Levitiku

26 AURAKA kotou e rapa i te au idolo no kotou, e auraka to kotou ei tiki kotikotiia, e te tiki e akatuia, auraka oki ei toka taraiia e tanumia i to kotou enua, ka tupou atu ei kotou ki raro i te reira: ko au ko to kotou Atua ra ko Iehova.

2 E akono kotou i taku au sabati, e akatapu oki i toku ngai-tapu ra: ko au ko Iehova.

3 Kia akono kotou i taku ra au akonoanga, e kia mou i taku au akauenga, e kia rave i te reira;

4 E oronga atu au i te ua na kotou i te tuatau tikai ra, e e kaiia to te enua; e e akaua mai te au rakau o te enua ra i to ratou ua.

5 E tae ta kotou pāpāanga sitona ki te akaputuputu anga vine, e tae roa oki te akaputuputu anga vine ki te ruru anga ua: e kai oki kotou i ta kotou kai ma te maata, e ka noo oki i to kotou enua ma te ora. 6 E naku e oronga atu i te au i to kotou na enua, e moe ua oki kotou, e kare rava oki tetai e akamataku mai ia kotou; e naku e akakore i te au puaka taae ra i te enua, e kare oki to kotou enua e taea e te koke. 7 E ka arumaki ua kotou i to kotou au enemi, e ka inga ratou i te koke ki mua ia kotou.

8 E ka arumaki nga tangata toko rima o kotou na i te tangata okotai anere, e okotai anere o kotou na, ka arumaki ia i te tangata okotai ngauru i te tausani: e ka inga to kotou au enemi i te koke ki mua ia kotou. 9 Ko kotou oki taku e kite, e akatupu au ia kotou, e ka akamaata roa ia kotou, e ka akatinamou au i taku koreromotu ia kotou.

10 E ka kai kotou i te kai takere ra, e ka apai oki i te mea takere ki vao kia o te mea ou.

11 E akatu au i toku puakapa i rotopu ia kotou: e kare toku Vaerua e akaviivii ia kotou.

12 E aaere oki au i rotopu ia kotou, ei Atua au no kotou, e ei tangata oki kotou noku.

13 Ko au to kotou Atua ra ko Iehova, ko tei arataki mai ia kotou mei te enua maira mei Aiphiti, kia kore kotou e riro ei tuikaa na ratou: e kua aati au i te tapeka o to kotou zugo, e kua akatiratiratu au ia kotou.

14 Kia kore ra kotou e akarongo mai kiaku, e kia kore e akono i teia katoa nei au akauenga;

15 E kia akavaavaa kotou i taku au akonoanga; e kia akaviivii to kotou au vaerua i taku au tuatua-tau, e kare e rave i taku katoa ra au akauenga, akaatikau iora kotou i taku ra koreromotu:

16 Pera tikai taku kia kotou i reira, Ka akamate atu au ia kotou ki te mataku; ki te ane kai roto, e te vera, ka pou ei te mata, e mamae ei te ngakau: e ruru puapinga kore ua kotou i to kotou au kainga ki te ua, na to kotou au enemi oki e kai. 17 Ka anaana atu toku mata ki runga ia kotou, e ka mate kotou ki mua i to kotou au enemi: e te aronga e makitakita ia kotou, ka riro ia no rungao ia kotou; e kare kotou e arumaki naia ka riro rai kotou i te ati ua.

18 E kia kore rai kotou e akarongo mai kiaku i reira, ka tataki itu rava atura au i to kotou mate i ta kotou au ara i reira.

19 E ka aati au i to kotou ngakau parau marokiakia na; e akariro au i te rangi i o kotou na mei te auri ra, e to kotou enua mei te veo:

20 Ka ope puapinga kore ua to kotou maroiroi: kare oki e tupu to te enua ra kai, e kare oki te au rakau o te enua na e akaua i to ratou ua. 21 E te vai tau kore ua rai to kotou aerenga iaku, e kare rai e akarongo mai kiaku nei; ka tataki itu atu rai au i te mate ki rungao ia kotou, kia tau ki ta kotou au ara.

22 Ka tono atu au i te puaka taae o te ngangaere i rotopu ia kotou, ka pou ta kotou au tamariki, e pou oki ta kotou au puaka i te reira, ka iti roa oki kotou; e to kotou au arataa ra ka meamea roa ia.

23 E kia kore rai kotou e āriki i te ako naku i reira, e aere rai kotou i te aerenga tau kore iaku ra;

24 E aere katoa ia au na te ara tau kore ia kotou i reira, e ka tataki itu atu rai au i te mate ki runga ia kotou i ta kotou au ara.

25 Ka apai atu au i te koke ki rungao ia kotou, e akaoko i te rave kino i te koreromotu naku ra: e kia putuputu kotou i roto i to kotou au oire, ka apai atu au i te maki-mate i rotopu ia kotou; e ka tukuia oki kotou ki te rima o te enemi. 26 Kia akakoreia e au i te turu ra i ta kotou kai, tino ngauru katoa puke vaine to te umu okotai kia tao i ta kotou areto, e kia akaoki mai i taua areto na kotou ra, e aite tikai ïa; ka kai ei oki kotou, e kare ra e merengo.

27 E kia kore kotou e akarongo mai kiaku i reira, e aere rai kotou i te aerenga tau kore iaku;

28 E na te ara tau kore katoa au ia kotou i reira ma te riri otooto; e tataki itu atu rai au i te mate ki runga ia kotou i ta kotou au ara.

29 Ka kai oki kotou i te kopapa o ta kotou tamariki tamaroa, e te kopapa o ta kotou uaorai au tamaine ka pou ïa ia kotou.

30 Ka pou to kotou au ngai teitei iaku, e tipuia e au to kotou au tiki rā, e akaruke au i to kotou au kopapa ki rungao i te au kopapa o to kotou au idolo, e ka akaviivii roa taku Vaerua ia kotou.

31 E ka taitaipakoko au i to kotou au oire, e akatanea oki au i to kotou au ngai-tapu, e kare oki au e ongi atu i ta kotou au rakau kakara ra. 32 E ka uritumuia e au te enua: e vavaria ïa e to kotou au enemi i noo i reira ra.

33 E akapueurikiriki ke au ia kotou i te pa enua; e arumaki au ia kotou ma te koke: ka tairipotiia to kotou enua, e ka tanea to kotou au oire.

34 E sabatiia to te enua i reira i te vai tanea ua anga, e tei te enua o to kotou au enemi kotou ra, e noo ua te enua i reira, e sabatiia tona.

35 I te vaoo tanea katoa anga e noo ua ïa; no te mea kare ona e noo ua anga i to kotou au sabati ra, ka noo ei kotou ra.

36 E to kotou e toe i te au enua o to ratou au enemi ra, e akangaevaeva au i to ratou ngakau, kia ati ua ratou i te ngaee o te rau rakau e peke i te matangi ra; ka ati oki ratou mei te ati i te koke ra; e ka inga ratou kare e tangata i te arumaki mai. 37 E ka inga ratou ki rungao ia ratou uaorai, mei te mea e kia mua i te koke, e kare oki e tangata i arumaki mai: e kare rava o kotou maroiroi e mou ei ki mua i to kotou au enemi.

38 E mate oki to kotou i roto i te au etene, e ka pou takiri kotou i te enua o to kotou au enemi.

39 E to kotou e toe i te au enua o to kotou au enemi ra, e kakao ua e mate atu i roto i ta ratou uaorai ara; e i roto rai i te ara a to ratou ai metua e kakao ua ratou e mate ua atu. 40 Kia aaki maira ratou i to ratou kino, e te kino o to ratou ai metua, e ta ratou ara i ara aï ratou iaku nei, i to ratau aerenga tau kore iaku nei;

41 I aere ei au i te aerenga tau kore katoa ia ratou, e i apai ei au ia ratou ki te enua o to ratou au enemi; kia taakaakaia to ratou ngakau peritome koreia i reira, e kua āriki ratou i te utunga i ta ratou ara:

42 E akamaara au i taku koreromotu ia Iakoba i reira, e i taku koreromotu ia Isaaka katoa, e i taku koreromotu ia Aberahama, taku katoa ïa e akamaara: e akamaara oki au i te enua ra,

43 I te enua i vaooia e ratou ra, e tei rauka tona au sabati i te vaoo tanea ua anga ra, kare ra ratou: kia āriki ratou i te utunga i ta ratou ara; no te mea kua akavaavaa ratou i taku au tuatua tau, e no te mea kua akaviivii to ratou vaerua i taku au akonoanga:

44 Ei reira rai i te vai ua anga ratou i te enua o to ratou au enemi, kare ra au e akaruke takiri ia ratou, kare oki toku akaviivii anga ia ratou e tae ki te akapou takiri roa ai ratou, e kia kore roa atu taku koreromotu ia ratou ra: ko au oki to ratou Atua ra ko Iehova.

45 No ratou ra, ka akamaara rai au i te koreromotu i to ratou ai tupuna, i taku i arataki mai mei te enua maira mei Aiphiti, i mua i te mata o te au etene, kia riro au ei Atua no ratou: ko au ko Iehova. 46 Ko te au akonoanga teia, e te au tuatua-tau, e te au ture, ta Iehova i akatau ko te tamariki a Iseraela tetai pae, i vaitata ki te maunga ra ko Sinai, i te rima o Mose ra.