Isaia

28 E AE oki to te korona akaparau o te aronga i kona i Epheraima, e te tiare mae ua ra o to ratou tu manea kakā; to te aronga i te openga mai o te o tutupu meitaki ra, o tei nenevaia i te wina ra.

2 I na, tei te Atu te tangata maroiroi okotai, e te ririnui, e arite aia ki te uriia ua toka, te uriia akapou, mei te vai puke ririnui ra i te maringi viviki anga mai, e titiri rava aia ia ratou ki roro i te one i tona rima.

3 E takatakaiia te korona akaparau o te aronga kona i Epheraima ki raro ake i te vaevae:

4 E riro oki te tiare mae ua o to ratou tu manea kakā ra, i te openga mai o te o tutupu meitaki ra, mei te suke rere to mua o mua akaū ra; na te kite uaia e tetai, i te vai ua anga ki tona rima, kua pou takere i te apukuia.

5 Kia tae ki taua rā ra e riro ei a Iehova Sabaota ra ei korona kakā, e ei tarae manea, i te toenga o tona ra iti-tangata;

6 E ei vaerua tuatua-tau oki i te aronga i noo i te akatau anga tuatua ra, e ei maroiroi no te aronga akaoki i te tamaki ki te ngutupa ra.

7 Kua ē rai oki te reira i te wina; e kua arara aere i te kava kona kua ē rai te taunga e te peroveta katoa i te kava kona; kua vi ratou i te wina; kua arara aere ratou i te kava kona; kua ē ratou i te orama; kua turori i te akatau anga tuatua.

8 Kua ki te au kaingakai katoa i te ruaki, e te au mea viivii, kare e ngai toe.

9 E apii aia iaai kia kite? e koai ïa aronga tana e akakarape kia kite i te rongo? i te tamariki i topa te u ra, te kore e paria te u ia ratou.

10 Kua na rungao oki te akauenga i te akauenga, kua na rungao te akauenga i te akauenga; kua na rungao te ture i te ture, na rungao te ture i te ture; ki ku nei tetai vaʼi iti, ki ko atu tetai vaʼi iti.

11 Koia tikai, ei vaa murare, e te reo ke ke, ka tuatuaʼi aia ki teianei iti-tangata;

12 No te mea i tuatua ana aia ia ratou e, Teia te akaeaanga, e akanoo kotou i tei roiroi; teia te akaangaroianga; kare ra ratou i akarongo.

13 Ka riro ra te tuatua a Iehova kia ratou, kia na rungao te akauenga i te akauenga, na rungao te akauenga i te akauenga; kia na rungao te ture i te ture, na rungao te ture i te ture; ki ku nei tetai vaʼi iti, ki ko atu tetai vaʼi iti; kia inga tiraa aere ua atu rai ratou ki muri, e kia aati, e kia ii, e kia rauka.

14 E teianei ka akarongo mai kotou, e te aronga taitoito, i te tuatua a Iehova, kotou tei tutara i teianei aronga, ko tei noo i Ierusalema nei.

15 No te mea kua tuatua kotou e, E koreromotu ta matou e te mate, e kua akatau ta matou tuatua ia ade; kia na rotopu tikai taua mate maata ra i te aere, kare ïa e akavaitata mai ia matou nei; kua akariro oki matou i te pikikaa ei punanga, e kua pipini matou i raro ake i te taeke ua:

16 E teianei te na ko maira te Atu ra ko Iehova, I na, te akamou nei au i tetai toka i Ziona ei pange, e toka timataia, e toka meitaki maata i te kapeu tara, e pange ngaueue kore: ko tei akaronga ra, kare ïa e rapurapu.

17 E arite atu au i te tuatua-tau ki te tataura, e te tuatua-tika ra ki te arite tautau: pakoko uaia te punanga pikikaa e te ua toka; e te pipinianga ra, e ngaromia ua ïa e te vai.

18 E ko ta kotou koreromotu e te mate ra, e akatikauia ïa, e ta kotou tuatua akatau ia ade ra, kare ïa e mou; kia na rotopu tikai taua mate maata ra te aere, e takatakaiia kotou ki raro e te reira.

19 Kua na rotopu anake te aere ra, kua opukia ïa kotou: i tera popongi i tera popongi, e na rotopu rai ïa te aere, i te po, e te ao: e rikarikaia te rongo anake ra.

20 E poto oki te roi kia akatika te tangata ki rungao; kua aoaoa te tapoki kare e pini kia moe ki roto.

21 Ka tu mai oki a Iehova mei tei te maunga ra i Perazima, ka riri aia mei tei te o ra i Gibeona; kia rave aia i tana angaanga, tana angaanga tu ke ra; e kia akatupu aia i tana ravenga, tana ravenga tu ke ra.

22 E teianei ra, auraka kotou e akavaavaa, ka akaketaketaia aea to kotou au ruru: e tuatua akapou i akakoroia taku i akarongo akenei, i te Atu ra, ia Iehova Sabaota, i teia katoa nei enua.

23 E anga mai i to kotou taringa, e akarongo mai i toku reo; ka akono tikai, ka akarongo mai ei i taku tuatua.

24 E arote ainei te tangata arote e po ua atu te rā kia ruru i te ua? e kenu ua rai ainei, e e akaungaunga i te vaanga one o tona enua?

25 Manea akera te one iaia, kare ainei aia e ruru aere i te kuze, e kua titiri aere i te kumino, e kua ruru oki i te sitona ma te arite, e te kerite e te olura, ki tona ngai ki tona ngai?

26 Na tona Atua oki i ako marie mai iaia kia akono, e kua apii mai kiaia.

27 Kare oki te kuze i pāpāia ki te porotata pāpā; kare oki te porotata i akatakaia ki runga i te kumino; e pāpāia ra te kuze ki te rakau, e te kumino ki te pāpā ra.

28 Kia reru uaia te sitona e tikaʼi; no te mea kare aia e pāpā tamou mai i te reira ra, e e akaungaunga i te tipi o tana ra porotata; kare oki e akaparuparu i tana ra au puaka.

29 No ko katoa teia ia Iehova Sabaota ra, tana te tuatua umere maataia, e te ravenga maata.