1 Samuela

8 E RUAINE akerā Samuela, akariro atura aia i ana puke tamariki ei akava ia Iseraela.

2 Ko Ioela te ingoa o taua tana mua; e ko Abia te ingoa o tei muri ake: e puke akava oki raua i Bere-seba.

3 Kare ana puke tamariki i aru i tona rua-tapuae: tatipake atura raua i te apinga, e kua rave i te tutaki, e kua akamingi i te tuatua-tau.

4 Kua akaputuputu iora te aronga mamaata katoa o Iseraela, e kua aere maira ki Rama kia Samuela ra;

5 E kua tuatua maira ratou kiaia, I na, kua ruaine koe, e kare aau puke tamariki i aru i toou ra rua-tapuae; e teianei, e akataka ana koe i tetai ariki no matou, ei akava ia matou, mei to te pa enua katoa.

6 Mainaina akera ra Samuela i ta ratou tuatua anga mai e, O mai tetai ariki no matou, ei tutara ki runga ia matou nei. E kua pure aturā Smauela ia Iehova.

7 Kua tuatua mairā Iehova kia Samuela, E akarongo ua atu koe i te tuatua a te au tangata na, ta ratou i tuatua mai kia koe ra: kare oki ko koe ta ratou i akaruke, kua akaruke ra ratou iaku, auraka au ei tutara ki rungao ia ratou.

8 Ko ta ratou rai ïa angaanga mei te rā mairai i arataki mai ei au ia ratou mei Aiphiti ra, e tae rava akenei ki teianei rā; kua akaruke rai oki ratou iaku, e kua akamori i te au atua ke, e te pera katoa ra ratou ia koe.

9 E tenana, e akarongo atu koe ki to ratou reo: e ako pu tikai ra koe ia ratou, e akakite oki kia ratou i te peu a te ariki kia tutara ki rungao ia ratou ra.

10 Kua akakite aturā Samuela ki te au tangata, i pati mai iaia i te ariki, i te au tuatua ravarai a Iehova ra.

11 E kua karanga atura aia, Teia ta te ariki ra ravenga kia tutara ki rungao ia kotou: Ka rave aia i ta kotou au tamariki tamaroa nona uaorai, e no tana ra au kariota, e no tana ra au oroenua; e oro oki tetai pae na mua i te au kariota nona ra.

12 E akariro aia ia ratou ei rangatira ki rungao i te au pupu tausani, e ei rangatira ki runga i te au pupu e rima ngauru, e ei tatanu i tona kainga, e ei kokoti i tana kai akaū, e ei tupaki taoonga tamaki nana, e te au mea no tana ra au kariota.

13 Ka rave oki aia i ta kotou au tamaine ei iro rakau kakara, e ei tunu kai, e ei keu kai.

14 Ka rave oki aia i to kotou kainga memeitaki, e to kotou au kainga vine, e to kotou au kainga olive, ka oronga atu ei no tona au tavini.

15 Ka rave oki aia i te ngauruanga o ta kotou ua kai ra, e no ta kotou au kainga vine ra, ka apai ei na te aronga akataoongaia ki ona ra, e no tona au tavini.

16 Ka rave oki aia i to kotou au tavini tane, e to kotou au tavini vaine, e to kotou au tangata ou memeitaki, e ta kotou au asini, ka apai ei ei rave i tana uaorai angaanga.

17 Ka rave oki aia i te ngauruanga o ta kotou au mamoe; e ka riro kotou ei aronga tavini nona.

18 Ka aue oki kotou i te reira tuatau i to kotou ariki i ta kotou i iki ra; kare rā Iehova e akarongo mai ia kotou i te reira tuatau.

19 kare akerai taua au tangata ra i akarongo i te reo o Samuela; e kua tuatua akera ratou, Auraka; ei ariki rai to matou i rungao ia matou nei;

20 Kia aiteite katoa matou ki te pa enua ravarai; kia akatika to matou ariki i te tuatua ia matou nei, e kia na mua aia ia matou, ka tamaki ei i ta matou tamaki.

21 Kua akarongo aturā Samuela i te au tuatua ravarai a taua au tangata ra, e kua akakite atura aia i taua tuatua ra ki mua ia Iehova ra.

22 E kua tuatua mairā Iehova kia Samuela, Ka akarongo koe i to ratou reo, e akaariki i tetai ariki no ratou. Kua karanga aturā Samuela ki taua au tangata Iseraela ra, Ka aere anake ki to kotou au oire tikai.