2 Paraleipomeno

30 KUA tono akerā Hezekia i te karere kia Iseraela ravarai e kia Iuda, e kua tata i te leta kia Epheraima raua ko Manase, e aere mai ratou ki te are o Iehova i Ierusalema, e akono i te pasa a te Atua o Iseraela a Iehova.

2 Kua oti oki i te uruoa anga tuatua a te ariki, e te ui mataiapo, e te uipaanga katoa, i Ierusalema, e akono i taua pasa ra kia tae ki te rua o te marama.

3 Kare akera oki i tika ia ratou kia akono i taua tuatau ra, no te mea kare i rava te kau taunga tei akatapu ia ratou uaorai, kare oki i ope meitaki mai te au tangata ki Ierusalema.

4 Tika meitaki akera taua tuatua ra i te mata o te ariki, e i te mata o te uipaanga katoa ra.

5 Kua akakoro akera ratou e tutu aere ia Iseraela katoa ra, i Bere-seba e tae ua atu kï Dana ra, e aere mai ratou e akono i te pasa na te Atua o Iseraela na Iehova, i Ierusalema ra: kua roa oki to ratou akono kore anga i tei tataia mai.

6 Kua aere iora te au karere ma te leta na te ariki e na te ui mataiapo e pini ua ake Iseraela e Iuda ra, ma te akaue a te ariki, i te na ko anga atu e, E te au tamariki a Iseraela e, e anga akaou mai kia Iehova ki te Atua o Aberahama, no Isaaka, e no Iseraela, e nana e oki mai ki te toenga o kotou i tei ora i te rima o te ui ariki o Asura ra.

7 Auraka oki kotou kia arite ki to kotou ai metua, e to kotou ai taeake, ko tei rave i te ara i te Atua o to ratou ai metua ia Iehova, i akaruke ei aia ia ratou kia tanea, ta kotou oki e kite ra.

8 E tenana, auraka e akapaketaketa i to kotou kaki, mei to kotou ai metua ra; e oronga mai kotou i te rima kia Iehova, ka tomo ei ki tona ngai-tapu, i akatapuia e ia ra e tuatau ua atu; ka akamori ei i to kotou Atua ia Iehova, kia akaanga ke oki aia i tona riri maata ia kotou.

9 Kia anga mai oki kotou kia Iehova, ka aroaia mai to kotou ai taeake, ma ta kotou au tamariki, e te aronga i tuikaaʼi ratou ra, ka tae akaou mai oki ratou ki te enua nei: e takinga-meitaki oki to kotou Atua to Iehova e te aroa, kare oki aia e anga ke i tona mata ia kotou, kia oki mai kotou kiaia.

10 Kua aere iora aua nga karere ra ki tera oire, ki tera oire, na te enua ra ko Epheraima, e Manase, e tae ua atura ki Zebuluna: kua kata aviriia maira ratou, e kua taitoitoia maira.

11 Ko tetai pae ra o Asera, e to Manase, e to Zebuluna, kua taakaaka ia ratou uaorai, e kua aere maira ki Ierusalema.

12 Kareka ko Iuda, kua oronga mai te rima o te Atua i te ngakau okotai i te akono i te akauenga a te ariki e ta te ui mataiapo, ta Iehova oki i tuatua maira.

13 E aronga maata tei putuputu mai i Ierusalema e akono i te oroa kai akaopue kore, i te rua o te marama, e uipaanga maata ua atu.

14 Kua tu akera ratou, e kua apai ke atura i te au atarau i Ierusalema, e te au atarau atinga kakara ravarai, kua apai ke atura, e kua akaruke ki raro i te kauvai ra i Kiderona.

15 E tae akera ki te rā okotai ngauru ma a ra i te marama rua, i ko ei ratou i te pasa: akama akera te kau taunga e te au ngati Levi, e kua akatapu iora ia ratou uaorai, e kua apai mai i te au atinga karakaratio ki roto i te are o Iehova.

16 Kua tu ua maira ratou i to ratou turanga tikai, i tei akakiteia mai, tei tau ki te ture a te tangata o te Atua ra a Mose: kua pîpî atura te kau taunga i te toto, i tukuia mai e te rima o te ngati Levi ra.

17 E manganui oki to roto i taua uipaanga ra, kare i akatapuia: i tukuiaʼi te ko i te pasa ra ki te ngati Levi, i te aronga katoa kare i mā ra, kare i akatapuia no Iehova.

18 E manganui oki te tangata, to Epheraima, e to Manase, to Isakara, e to Zebuluna, kare ïa i tamā ia ratou uaorai, kua kai rai ratou i te pasa, tei kore oki e tau i tei tataia maira. Kua pure rā Hezekia ia ratou, na ko atura, Na te Atua meitaki ra na Iehova e akakore mai i te ara,

19 A te aronga i akonokono i to ratou ngakau i te kimi i te Atua, i te Atua o to ratou ai metua ia Iehova, kore ua ratou i tamāia i te tamā e tau ki te ngai-tapu nei.

20 Kua akarongo aturā Iehova ia Hezekia, e kua akaora akera i te au tangata ra.

21 Kua akono atura te tamariki a Iseraela i tae mai ki Ierusalema i te oroa kai akaopue kore ra ma te rekareka maata, e po itu akera: kua akameitaki te au ngati Levi e te kau taunga ia Iehova, i tera rā i tera rā, ma te au mea i tangi nui ia Iehova ra.

22 Kua tuatua akamaru mairā Hezekia ki te au ngati Levi i akakite i te kite meitaki ia Iehova; kua ki iora ratou i taua oroa ra e ope rava ake nga rā e itu ra, ma te apai i te atinga au, e te aaki anga atu i te ara ki te Atua o to ratou ai metua kia Iehova.

23 Kua uruoa katoa taua aronga maata katoa ra e akono ïa i nga rā kia itu mairai; e kua akono oki ratou i taua oroa ra ka itu akera oki rā ma te rekareka.

24 Kua apai atura oki te ariki o Iuda ra ko Hezekia i te au puakatoro okotai tausani, e te au mamoe oki e itu tausani, na te uipaanga tangata; e na te au mataiapo i oronga i te au puakatoro okotai tausani, e te au mamoe oki okotai ngauru i te tausani, na te uipaanga: e manganui te kau taunga i akatapu ia ratou uaorai.

25 E te uipaanga katoa i Iuda ra, e te kau taunga, e te ngati Levi, e te uipaanga katoa i aere mai no roto ia Iseraela, e te au tangata ke mei roto mai i te enua o Iseraela, e tei noo katoa i Iuda, kua rekareka ïa.

26 E rekareka maata tei Ierusalema: mei ia Solomona te tamaiti a Davida ariki no Iseraela mairai, kare ïa e aite i Ierusalema nei.

27 Kua tu maira te kau taunga, te ngati Levi, e kua akaora i te au tangata: e kua akarongo mairā Iehova i to ratou reo, e kua tae rava ta ratou pure ki te nooanga tapu nona i te rangi ra.