Exodo

20 KUA tuatua maira te Atua i teia katoa nei au tuatua, na ko maira,

2 Ko au toou Atua ra ko Iehova, ko tei arataki mai ia koe mei te enua maira mei Aiphiti, mei te ngutuare i tavini ei ra.

3 Auraka rava toou ei atua ke atu iaku nei. 4 Auraka rava koe e rapa i te idolo akatikitikiia noou, e te tu no tetai mea i runga i te rangi ra, e no tetai mea i raro i te enua nei, e no tetai mea o te moana i raro ake i te enua ra:

5 Auraka rava koe e tupou ki raro ia ratou, auraka oki e akamori atu ia ratou; e Atua vareae oki au ko te Atua noou nei ko Iehova, i te tutaki anga i te ara a te aronga metua ki runga i te tamariki, e tae ua atu ki te toru e te a o te uki, kia kore ratou e inangaro mai iaku ra;

6 E te aroa anga atu i te aronga i inangaro mai iaku, e kua akono i taku au akauenga, e tausani ua atu.

7 Auraka koe e akaiki puapinga kore ua i te ingoa o to Atua ra ko Iehova; kare oki a Iehova e akatika iaia i tei akaiki puapinga koe ua i tona ra ingoa.

8 E akamaara i te rā sabati, kia akatapuia.

9 E tika ia koe kia angaanga, e kia rave i taau au angaanga katoa i nga rā e ono ra.

10 Kareka te rā itu ra ko te sabati ïa no to Atua ra no Iehova; auraka rava koe e rave i te angaanga i te reira rā; ko koe, e taau tamaiti, e taau tamaine, e toou tavini tane, e toou tavini vaine, e taau au puaka ra, e to tangata ke katoa i ou ra:

11 E ono oki o Iehova rā i te anga anga i te rangi e te enua, te tai, e te au mea katoa i roto ra; kareka te rā itu ra, akaangaroi iora aia i te reira: i akameitaki ei a Iehova i te rā sabati, e akatapu iora oki i te reira.

12 E akangateitei atu i to metua tane, e to metua vaine: kia akaroaia toou puke rā i te enua ta toou Atua ta Iehova e oronga noou na.

13 Auraka rava koe e ta ua.

14 Auraka rava koe e akaturi.

15 Auraka rava koe e keia. 16 Auraka rava koe kia riro ei kite pikikaa i to tangata tupu na.

17 Auraka rava koe e morimori i te are o to tangata tupu, auraka katoa koe e morimori i te vaine a to tangata tupu, e tona tavini tane, e tona tavini vaine, e tana puakatoro e tana asini, auraka katoa i te au mea ravarai a to tangata tupu ra.

18 Kua kite te tangata ravarai i taua mangungu ra, e te uira, e te tangi o te pu ra, e te auai o taua maunga ra: e kite akera taua aronga tangata ra, akataka ke atura ratou, tu ua atura i te ngai mamao.

19 E kua tuatua maira ratou kia Mose, Ko koe te tuatua mai kia matou, e na matou ïa e akarongo: auraka ra te Atua e tuatua mai kia matou, ko te mate aea matou.

20 Kua karanga aturā Mose ki taua aronga tangata ra, Auraka e mataku: i aere mai oki te Atua e timata ia kotou, kia vai rai te mataku iaia i mua i to kotou mata, kia kore kotou e rave i te ara.

21 Tu ua iora te au tangata i te mamao ke, e kua akavaitata aturā Mose ki taua ngai poiri patapatatue, tei reira te Atua ra.

22 Kua tuatua mairā Iehova kia Mose, E na ko atu koe ki te tamariki a Iseraela, Kua kite akenei kotou e, kua karangaranga au kia kotou i runga i te rangi nei.

23 Auraka roa kotou e anga i te atua ario iaku nei, e te atua auro auraka rai e anga no kotou.

24 Ei atarau one taau e akatu naku, ka apai mai ei i taau na au atinga karakaratio ki rungao ra, e te atinga au naau ra, i te mamoe naau, e te puakatoro naau: i te au ngai katoa e akamou ei au i toku ra ingoa, e aere atu ïa au kia koe na i reira, e ka akameitaki oki au ia koe.

25 Kia inangaro ra koe i te akatu i te atarau toka naku, auraka ei toka taraiia kia patu ra; kia tāki ua koe i to toki ki rungao i te reira, kua viivii ïa ia koe.

26 Auraka oki koe e na runga i te ara akanukanuka i te aere ki runga i taku atarau, ko te kitea aea to vai taaka ua anga i reira.