Mika

2 E AE oki te aronga i kimi i te ara, e tei rave i te kino, i runga i to ratou au roi; i te mārama anga i te popongi kua rave ratou i te reira, no te mea e tika i to ratou rima kia rave.

2 Kua inangaro oki ratou i te au kainga, e kua āru ua, e te au are, e kua rave iora: e kua takinga-kino ratou i te tangata ma tona ngutuare, te tangata oki ma tona kainga ipukarea.

3 E teianei, te na ko mairā Iehova, I na, te akakoro nei au i te kino i taua kopu-tangata ra, kare e tika ia kotou kia kiriti i to kotou kaki mei roto i te reira, kare oki kotou e aaere ma te nengonengo; e riro oki te reira e tuatau kino.

4 I taua rā ra ka tumu ei tetai i te amu ia kotou, ka peʼe oki i te peʼe aue maata, i te na ko anga e, Kua pou takiri tatou: kua kave keia te tuanga o toku ra au tangata: eaa oki aia i apai ke i te reira iaku nei! kua tua aere aia i to tatou au kainga no tei kotoe ki muri.

5 E teianei, kare tetai e toe ia koe ra, ko tei tataki i te tataura kelero, i te uipa anga o Iehova ra.

6 Auraka kotou e totou; na ratou e totou, te ka kore e totou i taua au mea nei: kare oki e akapaki i te akakino.

7 Eaa ïa tuatua, e te ngutuare o Iakoba e! kua apikepike ainei te Vaerua o Iehova? nana ainei teia i rave? kare ainei e meitaki i rauka i taku nei tuatua i te tangata aerenga tiratiratu ra?

8 Kua tu mairai oki toku ra au tangata mei te enemi mei ito mai: te kiriti nei kotou i te kakau momono, ma te kakau pu katoa, no runga ia ratou e aere ua ma te au, no runga oki ia ratou e oki mai mei te tamaki anga ra.

9 Te kika nei kotou i te au vaine o toku nei au tangata i to ratou au are memeitaki ra: e te akangere nei kotou i ta ratou au tamariki i toku nei kakā e tuatau ua atu.

10 Ka tu kotou e ka aere; kare oki teia i te akaangaroianga: no te mea kua viivii ïa, e riro ïa i te akapou ia kotou; e e pou maata ua atu te reira.

11 Kia aere au tetai tangata ma te manako pikikaa, ka tuatua pikikaaʼi i te na ko anga e, E totou au ia koe i te wina e te kava kona, koia te peroveta na teianei au tangata.

12 E akaputuputu katoatoa tika rai au ia koe, e Iakoba e; e akaputuputu tika rai au i te toenga o Iseraela; e kave au ia ratou ki te ngai okotai mei te au mamoe i Bozara, mei te anana i roto i ta ratou one kai; e varakau pu au ratou i te rai o te tangata.

13 Kua aere atura te vavaʼi na mua ia ratou, kua vavaʼi ratou, e kua na te ngutupa i te aere, kua na reira i te tomo ki vao: kua na mua to ratou ariki ia ratou, koia oki a Iehova, ko to ratou ïa arataki.