Te Au Akava

14 KUA aere aturā Samasona ki raro i Timenata, e kite atura aia i tetai vaine i Timenata no te au tamaine a te Philiseti ra.

2 E kua aere maira aia ki runga, akakite maira ki tona metua tane e tona metua vaine, e kua tuatua maira, Kite akenei au i tetai vaine i Timenata no te au tamaine a te Philiseti: e teianei, e tiki korua iaia ei vaine naku.

3 Kua karanga atura tona metua tane e tona metua vaine kiaia, Kare ainei e vaine i roto i te au tamaine o toou ra au taeake, e i roto i toku katoa ra au tangata, ka aere ei koe e rave i te vaine no roto i te au Philiseti peritome koreia ra? Kua tuatua mairā Samasona ki tona metua tane, Ka tiki koe iaia naku, kua tau rava aia iaku.

4 Kare ra tona metua tane e tona metua vaine i kite e, na Iehova taua mea ra, e te kimi ra aia i te ravenga i te Philiseti: ko runga oki te Philiseti ia Iseraela i taua tuatau ra. 5 Aere aturā Samasona e tona metua tane e tona metua vaine ki raro ki Timenata, e tae atura ratou ki te au kainga vine i Timenata ra; e i na, kua ngunguru maira tetai liona ou i te aravei anga iaia.

6 Kua tae viviki maira te Vaerua o Iehova ki runga iaia, e kua aae atura aia i taua liona ra mei iaia e aae ua i tetai punua puakanio, kare ana taoonga i te rima; kare ra aia i akakite ki tona metua tane e tona metua vaine i tana i rave ra. 7 Aere atura aia ki raro e kua karangaranga atura ki taua vaine ra, e tau tika atura aia ia Samasona.

8 E roa poto akera kua oki maira aia e rave iaia ei vaine nana, e kua tapae akera aia e akara i te kopapa o taua liona ra: e i na! e anana rango meli e te meli tei roto i taua liona ra. 9 Kua rave iora aia i te reira i tona rima, kai aere atura; e tae akera aia ki tona metua tane e tona metua vaine, kua apai atura aia i tetai manga na raua, e kua kai iora raua: kare ra aia i akakite kia raua e, no roto taua meli ra i te liona i te rave angaia mai e ia. 10 Kua aere iora tona metua tane ki raro ki taue vaine ra, kua rave iorā Samasona i te akakai; e peu tikai oki na te au tangata ou i te akapera.

11 E kia akera maira ratou iaia, kua arataki maira ratou i te au tangata e toru ngauru ei oa nona, kia noo i vaitata iaia. 12 Kua karanga aturā Samasona kia ratou, E tuku atu ana au i tetai piri ia kotou; e kia matara ia kotou ra, e kia akakite mai kotou kiaku i eianei puke rā e itu no te pokai nei, e apai atu au i te au pona e toru ngauru, e toru ngauru oki kakau i rungao; 13 Kia kore ra e tika ia kotou kia akakite mai kiaku, ka apai mai kotou i te pona e toru ngauru noku, e toru ngauru oki kakau i rungao ra. Kua tuatua maira ratou kiaia, Ka tuku mai ana taua piri naau ra, kia kite matou.

14 Kua karanga atura aia kia ratou, E kai tei rauka mai no roto i te kaikai ra, e te venevene no roto i te taae. E toru akera po kare rai i tika ia ratou kia akakite mai i taua piri ra. 15 E tae akera ki te po itu, kua tuatua maira ratou ki te vaine a Samasona, E akanauru ake ana koe i to tane na, kia akakite mai aia kia tatou i te piri nei; ka ka aea koe i te ai, e te are katoa o to metua ia matou: i tiki mai ainei kotou ia matou, kia pou ta matou apinga ia kotou? kare ainei?

16 Kua aue iora te vaine a Samasona ra ki mua iaia, e kua karanga atura, Te makitakita ra koe iaku, kare koe i inangaro mai iaku, kua tuku oki koe i te piri ki te au tangata o toku ra iti, e kare koe i akakite mai kiaku. Kua tuatua maira aia kiaia, I na oki, toku metua tane e toku metua vaine kare rai au i akakite kia raua, e ka akakite oki au kia koe? 17 I aue ana rai aia ki mua iaia i aua nga rā e itu i to ratou pokai anga ra: e tae akera ki te itu o te rā kua akakite maira aia kiaia, no te mea kua raurau maira aia iaia; e kua akakite akera aia ki tona iti-tangata i taua piri ra.

18 Kua tuatua ra te au tangata o taua oire ra kiaia i taua po itu ra, kare rai i topa te rā, Eaa atu rai te kai venevene mari ra ko te meli? eaa atu rai te apinga taae mari ra ko te liona? Kua karanga atura aia kia ratou, Naringa kare kotou i arote ki te puakatoro ua naku ra, kare taku piri e matara ia kotou. 19 Kua tae viviki maira te Vaerua o Iehova ki runga iaia, e aere atura aia ki raro ki Asekelona, kua ta iora i te au tangata no reira e toru ngauru, e kua rave iora i ta ratou apinga, kua apai maira i te au kakau no te aronga i akakite mai i taua piri ra. Tupu akera oki tona riri, e kua aere maira ki runga ki te ngutuare o tona metua tane ra.

20 Kua orongaia akera te vaine a Samasona na tona oa, ko tei akariroia e ia ei taunga nona.