Iosua

14 TEIA te au motia i nooia e te tamariki na Iseraela i te enua ra ko Kanaana, ta Eleazara taunga e ta Iosua te tamaiti a Nuna, e te au mataiapo tutara o te au kopu o te tamariki a Iseraela, i tua ei nooanga no ratou;

2 Ko ta nga kopu toko iva e ta te kopu veenga i te tuanga i tua keleroia, ta Iehova oki i akaue mai ia Mose ra.

3 Kua oti oki ta nga kopu toko rua ra e ta te kopu veenga ra tuanga i te orongaia e Mose i tetai pae Ioridana: kareka te ngati Levi ra, kare a ratou tuanga enua i orongaia e ia i roto ia ratou.

4 Toko rua oki kopu to te au tamariki a Iosepha ra, to Manase e to Epheraima, kare akera ratou i apai i tetai tuanga na te ngati Levi i taua enua ra, mari ra i te au oire ei nooanga, ma te au kainga i vao ake, no ta ratou au puaka, e ta ratou apinga katoa.

5 Ko ta Iehova i akaue mai ia Mose ra, ko ta te tamariki a Iseraela ïa i rave, e te tua ra ratou i taua enua ra.

6 Kua aere maira te tamariki a Iuda kia Iosua i Gilagala ra; e kua karanga aturā Kaleba te tamaiti a Iephune ngati Kenaza ra kiaia, Kua kite koe i te tuatua ta Iehova i tuatua maira kia Mose, ki te tangata no te Atua ra, ia taua i Kadesa-barenea ra.

7 Kua tae au ki te a i te ngauru anga o toku mataiti, ka tono ei te tavini o Iehova ra ko Mose iaku mei Kadesa-barenea atu e tutaka aere i te enua; e kua apai mai au i te tuatua kiaia ra, ko te manako ïa o toku ngakau.

8 Kareka toku au taeake, tei aere katoa matou ra, kua akataitaia ïa i te ngakau o te tangata: kua aru totomapu tikai ra au i toku Atua ra ia Iehova.

9 E kua taputou iora oki a Mose i taua rā ra, na ko maira, Ka riro tikai te enua i takatakaiia e to vaevae na ei nooanga noou, e no to tamariki e tuatau ua atu; no te mea kua aru totomapu tikai koe i toku Atua ra ia Iehova.

10 E teianei, i na, kua akaoraia au e Iehova i tana oki i tuatua maira, e mei taua tuatua anga mai a Iehova kia Mose i taua tuatua ra, ka a akenei ïa ngauru anga i te mataiti e rima ara, i to Iseraela aaere ua anga i te medebara; e teianei, i na, ka varu akenei ngauru anga o toku mataiti e rima ara i teianei rā.

11 Te vai nei rai toku maroiroi ko te tu rai te tu i teianei rā, e mei tei te rā ka tono ei a Mose iaku ra; taua maroiroi noku i reira ra, ko toku rai ïa maroiroi i teianei, no te tamaki ra, e te aere ki vao, e te oki katoa mai ki roto.

12 E teianei e o mai i teianei maunga noku, ta Iehova oki i tuatua mai i taua rā ra, kua akarongo katoa oki koe i taua rā ra. E ngati Anaka i reira ra, e maata oki te au oire, e te araiia i te patu; tei vaitatā Iehova iaku ra, ka eke ia ratou iaku, mei ta Iehova i tuatua maira.

13 E kua akaora mairā Iosua iaia; e kua oronga maira aia ia Heberona no Kaleba te tamaiti a Iephune ra ei nooanga.

14 Riro atura Heberona ei nooanga no Kaleba te tamaiti a Iephune ngati Kenaza ra, e tae ua akenei ki teianei rā, no te mea kua aru totomapu tikai aia i te Atua o Iseraela ia Iehova.

15 E te ingoa taito o Heberona nei ko Kiriata-araba ïa; e tangata maatā Araba i o te ngati Anaka ra. Kore akera te tamaki i te enua ra.