Amosa

6 E MATE oki to tei noo ponuiaau ua i Ziona, e to tei irinaki ki te maunga i Samaria; ko tei tapaia i te ingoa o te aronga nunui o te pae enua ra, e te aere nei te ngutuare o Iseraela kia ratou.

2 E aere atu kotou ki Kalane, e e akara; e mei reira oki ka aere atu ei ki Hamata maata ra; ka aere katoa oki ki raro ki Gata o te Philiseti: te meitaki ra ainei ïa i teianei au basileia? te maata ra ainei to ratou kotinga i to kotou ra kotinga?

3 E ae oki kotou to tei akamamao ke atu i te ra kino ra, e ko tei akavaitata mai i te nooanga o te akareionga ra;

4 Ko tei moe ki runga i te roi nio elephana, e tei akāvai ki runga i to kotou nooanga roroa ra; ko tei kai i te au punua mamoe no roto i te anana ra, e te au punua puakatoro no roto i te akaangai anga ra;

5 Ko tei tioro ki te tangi o te nabala; mei ia Davida, ko tei kimi i te au mea akatangiia ra no ratou uaorai;

6 Ko tei takumete kia inu i te wina ra, e kua akatainu ia ratou uaorai ki te manongi meitaki ra; kare ra ratou i aue i te mate o Iosepha.

7 E teianei, ko ratou ana te ka riro ei tuikaa, i te aronga katoa e riro ei tuikaa, e te aronga maeva-kata ko tei akāvai ki raro ra, e riro ke ïa.

8 Kua taputou te Atu ra ko Iehova iaia uaorai, te tuatua mai ra te Atua Sabaota ra, ko Iehova, Te viivii nei au i te nengonengo o Iakoba, e e mea riri naku te au are ariki nona ra: e teianei, e tuku atu au i taua oire ra, e to roto katoa ra.

9 E riro oki kia toe uaorai nga tangata tino ngauru ki roto i te are okotai, ka mate rai ratou.

10 E na tona taeake oki, na tei tutungi iaia ki te ai, e rave iaia, e apai i te au ivi ki vao mai i te are ra; nana oki e karanga atu kiaia i tei te pia i roto roa i taua are ra, E tangata ainei tei ko na ia koe na? e nana e tuatua mai, Kare ua. Ei reira aia ka karanga atu ei, Kia muteki na; no te mea kare e tika kia taiku i te ingoa o Iehova.

11 I na oki, kua akaueia e Iehova, e ka ta aia i te au are nunui kia ngaoro, e te au are rikiriki kia ngaangaa.

12 E oro ainei te oroenua na runga i te mato? e tika ainei kia arote i te reira ki te puakatoro? kua akariro ra kotou i te tuatua-tau ei kavangu, e te ua o te tuatua-tika ra ei rakau maamaa.

13 E kotou tei rekareka i te mea puapinga kore e, ko tei karanga e, Kare ainei matou i opu i te tara no matou uaorai, i to matou uaorai ririnui?

14 I na ra, e akatupu au i tetai enua ei rave ia kotou, e te ngutuare o Iseraela, te tuatua maira te Atua Sabaota ra ko Iehova; e na ratou e akareionga mai ia kotou, mei te tomoanga i Hamata ra e tae rava atu ki te kauvai i te medebara ra.