Exodo

4 KUA karanga atu rai a Mose, na ko atura, E i na, kare ratou e akatika mai i taku, kare oki e akarongo mai i toku reo: ka riro ra ratou i te tuatua mai e, Kare a Iehova i mama mai kia koe.

2 Kua tuatua mairā Iehova kiaia, Eaa tena i toou na rima? Kua karanga atura aia, E rakau.

3 Kua tuatua maira aia, Ka titiri ana ki raro i te one. Kua titiri iora aia i taua rakau ra ki raro i te one, e riro atura ei ovi; oro ke aturā Mose i taua mea ra.

4 Kua tuatua mairā Iehova kia Mose, Ka akatika ana koe i to rima, ka opu i te iku. (Kua akatika akera aia i tona rima, e kua opu akera, riro atura ei rakau i roto i tona rima;)

5 Kia akarongo mai ratou e, kua mama mai te Atua o to ratou ai metua ra, ko Iehova, te Atua o Aberahama, te Atua o Isaaka, e te Atua o Iakoba, kia koe.

6 Kua tuatua mairai oki a Iehova kiaia, Ka tuku ana i toou rima ki runga i toou umauma. Kua tuku iora aia i tona rima ki runga i tona umauma: e kia kiriti akera aia, i na, kua leperaia taua rima nona ra mei te kiona.

7 Kua tuatua maira oki aia, Ka tuku akaou i toou rima ki runga i toou umauma. Kua tuku akaou iora aia i tona rima ki runga i tona umauma; e kia kiriti akera aia i te reira i runga i tona umauma ra, i na, kua riro akaou mei te kiko tangata katoa ra.

8 Ko ratou oki kia kore e akatika mai ia koe, e kia kore e akarongo i te reo o tei muatangana ra akairo, ka akatika ratou i te reo o te akairo i muri ake.

9 Kia kore ra ratou e akatika i te reira puke akairo e rua ravarai, e kia kore e akarongo i toou reo, ei reira koe e rave ei i te vai o te kauvai ra, ka riringi ei ki raro i te one marō: e ka riro taua manga vai taau i rave mai no raro i te kauvai ra, ka riro ïa ei toto ki raro i te one marō ra.

10 Kua karanga aturā Mose kia Iehova, E taku Atu, kare au i te tangata vaa tukatau, mei ia koe rai i tuatua mai ki to tavini nei, e mei muatangana mairai: e reo murare oki, e te ngunguau toku.

11 Kua tuatua mairā Iehova kiaia, Naai i anga i te vaa tangata nei? e koai tei akariro iaia ei murare, e ei turi, e ei matapuera, e ei matapo? kare ainei ko au ko Iehova?

12 E teianei, e aere koe, ei vaitata katoao au i toou vaa, e naku e akakite i taau ka tuatua. 13 E kua karanga atura aia, E taku Atu e, teia taku tuatua kia koe, e tono koe i tei tau ia koe kia tono ra.

14 Kua tupu akera to Iehova riri ia Mose, e kua tuatua maira aia, Kare ainā Aarona ngati Levi ra i te tuakana noou? e tangata vaa tukatau aia kua kite au: e i na, te aere maira aia, e aravei ia koe: e ka rekareka tona ngakau, kia kite mai aia ia koe.

15 E naau e karanga atu kiaia, e ka tuku koe i te tuatua ki roto i tona vaa: e ei vaitata katoao oki au i toou vaa, e i tona vaa, e naku e akakite kia korua i ta korua e rave ra.

16 E nana e karanga atu ki te tangata i taau ra tuatua: ei vaa tikai oki aia noou, e ei tupau koe i te Atua iaia ra.

17 E rave koe i taua rakau ra i to rima, ko taau ïa taoonga kia rave i te au akairo ra.

18 Aere mairā Mose, oki maira ki te metua ongoai ra kia Ietero ra, e kua tuatua maira kiaia, Teia taku tuatua, e tuku ake ana koe iaku, e oki ana au ki toku ai taeake i Aiphiti ra, kia kite au ia ratou i te ora anga. Kua karanga aturā Ietero kia Mose, Ka aere, kia ora na te aerenga.

19 Kua tuatua mairā Iehova kia Mose i Midiana, Ka aere, e oki koe ki Aiphiti: kua ope oki te au tangata i kimi mai ia koe ra kia mate.

20 Kua rave akerā Mose i tana vaine e nga tamariki ra, e tuku atura ki runga i te asini, oki atura ki te enua ra ko Aiphiti: kua apai katoā Mose i te rakau a te Atura ra i tona rima.

21 E kua tuatua mairai a Iehova kia Mose, Kia tae akaou koe ki Aiphiti ra, kia maroiroi koe i te rave i taua au semeio katoa nei ki mua i te aroaro o Pharao, taku i tuku atu ki toou rima: e akaketaketa ua ana ra au i tona ngakau, kare rai aia e tuku i e au tangata nei.

22 E naau e karanga atu kia Pharao e, Te na ko mairā Iehovā, E tamaiti naku Iseraela, ko taku ïa tama mua:

23 Teia taku tuatua kia koe, e tuku mai koe i taku tamaiti, kia akamori mai aia iaku: kia kore ra koe e tuku mai iaia, i na, ka tamate roa au i taau tamaiti, i taau tama mua ra.

24 E tae akera ki te ngai moe anga i te arataa ra, kua aravei mairā Iehova iaia, e kua umuumu mai iaia e ta.

25 Kua rave iorā Zipora i te toka koi, peritome iora i tana tamaiti ra, e kua titiri ki raro ki tona pae vaevae, e kua tuatua akera, E tane toto koe naku e. 26 Tuku atura aia iaia kia aere: no te peritome oki i tuatuaʼi aia e, E tane toto.

27 Kua tuatua anā Iehova kia Aarona e, E aere koe ki te medebara e aravei atu ia Mose. Aere atura aia, e aravei atura iaia i te maunga o te Atura ra, e kua ongi atura iaia.

28 Kua akakite mairā Mose kia Aarona i te au tuatua roarai a Iehova ko tei tono iaia ra, e te au akairo katoa tana i akaue mai kiaia.

29 Aere aturā Mose raua ko Aarona, e akaputuputu iora i te aronga pakari katoa o te tamariki a Iseraela;

30 Kua karanga aturā Aarona i te au tuatua roarai ta Iehova i tuatua mai kia Mose ra, e kua rave i te au akairo ki mua i te aroaro o te au tangata ra.

31 Kua akatika maira taua aronga tangata ra: e kite akera ratou e, kua atoro mai a Iehova i te tamariki a Iseraela, e kua akara mai aia i to ratou mate, kua tupou iora ratou ki raro, e kua akamori.