Iobu

2 E TAE akera ki tetai rā, kia aere mai te au tamariki a te Atua e akakite ia ratou uaorai kia Iehova, kua aere katoa mairā Satani i rotopu ia ratou, e akakite iaia uaorai kia Iehova.

2 E kua karanga aturā Iehova kia Satani, Mei ea mai koe? E kua tuatua mairā Satani kia Iehova, na ko maira, Mei te oriori anga i te enua nei, e te aaere ua anga i reira.

3 E kua karanga aturā Iehova kia Satani, Kua akamaara ainei koe i toku tavini ia Iobu, kare ona e aite ki runga i te enua nei, e tangata apa kore, e te tiratiratu, i te mataku anga i te Atua, e te akaruke anga i te kino? e te tāpu ua nei rai aia i tana akonoanga, akakoko ua mai ei koe iaku kia rave ara kore ua atu au iaia kia mate.

4 Kua tuatua mairā Satani kia Iehova, e kua na ko maira, Ei kiri no te kiri, e riro oki ta te tangata katoa ra ei oko i tona ora.

5 Kia akatika ua atura koe i to rima i tenana, ka rave atu ei i tona ivi e tona kiko, kare aia e kore i te akakino ia koe ki mua i to mata.

6 E kua karanga aturā Iehova kia Satani, I na, tei to rima ïa aia; auraka ra koe e rave i tona ora.

7 Aere aturā Satani mei te aroaro atu o Iehova, e kua ta atura ia Iobu ki te ee mamae, mei tona tapuae e tae ua atu ki tona take upoko.

8 Kua rave iora aia i tetai vaanga kapu karaea ei raraku iaia uaorai; e kua noo iora ki raro i roto i te reu.

9 Kua, karanga atura tana vainei kiaia, Te tāpu ua nei koe i taau akonoanga? ka akakino atu i te Atua, ka mate atu ei.

10 Kua tuatua maira aia kiaia, Te tuatua nei koe mei tetai o te au vaine neneva e tuatua ra. E āriki ainei tatou i te meitaki mei ko mai i te Atua, e auraka tatou e āriki katoa i te kino? Kare rai te vaa o Iobu i ara i teia katoa nei au mea.

11 Kia akarongo akera nga oa o Iobu toku toru ra i taua au kino katoa i rokoia mai ei aia ra, kua aere anake maira ratou mei to ratou uaorai ngai maira; Ko Eliphaza ngati Temana, e ko Biladada ngati Sua, e ko Zophara i Naama: kua akakoro oki ratou ravarai e aere mai e tangi iaia, e akapumaana oki iaia.

12 E nānā akera ratou i o ratou mata i te atea ke, kare i kite e koia, kua akateitei akera to ratou reo, kua aue iora; e kua aeae iora ratou ravarai i te kakau tonao tonao, e kua titiri akera i te one-pueu ki runga i te rangi e topa maira ki runga i to ratou mimiti.

13 Kua nonoo katoa ratou ma ia katoa ki raro i te one, e itu akera po e itu oki ao, e kare rava tetai i ki ua atu kiaia: te kite ra oki ratou e, e tumatetenga maata tona.