E Peʼe na Solomona

6 Teiea atura taua akaperepere noou ra, e tera ra vaine i tu ke i te meitaki i te au vaine katoa nei? i tapae tika akenei kiea taua akaperepere noou ra, kia kimi katoa matou e koe katoa oki?

2 Aere atura taku akaperepere nei ki roto i tona ra kainga, ki te au tanumanga rakau kakara ra, e kaikai i roto i te au kainga ra, e koi aere oki i te au lili.

3 No taku akaperepere au nei, e noku oki taku akaperepere: tei rotopu aia i te au lili i te kaikai anga.

4 Manea maata toou, e taku akaperepere e, mei ia Tireza, e te tau maataia, mei ia Ierusalema, e te matakuia, mei te nuku reva ra.

5 E ariu ke atu na to mata iaku nei, kua riro oki au ki ko na: to rauru, e tau ïa ki te anana puaka-nio, e moe aere i te maunga ra ko Gileada.

6 E tau to nio ra ki te anana mamoe, i te aere anga mai mei raro mai i te orei anga ra, ko tei tataki rua anake te punua ra, e kare rava tetai o ratou i ngere.

7 Mei te vaanga remuna ra, koia oou paparinga ra i raro ake i to makave rauru ra.

8 Okotoru ariki vaine ki roto i toku akera are, okoa oki vaine tavini, e te paretenia oki kare i tatauia.

9 Koia anake nei ra taku kukupa, taku manea; ko te akaperepereia o tona metua vaine, ko tei akameitakiia e tei anau mai iaia ra. Kua akara mai te au vaine iaia, e kua akameitaki mai iaia, te au ariki vaine, e te au vaine tavini, e kua akapaapaa mai ratou iaia.

10 Koai teia e akara nei mei te popongi ra, mei te marama te manea, mei te rā te kakā, mei te nuku reva ra te matakuia!

11 Aere atura au ki raro ki roto i te kainga ua rakau, e atoro i te kai a te o ra; kia kite atu i te vine i te ruperupe anga, te remuna i te pua tiare angaia.

12 Kare ra au i kite, kua riro takere au i taku ngakau, mei te kariota o taku aronga mana ra.

13 Ka oki mai, ka oki mai, e te vaine Sulami e; ka oki mai, ka oki mai kia akara atu matou ia koe. E akara kotou i te vaine Sulami ki te aa? Mei te mea te akara ra matou i te au pupu o nga nuku e rua ra.