Galatia

4 E TEIANEI te karanga atu nei au. Ko te tangata kainga, i te tamariki anga ra, e atu ua rai aia i te apinga tini ravarai, kare ona e tu ke i to te tuikaa i reira;

2 Tei raro ake aia i te orometua e te tiaki, e kia tae ki te tuatau i akonoia e te metua ra.

3 Koia katoa oki tatou, i te tamariki anga ra, te vai tuikaa ua ra tatou i raro ake i te apiianga mua o teianei ao:

4 Kia tae rava akenei ra ki te tuatau tikai, kua tono maira te Atua i tana Tamaiti, na te vaine i anau, i anau mai oki i raro ake i te ture,

5 Kia okoia e ia te aronga i raro ake i te ture, kia akariroia tatou ei tamariki rave nana.

6 E no te mea e tamariki kotou na, i tuku mai ei te Atua i te Vaerua o tana Tamaiti ki roto i to kotou ngakau, i te kapiki anga e, E Aba, e taku Metua.

7 E teianei kare oki koe i te tuikaa, e tamaiti ra: e e tamaiti ra, e tangata kainga ïa na te Atua i te Mesia nei.

8 Kareka i to kotou kite kore anga i te Atua, te akamori ra kotou i reira i te au mea kare i te atua mou ra.

9 I teianei ra, kua kite kotou i te Atua, kare ua ra ïa, kia kiteia maira e te Atua, eaa kotou i oki akaou atu ei ki taua apiianga mua rikiriki rika kore, i ta kotou e anoano ra e kia tuikaa akaou rai kotou i reira?

10 Te akono na kotou i te rā, e te marama, e e tuatau, e te mataiti.

11 Te mataku nei au ia kotou, ko te riro aea taku i angaanga ki o kotou na ei mea puapinga kore.

12 E te au taeake e, te pati nei au kia kotou, e akariro kotou mei iaku nei, mei ia kotou na oki au: kare kotou i takinga-kino mai iaku.

13 Kua kite tikai oki kotou e, ma te paruparu o te kopapa nei i akakite atu ei au kia kotou i te evangelia i muatangana.

14 E taua timataanga noku ra i toku nei kopapa, kare kotou i akavaavaa mai i te reira, kare oki i akaruke mai iaku; kua āriki maira kotou iaku mei te mea e e angela na te Atua, e mei te mea ko te Mesia ra ia Iesu.

15 Teianei, teiea io nei taua mei taki no kotou ra? Ko au oki te kite ia kotou e, naringa i tika rai kua koiti ïa kotou i to kotou uaorai mata, e kua oronga mai iaku nei.

16 E teianei, kua riro ainei au ei enemi no kotou, ko au e akakite atu kia kotou i te tuatuamou nei?

17 Te tarekareka ua mai na ratou ia kotou, kare ra i te mea meitaki; te inangaro ra ratou i te akataka ia kotou, e kia tarekareka mai kotou ia ratou.

18 E mea meitaki te tarekareka i te mea meitaki, eiaa e tivata, auraka ei toku noo anga anake i rotopu ia kotou na.

19 E aku au tamariki mea riki e, taku e mamae akaou nei mei te mamae anau ra, e kia akatupuia te tu o te Mesia ki roto ia kotou na,

20 I anoano oki au e ei vaitata au ia kotou i teianei, e ei reo ke toku; te ekoko ua nei au ia kotou.

21 Ka akakite mai ana, kotou ko tei inangaro i ta te ture ra, kare kotou i kite i te ture?

22 Kua oti i te tataia e, toko rua a Aberahama tamariki tamaroa, na te vaine tuikaa tetai, na te vaine rangatira tetai.

23 Ko ta te vaine tuikaa ra, i anau mai ïa i ta te kopapa nei akonoanga; kareka ta te vaine rangatira ra, no tei tuatuaia maira ïa.

24 E aiteiteanga oki eianei puke mea: ko nga koreromotu ïa e rua ra; no te maunga ra tetai no Sinai, ko te anau mai tana ei tamariki tuikaa, koia oki a Hagara.

25 E taua Hagara nei oki, ko te maunga ra ïa ko Sinai i Arabia ra, e tau oki ia Ierusalema e vai nei, te vai tuikaa ua nei oki aia ma tana katoa ra tamariki.

26 Kareka Ierusalema i runga ra, ko te vaine rangatira ra ïa, ko to tatou ravarai ïa metua vaine.

27 Kua oti i te tataia, “Ka maeva, e tei pa, kare i anau e; kia puroro ua te reo maeva, e kapiki nui, e tei kore i mamae i te tamariki e; kua maata oki ta te takaua ra tamariki i ta te noo tane ra.”

28 E teianei, e te au taeake ra, e tamariki tatou no tei tuatuaia maira, mei ia Isaaka katoa ra te tu.

29 E mei iaia oki ko tei anau mai i ta te kopapa nei akonoanga, i takinga-kino atu iaia i tei anau mai i ta te Vaerua ra, koia katoa i teianei.

30 Te peea ra te tuatua i tataia ra? “E tuaru ke atu i teianei vaine tuikaa e tana tamaiti: kare oki te tamaiti a teianei vaine tuikaa e riro ei tangata tuanga katoa, raua ko te tamaiti a te vaine rangatira.”

31 Koia tikai oki, e te au taeake ra, kare tatou te tamariki na te vaine tuikaa, na te vaine rangatira ra.