Exodo

19 I TE toru o te marama, o to te tamariki a Iseraela aerenga mai mei te enua maira mei Aiphiti, ko taua rā rai, ko to ratou ïa tae anga mai ki te medebara ra ko Sinai:

2 Kua akaruke oki ratou ia Rephidima, e kua tae maira ki te medebara i Sinai, e kua puakapa iora ratou i taua medebara ra; e kua puakapa iora to Iseraela i reira ki mua atu i te maunga.

3 Aere aturā Mose ki runga ki te Atua ra, kua kapiki mairā Iehova kiaia i runga i taua maunga ra, na ko maira, E na ko atu koe ki te ngutuare o Iakoba, e e akakite ki te tamariki a Iseraela:

4 Kua kite kotou i taku i rave ki to Aiphiti ra, e kua maranga kotou iaku na runga i te peau aeto ra, e kua apai mai ia kotou i ko nei kiaku uaorai nei.

5 E tenana, kia akarongo tikai kotou i toku reo, e kia akono i taku ra koreromotu, ka riro ïa kotou ei apinga akaperepere maata naku, i te au tangata ravarai ra: noku uaorai oki te ao katoa nei:

6 E riro rai kotou ei basileia taunga naku, e ei iti-tangata tapu. Ko taau ïa tuatua e karanga atu ki te tamariki a Iseraela ra.

7 E kua aere aturā Mose, kua karanga atura ki te aronga pakari o taua aronga tangata ra, e kua tuku atura i te au tuatua katoa ta Iehova i tuatua mai kiaia ki mua i to ratou aroaro.

8 E kua tuatua tai ua maira te tangata ravarai, na ko maira, Te au tuatua ravarai ta Iehova i tuatua, ka rave ïa matou. E kua akakite aturā Mose i ta te au tangata ra tuatua kia Iehova ra.

9 Kua tuatua mairā Iehova kia Mose, I na, a aere atu au kia koe, na roto i tetai tumurangi patapatatue ra, kia akarongo te au tangata kia karanga atu au kia koe, e kia akarongo mairai ia koe e tuatua ua atu. E kua akakite aturā Mose i ta te au tangata ra tuatua kia Iehova ra.

10 Kua tuatua mairā Iehova kia Mose, E aere koe ki te au tangata ra, e akatapu atu ia ratou akonei, e apopo, e orei ratou i to ratou kakau,

11 E kia teateamamao oki ratou kia tae ki te toru o te rā: ei te rā toru oki ka eke mai ei a Iehova ki mua tikai i te mata o te tangata ravarai, ki runga i te maunga nei ko Sinai.

12 E tuku oki koe i te kotinga e pini ua ake no te tangata ra, e karanga atu ei, Kia matakite ia kotou, auraka kotou e aere ki runga i te maunga nei, auraka oki e akatukia ua atu i te pae: ko te akatukia i te maunga nei, ka mate takiri roa ïa:

13 Auraka rava tetai rima e akatukia ua atu i te reira, ka peî tikaia ra aia ki te toka, e kare ra, ka ko e mama roaia; ko te puaka e te tangata katoa, kare ïa e ora: kia roa te tangi o te pu ra, e aere ua mai ratou ki runga i te maunga nei.

14 Kua eke iorā Mose ki raro mei runga mai i te maunga ra ki te au tangata ra, e akatapu atura i te au tangata ra: e kua orei iora ratou i to ratou kakau.

15 E kua karanga atura aia ki te au tangata ra, Kia teateamamao kotou i te rā toru: auraka e akavaitata ki te vaine.

16 E tae akera ki te toru o te rā i te popongi, ko te mangungu iora, e te uira, e tetai tumurangi patapatatue ki runga i taua maunga ra, e te tangi pu ra oki e tangi maata roa: kua rutetetete oki te tangata tini ravarai o te puakapa ra.

17 Kua arataki aturā Mose i te au tangata ki vao i taua puakapa ra, kia aravei atu i te Atua; kua tu ua iora ratou i te ngai i raro ake i taua maunga ra.

18 E auai anake atura taua maunga ra ko Sinai, no te mea kua eke mai a Iehova ki rungao i taua maunga ra na roto i te ai: peke ua atura te auai ki runga, mei te auai umu ura, e kua ngaueue roa atura taua maunga katoa ra.

19 E te tangi ra taua pu ra, te tupu ua atura oki i te maata roa anga, kua karanga aturā Mose, e kua tuatua maira te Atua kiaia i tetai reo.

20 Kua eke maira oki a Iehova ki runga i te maunga ra ko Sinai, ki runga roao i te take maunga: e kua kapiki mairā Iehova kia Mose, a aere ki runga i te take maunga; e kua aere aturā Mose ki runga.

21 Kua tuatua mairā Iehova kia Mose, E eke ki raro, e ako atu i te au tangata ra, ko te tomo pu mai aea ratou ki roto ia Iehova e matakitaki, ko te mate aea oki to ratou e manganui.

22 E e akatapu katoa te aronga taunga, ko tei akavaitata mai kia Iehova ra, ia ratou uaorai, ko te riro pu atu aeā Iehova ki runga ia ratou.

23 Kua karanga aturā Mose kia Iehova, Kare te tangata e tae mai ki te maunga nei ko Sinai: kua tuatua pu mai oki koe ia matou, na ko maira. E tuku i te kotinga e pini ua ake te maunga nei, e e akatapu.

24 Kua karanga mairā Iehova kiaia, Ka aere, aere ki raro, e ka aere akaou mai ki runga nei, ko koe, e ko Aarona katoa; auraka ra te aronga taunga, e te au tangata ra, e tomo pu ua mai ki roto, ka aere mai ei ki runga kia Iehova nei, ko te riro pu atu aea aia ki runga ia ratou.

25 Kua eke iorā Mose ki raro ki taua au tangata ra, e kua tuatua iora kia ratou.