Numero

12 E KUA tuatua kino iorā Miriama raua ko Aarona ia Mose, no te vaine ngati Kusa i tana i akaipoipo ra: kua akaipoipo oki aia i tetai vaine ngati Kusa ra.

2 Kua tuatua iora raua, Ia Mose anake ra ainei ta Iehova tuatua anga mai? Kare aina aia i tuatua ia taua katoa nei? Te akarongo mairā Iehova i taua tuatua ra. 3 E maru maata to taua tangata ra to Mose, i to te tangata ravarai o te ao katoa nei.

4 Kua tuatua viviki ua mairā Iehova kia Mose, e kia Aarona, e kia Miriama i reira, E aere mai kotou toko toru katoa ki roto i te Are uipaanga. Kua aere anake iora ratou toko toru.

5 Kua eke mairā Iehova ki raro i na roto i te pou tumurangi ra, tu iora i te ngutupa Are ra, kua kapiki maira kia Aarona raua ko Miriama; kua aere atura oki raua.

6 Kua tuatua maira aia, Ka akarongo mai ana i taku tuatua; E peroveta tetai i roto ia kotou, kua mātau au nei ko Iehova i te akakite iaku uaorai kiaia i roto i te orama, e i te tuatua kiaia i roto i te rika-moe. 7 Kare ra au i pera ki toku tavini nei kia Mose, ko tei akono meitaki i toku katoa nei ngutuare. 8 Te tuatua vaa ua nei au kiaia, ma te akakite ua; kare ïa i te tuatua poiri, kia kite pu aia i to Iehova tu: eaa i kore ei oki korua i mataku i te tuatua kino i toku tavini ia Mose?

9 Kua tupu akera te riri o Iehova ia raua; riro atura aia.

10 Aere ka atura taua tumurangi i runga i te Are ra; e i na, kua leperaia iorā Miriama, mei te kiona ra te teatea: kua akara iorā Aarona ia Miriama, e i na, kua leperaia. 11 Kua tuatua mairā Aarona kia Mose, Aue, e taku pu e, teia taku tuatua kia koe, auraka taua ara i rave manako kore uaia e maua nei, e i araʼi maua nei, e vaooia ki runga ia maua: 12 Auraka aia nei kia riro mei te tamaiti mate, i te anau anga mai mei roto mai i te kopu o te metua vaine, kua pou takere ana tetai pae o te kiko. 13 Kua kapiki aturā Mose kia Iehova, na ko atura, E akaora koe iaia i teianei, e te Atua e, ko taku ïa tuatua ia koe.

14 Kua tuatua mairā Iehova kia Mose, Naringa i tutua ana tona metua tane i te uavare ki tona mata, kare ainei aia e akaakama e kia po itu ake? Kia akataka keia aia ki vao mai i te puakapa e kia po itu, e ka oki mai ïa aia i reira.

15 Akatakaia iorā Miriama ki vao mai i te puakapa, e po itu akera: e kare taua aronga ra i aere, kia oki mai a Miriama.

16 E muri akera aere maira taua aronga ra mei Hazerota mai, e kua patia iora i te puakapa i te medebara ra i Parana.