1 Ariki
4 RIRO aturā Solomona ei ariki no Iseraela katoa.
2 Teia oki te aronga mamaata nona ra; Ko Azaria, te tamaiti a Zadoka taunga ra,
3 Ko Eliorepha raua ko Ahia, nga tamariki a Sisa, e tata tuatua ïa: ko Iehosaphata te tamaiti a Ahiluda, ko te akakite tuatua ïa:
4 E ko Benaia te tamaiti a Iehoiada, tei runga ïa i te nuku ra: e ko Zadoka e ko Abiatara, ko nga taunga ïa:
5 E ko Azaria te tamaiti a Natana, tei runga ïa i te aronga i akataoongaia; e ko Zabuda te tamaiti a Natana, ko te tangata ïa e maata, e oa tikai oki no te ariki:
6 E ko Ahisara, tei runga ïa i te ngutuare; e ko Adonirama te tamaiti a Abada, tei runga ïa i te apinga uipa.
7 Tino ngauru ma rua o Solomona aronga i akataoongaia i runga ia Iseraela katoa, ko tei roi i te kai na te ariki e tona katoa ra ngutuare: ko te tangata ko tona marama i tona mataiti i te roi anga i te kai.
8 Teia to ratou ingoa ra: ko te tamaiti a Hura, i te maunga ra ko Epheraima:
9 Ko te tamaiti a Dereka, i Makaza, e Salabima, e Bete-semesa, e Eloni-betehanana:
10 Ko te tamaiti a Heseda i Arubota; tei iaia ko Soko, e te tapere katoa ra ko Hephera:
11 Ko te tamaiti a Abinadaba, i te tapere katoa ra ko Dora; tei iaia te tamaine a Solomona ko Taphate, ei vaine nana:
12 Ko Baana te tamaiti a Ahiluda; tei iaia Taanaka, e Megido, e ko Bete-seana katoa, i vaitata i Zaretana i raro ake i Iezereela, mei Bete-seana e tae ua atu ki Abela-mehola e topa maira Iokemeama:
13 Ko te tamaiti a Gebera, i Ramota-gileada; tei iaia oki te au oire ra o Iaira te tamaiti a Manase ra, i Gileada ra; tei iaia oki te tapere ra ko Aragoba, i Basana ra, e ono katoa ngauru anga i te oire maata, ma te patu e te tea veo ra:
14 Ko Ahinadaba te tamaiti a Ida, tei iaia Mahanaima:
15 Tei Naphatali a Ahimaaza; e kua rave atura aia i te tamaine a Solomona ia Basemata ei vaine nana:
16 Ko Bana te tamaiti a Husai, tei Asera, e tei Alota:
17 Ko Iehosaphata te tamaiti a Parua, tei Isakara:
18 Ko Simei te tamaiti a Ela, tei Baniamina:
19 Ko Gebera te tamaiti a Uri, tei te motia ra, tei Gileada ïa, tei te enua o Sihona ariki o te ngati Amori, e tei te enua o te ariki o Basana ko Oga; e tera rai tetai tutara tei te enua.
20 Ko Iuda, e ko Iseraela, e aronga maata ïa, mei te one taatai ra ïa i te maata, i te kai anga e te inu anga, e te akarekareka anga ia ratou.
21 Tei ia Solomona te au i te pa enua katoa, mei te vai mai e tae ua atu ki te enua o te Philiseti, e tae ua atu ki te pae i Aiphiti ra: kua apai mai ratou i te apinga, e kua tavini iora ratou ia Solomona, e ope rava akera tona au rā i te ora anga nei.
22 Ko ta Solomona kai i te rā okotai ra, e toru ïa ngauru kora faraoa meitaki rava, e ono ngauru kora faraoa akakino ake;
23 Okotai ngauru puakatoro matu ra, e rua ngauru puakatoro aere ua, okotai anere mamoe, e te aili, e te zabi, e te kemura, e te moa akamatuia ra.
24 Tei iaia anake oki te au i te enua katoa i teia pae vai, mei Tiphesa e tae ua atura ki Gaza, e te au ariki katoa i teia pae vai; e au oki tona i tona au tavini ravarai e pini ua ake.
25 Noo ua iora Iuda raua ko Iseraela ma te au, ko te tangata katoa i raro ake i tana vine, e tana suke, mei Dana mai e tae ua atura ki Bereseba, e ope rava akera to Solomona au rā.
26 E a ngauru tausani a Solomona vairanga oroenua no te au kariota nona, okotai ngauru ma rua i te tausani i te au tangata akaoro oroenua.
27 E na taua au rangatira ra i kimi i te kai na te ariki ra na Solomona, e na te aronga katoa i tae mai ki te kaingakai a te ariki a Solomona, ko te tangata ko tona marama, kare rava e ape toe.
28 E te kerite e te mauku na te au oroenua, e te au bekare, tei apaiia e ratou ki te ngai i nooia e te aronga rangatira ra, ko te tangata ko tana, ko te tangata ko tana.
29 Kua oronga mai te Atua i te karape, e te kite, kia Solomona, e mea maata roa, e te maoraora maata o te ngakau, mei te one taatai ra.
30 Maata rava atura to Solomona karape i to te aronga katoa i te itinga o te rā ra, e to Aiphiti katoa ra.
31 Maata rava atura tona karape i to te tangata ravarai; i to Etana i Ezera, e to Hemana, e to Kalakola, e to Darada, nga tamariki a Mahola: tutuki atura tona rongo e pini ua ake te pa enua ravarai.
32 E toru tausani ana maseli i tuatua: okotai tausani ana peʼe e rima ara.
33 Kua tuatua oki aia i te rakau, mei te arezi i runga ia Lebanona, e tae ua atu ki te isopa e tupu i runga i te patu ra: e kua tuatua oki aia i te au puaka, e te au manu, e te au mea e totoro aere ua ra, e te ika.
34 Kua aere mai oki te tangata ravarai e akarongo i te tuatua pakari a Solomona, no ko i te ui ariki katoa o te enua nei, ko tei akarongo i te tuatua karape nana ra.