Levitiku

9 E TAE akera ki te po varu ra, kua kapiki aturā Mose kia Aarona, e taua au tamariki, e te aronga pakari o Iseraela ra;

2 Kua karanga atura aia kia Aarona, Ka rave koe i tetai punua puakatoro ou ei tarangaara, e tetai mamoe toa ei atinga karakaratio, auraka ei kino, ka apai ei ki mua i te aroaro o Iehova.

3 E karanga atu oki koe ki te tamariki a Iseraela, e na ko atu, E rave kotou i tetai puakanio ei tarangaara; e tetai punua puakatoro ma tetai punua mamoe mataiti okotai, e te kino kore, ei atinga karakaratio; 4 E tetai puakatoro, e tetai mamoe toa, ei atinga au ki mua i te aroaro o Iehova; e tetai atinga kai irokia ki te inu; akonei oki a Iehova e mama mai ei kia kotou na. 5 Kua apai maira oki ratou i ta Mose i akaue maira ki mua i te Are uipaanga: kua aere maira taua uipaanga katoa ra i vaitata, e tu iora ki mua i te aroaro o Iehova.

6 E kua karanga aturā Mose, Teia ta Iehova i akaue mai, e rave kotou, kia mama mai te kakā o Iehova ra kia kotou. 7 E kua karanga aturā Mose kia Aarona, E aere koe ki te atarau ra, ka apai ei i te tarangaara naau, e te atinga karakaratio naau, ka tapoki ei i taua ara, e ta te tangata katoa oki: e apai oki i te atinga na te au tangata, ka tapoki ei i ta ratou ara; i ta Iehova i akaue maira. 8 Aere aturā Aarona ki te atarau ra; e oti akera te punua puakatoro no tana uaorai tarangaara i te taia,

9 Kua apai maira te tamariki a Aarona i te toto kiaia ra; kua tutou iora aia i tona maikao rima ki roto i taua toto ra, e kua tuku atura ki rungao i te au tara o te atarau, kua riringi iora i te toto i te tumu o taua atarau ra: 10 Kareka te tongaua, e nga pukuatu, e te ekaeka i rungao i te ate o te tarangaara ra, kua taʼu aia i te reira ki runga i te atarau; i ta Iehova i akaue mai kia Mose ra:

11 E kua taʼu aia i te kiko e te kiri ki te ai, ki vao mai i te puakapa ra.

12 E oti akera te atinga karakaratio i te taia, kua apai maira te au tamariki a Aarona i te toto kiaia ra, e kua pîpî atura aia i te reira ki rungao i te atarau e pini ua ake.

13 E kua apai maira ratou i te atinga karakaratio kiaia ra, e nga kotinga, e te mimiti; e kua taʼu aia i te reira ki rungao i te atarau.

14 E oti akera te ngakau e nga vaevae i te oreiia, kua taʼu katoa atura aia i te reira, ma te atinga karakaratio katoa ra, ki rungao i te atarau ra.

15 Kua apai maira aia i te atinga a te au tangata ra: e kua rave iora i te puakanio tarangaara na te au tangata ra; e oti akera i te taia, kua apai atura ei tarangaara, mei tei muatangana ra.

16 E kua apai maira aia i te atinga karakaratio, e kua apai oki i te reira mei tei akonoia ra.

17 E kua apai maira aia i te atinga kai, kua rave iora i tetai manga i tona rima e ki akera, taʼu atura ki runga i te atarau, e te atinga karakaratio katoa no taua popongi ra.

18 E oti akera te puakatoro e te mamoe toa no te atinga au, na te au tangata ra, i te taia, kua apai maira te tamariki a Aarona i te toto kiaia ra, e kua pîpî aia i te reira ki rungao i te atarau e pini ua ake.

19 Kareka te tongaua o te puakatoro, e to te mamoe toa, e te iku e te tongaua no runga i te au mea i roto ra, e nga pukuatu, e te ekaeka i te ate ra: 20 Tuku akera ratou i taua tongaua ra ki rungao i nga uma, taʼu atura oki aia i te tongaua ki rungao i te atarau ra:

21 Kareka nga uma ra, e te ūā mua katau ra, kua ruru iorā Aarona i te reira ei atinga ruru ki mua i te aroaro o Iehova; i ta Mose i akaue mai.

22 Kua akatikā Aarona i tona rima ki te au tangata ra, kua akaora atura ia ratou, e kua aere maira ki raro kia oti ake te tarangaara, e te atinga karakaratio, e te atinga au, i te apaiia e ia ra.

23 E aere aturā Mose raua ko Aarona ki roto i te Are uipaanga, e kua aere maira ki vao, e kua akaora i te au tangata ra; e kua kitea maira te kakā o Iehova e te au tangata ravarai.

24 Kua puroro maira te ai no ko mai ia Iehova ra, e pou takiri rava akera te atinga karakaratio, e te tongaua, ki rungao i te atarau ra; e kite akera te au tangata ravarai, kua maeva iora, e kua tipapa ki raro to ratou mata.