangaia ia Tadaio;

4 Ko Simona te Kanana ra, e ko Iuda Ikariota, ko tei pikikaa iaia ra.

5 Ko taua tino ngauru ma rua nei ta Iesu i akaunga, e kua ako atura ia ratou, na ko atura, Auraka e aere atu ki te arataa o te etene ra, eiaa katoa e tomo atu ki te oire o to Samaria ra:

6 Ka aere tika atura ki te au mamoe i ngaro i te ngutuare o Iseraela.

7 E tutu aere kotou, na ko atu, Te vaitata mai nei te basileia o te ao.

8 E akaora i te au maki, tamā i te lepera, e akatu i tei mate, e tuaru i te demoni; e mea o mai ua to kotou, e oronga ua atu oki kotou.

9 Auraka ei auro, e te ario, e te veo, i roto i to kotou tatua;

10 Auraka ei pute e apaiia, auraka e taki rua pereue, auraka ei tamaka, auraka ei tokotoko: e tau oki i te rave angaanga tana kai.

11 E te oire e te vila ta kotou e tomo, e ui atu i to reira tangata e tau; ei reira noo ei kotou, e ka aere atu ei.

12 E kia tomo atu kotou ki roto i te are, ka akaora atu i to reira.

13 E te tau ra taua ngutuare ra, e vai rai ta kotou au i reira: kia kore ra e tau, e oki akaou mai ïa ta kotou au ra ia kotou uaorai.

14 E te kore e kite mai ia kotou, e kare oki e akono i ta kotou tuatua; kia aere atu kotou ki vao i taua are ra, e taua oire ra, ka ruru atu i te repo i to kotou vaevae.

15 Koia tikai taku e karanga atu kia kotou nei, Kia tae ki te rā akavaanga, e ngari ake to te enua ra to Sodoma e to Gomora, i to te reira oire.

16 I na, te akaunga atu nei au ia kotou, mei te mamoe i rotopu i te au luko ra: kia pakari kotou mei te ovi, e te apa kore mei te kukupa ra.

17 Kia matakite ra ia kotou i te tangata, ka tuku oki ratou ia kotou ki te sunederi, e pāpā oki ia kotou i roto i to ratou au sunago;

18 E noku nei e taki naiaʼi kotou ki mua i te aroaro o te au tutara, e te ui ariki, ei kite no ratou, e no te au etene.

19 Kia tuku ra ratou ia kotou, auraka e taitaia i te tu o ta kotou ka karanga atu; e akakiteia mai kotou i te tuatua i reira ra.

20 Kare oki ko kotou tei karanga atu, ko te Vaerua ra o to kotou Metua tei tuatua i roto ia kotou na.

21 Ei reira te tuakana e tuku atu ei i te taeake kia mate, e te metua i te tamaiti; e tu mai oki te au tamariki ki runga e tamate i to ratou au metua.

22 E e makitakitaia kotou e te tangata katoatoa i toku nei ingoa; ko te tāpu marie ra e kia tae ki te openga, koia te ka ora.

23 E kia takinga-kino ratou ia kotou i tetai oire, e oro ke atu ki tetai: tikai oki taku e karanga atu kia kotou nei, Kare e kako te au oire o Iseraela ia kotou, e tae mai ei te Tamaiti a te tangata.

24 Kare te pipi i rai atu i tana orometua, kare oki te tavini i rai atu i tona pu.

25 Kia arite ra te pipi i tana orometua, e te tavini i tona pu, kua oti ua ïa. Kia tapa atu ratou i te ingoa o te pu o te are ra, ko Belezebuba, ka tanga atu ei oki to te ngutuare nona!

26 Auraka ra kotou e mataku ia ratou, kare rava e mea tapokiia e toe i te akakiteia; e kare oki e mea ngaro e toe i te kitea.

27 Taku i karanga atu kia kotou i te poiri nei, ta kotou ïa e tuatua i te mārama: e tei koumuumuia i roto i to kotou taringa, ta kotou ïa e kapiki ua atu ki rungao i te are.

28 Auraka e mataku i te ta mai i te kopapa nei, kare te vaerua e mate ia ratou: e mataku ra kotou iaia, ko te tika iaia kia tamate takiri i te kopapa e te vaerua katoa i te po.

29 Kare aina e taki rua mea manu rikiriki e okoia i te asario okotai nei? kare oki tetai o ratou ra e ngaro i to kotou Metua kia topa ki raro i te enua.

30 Te rauru oki o to kotou na upoko, kua ope ïa i te tatauia.

31 Auraka mari kotou e mataku, e maata to kotou meitaki i to te au manu rikiriki e manganui.

32 E teianei, ko te aaki iaku ki mua i te aroaro o te tangata nei, e aaki katoa au iaia ki mua i te aroaro o taku Metua i te ao ra.

33 Kareka te uuna iaku ki mua i te aroaro o te tangata nei, e uuna katoa au iaia ki mua i te aroaro o taku Metua i te ao ra.

34 Auraka e manako e, i aere mai ei au e apai mai i te au i te enua nei; kare au i aere mai e apai mai i te au, e tamaki ra.

35 I aere mai nei au e akatupu i te tamaki i te metua tane raua ko te tamaiti, te metua vaine raua ko te tamaine, te metua ongoai vaine raua ko te unonga vaine.

36 E kitea oki to te tangata nei enemi i roto i tona uaorai ngutuare.

37 Ko tei maata tona inangaro i tona metua tane e tona metua vaine, e mea ngiti iaku, kare aia e tau iaku; e tei rai tona inangaro i te tama e te tamaine, e mea ngiti iaku, kare aia e tau iaku.

38 E tei kore e rave i tona uaorai satauro, ka aru mai ei iaku, kare aia e tau iaku.

39 Tei tāpu i tona uaorai ora, ka ngere ïa i te ora; kareka tei tuku ua i tona ora noku nei, ka ora aia.

40 Ko te kite mai ia kotou, kua kite mai ïa iaku, e te kite mai iaku nei, kua kite mai ïa i tei tono mai iaku nei.

41 Te kite mai i te peroveta, no te mea e peroveta, e rauka iaia ta te peroveta tutaki; e te kite mai i te tangata tuatua-tika, no te mea e tangata tuatua-tika, e rauka iaia ta te tangata tuatua-tika ra tutaki.

42 E ko te ka o mai i tetai kapu vai anu na tetai o teianei aronga tangata rikiriki, no te mea e pipi aia naku, tikai taku e karanga atu kia kotou, Kare takiri aia e ngere i te tutaki.