Luka

23 KUA tu anake akera taua aronga maata katoa ra ki runga, arataki atura iaia kia Pilato ra.

2 Kua tapepe atura ratou iaia, na ko atura, Kua kite akenei matou i teianei tangata i te taruri ke anga i teianei enua, e te akakore anga i te tautaūnga na Kaisara, i te tuatua anga iaia uaorai e, ko te Ariki ra aia, ko te Mesia.

3 Kua ui mairā Pilato kiaia, na ko maira, Ko te Ariki ainei koe o te ngata Iuda? Kua karanga atura aia, Koia tika taau i tuatua mai ana.

4 Kua karanga aturā Pilato ki te kau taunga nunui ra, e ki te tangata tini ra, Kare rava e ara i kitea e au i teianei tangata.

5 Maata rava atura to ratou māro, e te na ko anga atu, Te taoriori nei aia i te tangata i te tuatua tana e apii i Iudea katoa, mei Galilea mai, e tae rava mai nei i teianei ngai.

6 E akarongo akerā Pilato i te ingoa Galilea, kua ui akera aia, No Galilea ainei taua tangata nei?

7 E kite akera aia e no to Heroda pae enua aia, kua tono atura aia iaia kia Heroda ra, tei Ierusalema katoa aia i reira.

8 Mareka rava akerā Heroda i te kite anga atu ia Iesu: kua roa oki tona inangaro kia kite iaia, no te mea e tuatua maata tana i akarongo iaia, e i manako aia kia kite i tetai akairo i te rave angaia e ia.

9 Kua ui maira aia e manganui te ui anga; kare rava ra aia i ki atu kiaia.

10 Te tapepe tamou nui marie maira te kau taunga nunui ra, e te au tata tuatua, iaia.

11 Kua akavaavaa mairā Heroda e tona au vaeau iaia, aviri maira, akakakau maira iaia i te kakau inuinu, e kua akaoki maira iaia kia Pilato.

12 Ongi iorā Pilato raua ma Heroda i taua rā ra, i noo enemi ua ana raua i muatangana.

13 E oti akera te kau taunga nunui, te au akava, e te tangata tini, i te akaputuputuia e Pilato,

14 Kua karanga atura aia kia ratou, I arataki mai ana kotou i teianei tangata kiaku nei, mei te mea e, i taruri keia te enua e ia: e i na, i kimi io nei oki au iaia i mua i to kotou aroaro, e kare rava ana e ara i kitea e au, i te au mea katoa ta kotou e tapepe iaia nei:

15 E kare katoa oki i kitea e Heroda; kua tono oki au ia kotou kiaia ra; e i na, kare rava ana ara i rave e tau ei iaia te mate.

16 E teianei e pāpā au iaia, ka tuku ua atu ei.

17 E tuku oki aia i tetai i taua oroa ra e tikaʼi.

18 Kua kapiki tai atura ratou ravarai, na ko atura, E akaruke atu koe i tena, ko Baraba taau e tuku mai:

19 No te kaitamaki i taua oire ra, e no te ta tangata, i uriiaʼi aia ki roto i te are tapekaanga.

20 Kua tika ra ia Pilato i te tuku ia Iesu, e kua tuatua akaou maira kia ratou.

21 Kua kapiki ua atura ra ratou, na ko atura, E akasatauro i tena, e akasatauro.

22 Kua tuatua maira aia kia ratou, ko te toru ïa i te tuatua anga mai, Eaa oki tana ara i rave? kare oki ana ara i kitea e au, e tau ei iaia te mate: e pāpā ua atu au iaia, ka tuku atu ei.

23 Māro atura ratou ma te varakau, i te pati anga atu kia akasatauroia aia. Tupu atura taua anoano no ratou ra, e no te kau taunga nunui ra.

24 Kua akatika mairā Pilato i ta ratou i anoano ra.

25 Kua tuku maira aia kia ratou i taua tangata i tapekaiaʼi no te kaitamaki e te ta tangata i ta ratou i pati ra; kua tuku maira ra ia Iesu i ta ratou i anoano ra.

26 E tei te arataki anga atu ratou iaia, kua opu atura ratou i tetai tangata, te aere maira mei uta mai, no Kurene, ko Simona te ingoa; kua tuku atura ratou i te satauro i rungao iaia, nana e apai atu na murio ia Iesu.

27 E urupu maata tei aru atu iaia, e te au vaine i te aue anga e te iriea anga iaia.

28 Kua ariu maira rā Iesu kia ratou, kua na ko maira, E te au tamaine no Ierusalema nei, auraka e aue iaku, ka aue ra ia kotou uaorai, e i ta kotou tamariki.

29 I na oki, te vaitata maira te tuatau, e tuatuaʼi ratou e, E ao to te pa, e te kopu kare i anau, e te u kare i ngoteia.

30 Ei reira ratou e tuatuaʼi ki te au maunga, E topa mai ki rungao ia matou; e ki te au tuaivi ra, E tapoki mai ana ia matou.

31 Ko te ravenga oki teia i te rakau mata nei, akapeeaia ra te marō?

32 E ko e toko rua oki puke tangata tuatua kino, tei arataki katoaia ra e ta.

33 E tae atura ratou ki te ngai i tuatuaia ra e, ko Kalavaria, akasatauro iora ratou iaia i reira, e nga tangata rave tuatua kino ra, i te rima katau tetai, i te rima kaui oki tetai.

34 Kua karanga aturā Iesu, E taku Metua, e akakore mai koe i ta ratou ara, kare oki ratou i kite i ta ratou i rave nei. Kua tua kelero iora ratou i tona kakau.

35 Te tu ua ra te tangata tini, te akara ua atura. Kua aviri katoa maira te au tutara, e te tangata katoa, iaia, na ko akera, Ko etai ke ra tana i akaora; ko te Mesia aia, te mea ikiia e te Atua ra, ka akaora aia iaia uaorai.

36 Kua aviri katoa maira te au vaeau iaia, aere maira e apai mai i te vinega nana,

37 Na ko maira, Te ariki koe o te ngati Iuda ra, ka akaora ana ia koe uaorai.

38 Kua tataia iora tetai tuatua i rungao iaia, e leta Eleni, e te Roma, e te Ebera, KO TE ARIKI TEIA NO TE NGATI IUDA.

39 Kua akakino akera oki iaia tetai i aua puke tangata rave tuatua kino ra i akasatauro katoaia, na ko akera. Ko te Mesia koe ra, ka akaora ia koe uaorai, e ia maua katoa oki.

40 Kua kauvae maira ra tetai, na ko maira, Kare oou mataku i te Atua, te mate katoa oki koe okotai rai tu?

41 Kua tika oki to taua nei mate; ko te tutaki oki teia i ta taua i rave ra: kareka teianei tangata, kare rava ana tuatua kino.

42 Kua karanga atura aia kia Iesu, E te Atu, e akamaara mai koe iaku, kia tae koe ki toou basileia.

43 Kua tuatua mairā Iesu kiaia, Koia mou taku e karanga atu kia koe nei, ei Paradaiso taua katoa i teianei rai rā.

44 E tu ora ono atura, ko te poiri iora ki runga i taua enua katoa ra, e tae rava akera ki te ora iva.

45 Akapoiriia iora te rā, e ngaae rava akera a rotopu i te paruru i te nao ra.

46 Kua kapiki aturā Iesu ma te reo maata, na ko atura, E taku Metua, te tuku atu nei au i toku vaerua ki to rima na: e oti akera taua tuatua ra, tuku atura i te vaerua.

47 E kite akera te rangatira anere i taua mea ra, akameitaki atura i te Atua, na ko atura, E tangata tuatua-tika tikai teia.

48 E te tangata tini ravarai ko tei aere mai e akara ra, kite akera i te tu tikai i taua mea i raveia ra, oki anake atura ma te papaki i to ratou umauma.

49 E te au tangata katoa i kite iaia ra, e te au vaine i aru mai iaia, mei Galilea maira, tu ua atura ïa i te atea ke i te akara ua anga mai i taua au mea ra.

50 E i na, tetai tangata tumu korero, ko Iosepha te ingoa; e tangata meitaki, e te tuatua-tika:

51 Kare aia i akatika i te tuatua a tetai pae, e ta ratou i rave ra: no Arimatea aia, e oire no te ngati Iuda: e te tapapa katoa ra aia i te basileia o te Atua.

52 Aere atura taua tangata ra kia Pilato, e pati atura i te kopapa o Iesu.

53 Kua tuku iora ki raro, vaî iora ki te kakau, e tuku atura ki roto i te tanumanga i paoia ki roto i te mato ra, kare ua e tangata i vaioia i reira.

54 Ko te rā akamanea anga te reira, te vaitata maira te sabati.

55 E taua au vaine ra, tei aru katoa mai iaia mei Galilea maira, aru atura ia Iosepha, akara atura i taua tanumanga ra, e te tu o te vaio angaia te kopapa nona ra.

56 E kia oki maira ratou, akateateamamao iora i te rakau kakara, e te manongi, e akaangaroi iora i te sabati i tei akaueia maira.