Ezekiela

45 E KIA tua kelero kotou i te enua ei nooanga, e apai kotou i tetai atinga na Iehova, i tetai tuanga tapu i taua enua nei: i te roa ra, okotai takau ma rima ïa tausani i te kubiti, e te pararauare, okotai ngauru ïa tausani. E mea tapu oki teia e pini ua ake tona au kotinga katoa.

2 E no roto oki i te reira, e rima anere kubiti i te roa, no te ngai-tapu ïa, e rima anere oki i te pararauare, okotai rai aiteite e pini ua ake; e rima ngauru oki i te kubiti ei ngai atea e pini ua ake.

3 Ko tenana te aite kia aite koe i te roa okotai takau ma rima i te tausani, okotai ngauru oki i te tausani i te pararauare: e ei roto oki i te reira te ngai-tapu, te ngai-tapu roa ra.

4 Taua tuanga tapu o te enua nei, no te kau taunga ïa, te au tavini o te ngai-tapu, ko tei akavaitata i te raverave ia Iehova: ei turanga no to ratou au are, ei ngai-tapu oki no te are tapu.

5 Okotai takau ma rima oki i te tausani i te roa, e okotai ngauru i te tausani i te pararauare, no te ngati Levi, no te au tavini o te are, no ratou uaorai ei nooanga, ei puke pia oki okotai takau.

6 E na kotou e akataka i te noo anga i te oire, e rima tausani i te pararauare, okotai takau ma rima tausani i te roa, ki mua mai i te atinga ra i te tuanga tapu ra: no te ngutuare katoa ïa o Iseraela.

7 E ei tuanga oki ta te ariki i teia pae e tera pae i te atinga ra i te tuanga tapu, e i te tuanga no te oire ki mua i te atinga i te tuanga tapu ra, e te tuanga no te oire, ki te pae ki te opunga o te rā aere uaʼi ki te pae ki te opunga o te rā ra, e te pae ki te itinga o te rā aere uaʼi ki te pae ki te itinga o te rā ra: e te roa ra, ei mua mai ïa i tetai i taua nga tuanga ra, mei te kotinga ki te pae ki te opunga o te rā ra,e tae ua atu ki te kotinga ki te pae ki te itinga o te rā ra.

8 Ei te enua ei Iseraela nei tona kainga kai mātu: e kare te au ariki i oku e akareionga akaou i toku au tangata; e e oronga ratou i te pae toe o te enua no te ngutuare o Iseraela kia tau i to ratou au kopu.

9 Te na ko maira te Atu ra ko Iehova; Kua oti ana kotou, e te au ariki o Iseraela: ka akataka ke atu i te rave kino, e te āru, e ka rave ana i te tuatua-tau e te tuatua-tika, e apai ke atu i ta kotou takinga-kino i toku ra au tangata, te tuatua maira te Atu ra ko Iehova.

10 Ei aite tau ta kotou, e te epha tau, e te bato tau.

11 Kia okotai rai aite te epha e te bato, ko te ngauru o te tuanga, kia tuaia te omera, ko te bato ïa, e te epha katoa, ko te ngauru ïa o te tuanga o te omera: kia na te omera kia aite kia tau ki reira.

12 E te sekela, okotai takau ïa gera: e tai takau sekela, tai takau ma rima sekela, tai ngauru ma rima sekela, ko ta kotou ïa mina.

13 Teia te atinga kia apai kotou; ko te ono o te tuanga i te epha no roto i te omera sitona, ka oronga oki kotou i te ono o te tuanga i te epha no roto i te omera kerite.

14 Kareka te akonoanga no te inu, te bato inu ra, ko te ngauru o te bato no roto i te kora, e ngauru bato oki, okotai ïa omera; okotai oki omera okotai ngauru ïa i te bato:

15 E te punua mamoe okotai no roto i te anana e rua anere, no roto i te au one kai e matu ei i Iseraela ra; ei atinga kai, e ei atinga karakaratio, e ei atinga au, ei tapokiangaara no ratou, te tuatua maira te Atu ra ko Iehova.

16 Na te tangata tini katoatoa e apai i teianei atinga na te ariki no Iseraela nei.

17 Ei te ariki oki te apai i te au atinga karakaratio, e te au atinga kai e te au atinga inu, i te au oroa ra, e te au marama ou, e te au sabati, i te au uipa anga tapu katoa o te ngutuare o Iseraela: nana e akapena i te tarangaara, e te atinga kai, e te atinga karakaratio, e te atinga au ei tapokiangaara no te ngutuare o Iseraela.

18 Te na ko maira te Atu ra ko Iehova; I te marama mua ra, i te rā mua o taua marama ra, ka rave ei koe i tetai puakatoro ou e te kino kore, ka tamā ai i te ngai-tapu ra:

19 E na te taunga e rave i tetai pae toto i te tarangaara ra, ka tuku atu ei ki runga i nga pou o te are ra, e ki runga i nga poo e a o te nuka i te atarau ra, e ki runga oki i nga kopa ngutupa i te paepae ki roto ra.

20 E akapera katoa oki koe i te po itu i taua marama ra, no te aronga ravarai i tatipake ra, e no tei kamakura ra: e ei akaongi anga no kotou i taua are ra.

21 I te marama mua ra, i te po okotai ngauru ma a i taua marama ra, ei pasa ta kotou, e itu rā i taua kaingakai ra; ko te kai akaopue koreia, te ka keingaia ïa.

22 E i taua rā ra, e akapena te ariki i tetai puakatoro tarangaara nana uaorai e na te tangata katoatoa o te enua nei.

23 E i nga rā e itu i taua kaingakai ra, ka akapena aia i tetai atinga karakaratio na Iehova, taki itu puakatoro, taki itu mamoe toa kino kore, i te rā okotai, e ope akera aua nga rā e itu ra: e tetai punua puaka-nio i te au rā katoa, ei tarangaara.

24 E akapena oki aia i te atinga kai okotai epha no te puakatoro, okotai oki epha no te mamoe toa, okotai oki ina inu no te epha okotai.

25 I te itu o te marama, e te po okotai ngauru ma rima i taua maramara ra, e akapera katoa oki aia i te rave i taua akaingakai ra i aua nga po e itu ra, i tei tau i te tarangaara, tei tau i te atinga karakaratio, e tei tau i te atinga kai, e tei tau i te inu ra.