Ieremia

8 TE TUATUA mairā Iehova, kia tae ki te reira tuatau, ka apai mai ei ratou i te au ivi o te au ariki no Iuda, e te au ivi no te ui ariki, e te au ivi no te kau taunga, e te au ivi no te au peroveta, e te au ivi o to Ierusalema ra, i to ratou au menema.

2 E tauaki uaia ïa au ivi i te rā, e te marama, e te nuku katoa o te rangi ra; i ta ratou i inangaro ra, e ta ratou i akamori ra, e ta ratou i aru aere ra, e ta ratou i kimi ra, e ta ratou i tupou ana ki raro ra: kare e akaputuputuia, kare oki e tanumia; ka riro ra ei teita ki runga i te enua.

3 E ko te mate te ka inangaroia, kare te ora, e te toenga ravarai o teianei ngutuare kino, i tei toe aere i te au ngai katoa taku i tuaru ia ratou, te tuatua mairā Iehova Sabaota.

4 E karanga atu rai koe kia ratou, Te na ko mairā Iehova; E inga ainei ratou ki raro, e kare e tu akaou ki runga? e ariu ke atu ainei e kare e oki mai?

5 Eaa oki teianei iti-tangata no Ierusalema i kotoe ki muri, i te kotoe-anga mutu kore? Kua mou piri tikai ratou ki te pikikaa: kare i tika ia ratou i te oki mai.

6 I akarongo atura au e kua kite au; kare ra i tika ta ratou tuatua: kare akera tetai i tataraara i tona kino, i te na ko anga e, I aa ua ana au? kua anga anake ratou ravarai i tona uaorai aerenga, mei te oroenua e oro pu ua ki roto i te tamaki anga.

7 Kua kite oki te kasida o te reva nei i tona tuatau i akonoia; te akono ra oki te onu, e te susa, e te titi, i to ratou tuatau e aere mai ei; kare ra toku iti-tangata i kite i te tuatua-tau a Iehova.

8 Eaa kotou i tuatuaʼi e, E pakari to matou, e tei ia matou te ture a Iehova? koia tika, i na, e peni pikikaa ta te tata tuatua ra, e anga ia ei pikikaa.

9 Kua akama te aronga pakari, kua tumatetenga, e kua rauka; i na! kua kopae ratou i te tuatua a Iehova; e te pakari ra, eaa to roto ia ratou?

10 E teianei e oronga au i ta ratou au vaine na etai ke, to ratou au kainga no te aronga e noo i reira; no te mea, mei tei iti ra e tae ua atu ki tei maata, kua riro roa atu ratou ravarai ki te morimori apinga, mei te peroveta e tae ua atu ki te taunga, kua pini katoatoa i te pikikaa.

11 E kua akaora pakiri ua ratou i te paruparu o te tamaine o toku iti-tangata, i te na ko anga e, Ei au, ei au; e kare ua e au.

12 I akama ainei ratou ko ratou i rave i te mea viivii? kare; kare rava oki ratou i akama, kare ratou i kite i te akama: e teianei, e inga ratou ma te aronga e inga ra: i te tuatau e tutakiiaʼi ratou ra, e oparaia ratou ki raro, te tuatua mairā Iehova.

13 Te tuatua mairā Iehova, E akapou takiri au ia ratou; kare e ua to runga i te vine, kare rai e suke to runga i te suke, ka mae katoa oki te rau; e ko taku oki i oronga atu ia ratou ra, e taka ke ia.

14 Eaa tatou nei e noo uaʼi? Ka uipa ia kotou uaorai, ka aere ei tatou ki roto i te au oire akaketaketaia, ka noo muteki uaʼi tatou i reira: kua akamuteki uaia mai tatou e to tatou Atua ra e Iehova, e kua oronga mai i te vai kavangu kia inu tatou, no te mea kua ara tatou ia Iehova.

15 Kua tatari tatou ki te au, e kare rava e meitaki; i te tuatau akaora, e i na, ko te tumatetenga!

16 Kua kitea maira te mapu anga o tana au oroenua mei Dana mai: kua ngaueue te enua katoa i te reo o te aue anga o tana au oroenua ririnui; kua tae mai oki ratou, e kua pou ia ratou te enua; e te au mea katoa i reira; te oire, ma ratou katoa e noo i roto.

17 I na oki, te tono nei au i te ovi ia kotou, e vipera ïa, tei kore e akono i te akararata, e e kakati mai ratou ia kotou, te tuatua mairā Iehova.

18 Kua riro te rekareka i roto iaku nei ei aue; toku ngakau i roto iaku nei kua taitaia.

19 I na, ko te reo aue o te tamaine a toku ra iti-tangata, mei te au enua mamao mai: kare ainei a Iehova i Ziona? Kare ainei tona ariki i roto iaia ra? no te aa ratou i akakoko mai ei iaku i to ratou au idolo kotikotiia ra, e te au mea puapinga kore no tetai ngai ke mai?

20 Kua kore akenei te mou, kua topa akenei te akaū, kare ra tatou nei i ora.

21 No te mamae o te tamaine o toku iti-tangata i mamae ravaʼi au; kua akaevaeva au; kua rokoia au e te tumatetenga.

22 Kare ainei e vairakau i Gileada? kare ainei o reira e taunga? eaa oki te mea i kore ei i ora te maki o te tamaine a toku ra iti-tangata?