Ezekiela

31 E TAE akera ki te mataiti okotai ngauru ma tai, i te toru o te marama, e te rā mua o taua marama ra, i tae mai ei te tuatua a Iehova kiaku nei, na ko maira,

2 E te tamaiti a te tangata na, e karanga atu ki te ariki o Aiphiti ra kia Pharao, e te tini nona ra; Kua aite koe kiaai i te maata?

3 I na, e arezi i Lebanona ko Asura ma te rara manea, e te marumaru, e te teitei i te turanga; e tona tamoko, tei rotopu ïa i te au atava patapatatue ra.

4 Na te vai aia i akamaata, na te vai oonu aia i akateitei ki runga roa, ma tona au kauvai i te taʼe aere anga na tona tanuanga e pini ua ake, e kua tuku maira i tona au peka vai ki te au rakau katoa o te kainga ra.

5 I akateiteiiaʼi tona roa ki runga, e kua tu ke i te au rakau katoa o te kainga ra, e kua akamaataia tona au rara, e kua tupu oki tona au atava i te roa i te rai o te vai i tona toro anga atu.

6 I roto i tona au rara te au manu katoa o te reva nei i te koanga anga, e i raro ake i tona au atava te au puaka katoa o te kainga nei i te anau anga, e i raro ake i tona marumaru te au enua nunui katoa i te noo anga.

7 Manea akera aia i tona maata anga, i te roa o tona au rara: tei te vai maata oki tona aka.

8 Te au arezi i roto i te kainga o te Atua, kare aia i ngaro ia ratou: kare te au berusi e aite ki te au rara nona, e kare te au oramuna e aite ki te au atava nona; kare oki e rakau i roto i te kainga o te Atua e arite iaia i tona ra manea.

9 Kua akamanea roa au iaia i te rai rara nona ra: e kua vareae oki te au rakau katoa o Edene, i roto i te kainga o te Atua ra, iaia.

10 E teianei, te na ko maira te Atu ra ko Iehova; No te mea, kua akateitei koe ia koe uaorai ki runga roa, e kua tae atu tona tamoko i rotopu i te au rara patapatatue, e kua parau tona ngakau i tona teitei anga;

11 I tuku atu ei au iaia ki roto i te rima o tei ririnui o te au etene ra, e e rave nui mai aia iaia: kua tuaru au iaia ki vao no tana ra kino.

12 E na te au tangata ke ke, ko tei rikarikaia e te pa enua nei, i tipu iaia ki raro, e kua akaruke iaia: ki runga i te au maunga e ki raro i te au o ravarai i te topa anga tona au rara, e kua atiatiia tona au atava i te au kauvai katoa o te enua nei: e te au tangata katoa o te enua nei, kua eke anake ïa ki raro mei roto i tona marumaru, e kua akaruke iaia.

13 Ei runga i taua kino nona ra e noo ei te au manu katoa o te reva nei, e riro oki te au puaka katoa o te kainga nei ki runga i tona au rara:

14 Kia kore te au rakau ravarai o te pae vai e akateitei ia ratou uaorai i to ratou teitei anga, e auraka e akatae atu i to ratou tamoko ki rotopu i te au atava patapatatue ra, auraka katoa to ratou au rakau e tu ki runga i to ratou teitei, te au rakau katoa oki e inu i te vai: kua tuku anakeia oki ratou no te mate, ki te au ngai akaaka i te enua nei, i rotopu i te au tamariki a te tangata nei, e te aronga e riro ki raro i te vaarua ra.

15 Te na ko maira te Atu ra ko Iehova; I te rā i riro ei aia ki raro i te vaarua ra, kua akatupu au i tetai akaevaeva: kua tapoki au i te moana iaia, e kua tāpu au i te au vai puke o te reira, mou iora oki te au vai nunui ra: e naku i akaevaeva i Lebanona iaia, e kua aue te au rakau katoa o te kainga nei iaia.

16 Kua ngaueue te au enua iaku i te aruru o tona inga anga, iaku i titiri iaia ki raro i ade, e te aronga katoa e eke ki raro i te vaarua ra: e te au rakau katoa i Edene, tei ikiia e tei memeitaki i Lebanona, te au rakau ravarai e inu i te vai ra, rekareka akera i te au ngai akaaka o te enua nei.

17 Ko ratou ma ia katoa i te tae anga atu ki raro i ade ra ki te aronga i taia i te koke ra, e te aronga i riro ei rima nona tei noo ana i raro ake i tona marumaru i rotopu i te au etene ra.

18 E aite koe iaai i te manea e te maata, i roto i te au rakau i Edene? e tukuia maira koe ki raro e te au rakau i Edene ki te au ngai akaaka i te enua nei: ei rotopu i te aronga peritome koreia koe takoto uaʼi, e te aronga i taia i te koke ra. Ko Pharao teia e tona tini ravarai, te tuatua maira te Atu ra ko Iehova.