Ieremia

15 E KUA tuatua mairā Iehova kiaku nei; Tu ua mai a Mose ma Samuela ki mua i toku aroaro nei, kare toku manako e tau atu ki teianei iti-tangata: e tuaru atu ia ratou i mua i toku aroaro, e kia aere ke atu ratou.

2 E riro ïa, kia tuatua mai ratou ia koe ra e, E aere matou iea? ei reira koe ka karanga atu ei kia ratou, Te na ko mairā Iehova; To te mate ra, ei te mate ïa; e to te koke ra, ei te koke ïa; e to te onge ra, ei te onge ïa; e to te tuikaa ra, ei te tuikaa ïa.

3 E a aku mea e tuku ki runga ia ratou, te tuatua mairā Iehova; ko te koke ei ta, e te au puaka-aoa ei kika aere, e te au manu o te reva, e te au puaka o te enua, ei kai e kia pou.

4 E e tuku atu au ia ratou kia apai aere ia i te au basileia katoa o te enua nei, no Manase, te tamaiti a Hezekia, ariki no Iuda, i tana oki i rave i Ierusalema ra.

5 Koai oki te ka aroa atu ia koe, e Ierusalema e? e naai e tangi atu ia koe? e naai e tapae ua atu e ui i toou ra meitaki?

6 Kua akaruke akenei koe iaku, te tuatua mairā Iehova, kua oki koe ki muri: no reira au i akatikaʼi i toku rima ki runga ia koe, e akapou atu ia koe; kua roiroi oki au i te aroa anga.

7 E i roto i te au ngutupa o te enua ra, i akapueu atu ei au ia ratou ki te tairi; kua akangere atu au ia ratou i te tamariki, kua akapou atu au i toku iti-tangata, kare oki ratou i ariu mai i to ratou au aerenga.

8 Kua maata oki ta ratou au vaine takaua ki mua iaku nei, e iti te one i taatai: kua aratakiia mai e au ki runga ia ratou, ki runga oki i te oire metua, tetai tangata ou ra, ko tei noni aere i te avatea ua ra: kua akatopa vivikiia e au ki runga iaia te tumatetenga e te mataku.

9 Ko tei anau e kua taki itu, te paruparu ra ïa: kua unui roa tona vaerua; kua opu tona rā i te vai ua anga o te ao; kua akama aia e kua aringaringa: e te toenga o ratou ra, naku e oronga atu no te koke ki mua i te aroaro o to ratou au enemi, te tuatua mairā Iehova.

10 E ae oki au e, e taku metua vaine! ko koe i anau mai iaku ei tangata kakaro, ei tangata taumāro tuatua ki te enua katoatoa! kare oki au i tuku atu i taku moni ei ou, kare rai te au tangata i tuku mai i te moni kiaku ei ou; te tao anake ra ratou iaku.

11 Kua tuatua mairā Iehova. Kare ainei au i akaora ia koe kia meitaki? kare ainei koe i tikaia e au i te enemi, i te tuatau kino, e i te tuatau tumatetenga?

12 E rauka ainei te auri kia aati, te auri i apatokerau, e te veo?

13 Taau ra apinga, e taau ra au putunga apinga, taku ïa e oronga atu ei apinga noni, kare no te oko, no taau ra au ara ravarai, i toou ra au kotinga katoa.

14 E apai au ia koe i toou au enemi ki te enua kitea koreia e koe ra: kua tutungiia oki te ai i toku riri, te ka ka i runga ia kotou.

15 Ko koe tei kite, e Iehova e: e akamaara mai koe iaku, e e atoro mai iaku nei! e akaoko mai koe i te aronga e takinga-kino mai iaku ra; auraka au e ravea keia i te roa anga o toou riri: noou oki i akakoromaki ei au i te akakino, kia kite mai koe.

16 Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.

17 Kare au i noo i te uipa anga o te aronga akavaavaa, kare oki au i rekareka; no toou rima i noo ua ana ko au anake ua: kua akaki mairai koe iaku nei ki te makitakita maata.

18 Eaa toku nei mamae i kore ei i mutu, e toku puta e mea ora kore, kare e tika kia akaora? e riro ainei koe iaku nei mei te kauvai pikikaa? te vai mou kore?

19 E tenana, te na ko mairā Iehova, Kia oki mai koe, ei reira au e akaoki mai ia koe, e ka tu koe ki mua i toku aroaro nei: e kia akataka koe i te meitaki e te kino, e riro koe ei vaa tikai noku i reira: kia oki maira ratou kia koe; auraka ra koe e oki atu kia ratou.

20 E e akariro au ia koe ki teianei iti-tangata, ei patu veo akaketaketaia ra: e tamaki ua mai ratou kia koe ra, kare ra koe e rauka ia ratou: no te mea ko au tei vaitata ia koe ei akaora ia koe, e e ora koe iaku, te tuatua mairā Iehova.

21 E e ora oki koe iaku i te rima o te aronga kino, e e akaora atu au ia koe i roto i te rima o te aronga rikarika ra.