Ieremia

38 KUA akarongo a Sephatia, te tamaiti a Matana, e Gedalia, te tamaiti a Pasahura, e Ieukala, te tamaiti a Selemia, e Pasahura, te tamaiti a Malekia, i te au tuatua ta Ieremia i tuatua ki te tangata katoa ra, i te na ko anga e, 2 Te na ko mairā Iehova, Ko tei toe ki roto i teianei oire, e mate ïa i te koke, i te onge, e te maki-mate: ko tei aere ra ki o te Kaledea ra, e ora ïa; e riro oki tona ora ei apinga nona, e ora ïa aia.

3 Te na ko mairā Iehova, E orongaia ïa teianei oire ki roto i te rima o te nuku o te ariki o Babulonia, ka rave oki ratou i te reira.

4 I karanga atu ei te ui ariki ki te ariki ra, Kia mate atu teianei tangata e tikaʼi ta matou ïa tuatua kia koe: no te mea nona i paruparu ei te rima o te aronga toa i toe i te oire nei, e te rima o te tangata katoa nei, koia i pera i te tuatua anga mai kia ratou: kare oki teianei tangata i kimi i te meitaki no teianei iti-tangata, ko te kino ra.

5 Kua tuatua maira taua ariki ra ko Zedekia i reira, I na aia, tei to kotou rima ïa: kare oki a te ariki tuatua kia ketaketa kotou.

6 Kua rave iora ratou ia Ieremia, e kua uri atura iaia ki roto i te vaarua, ki o te tamaiti a te ariki ra, ki o Malekia, tei roro i te paepae o te are tapeka anga ra: i tatauraiā Ieremia e ratou i te tuku anga ki raro ra: kare e vai i roto i taua vaarua ra, e vari anake ra: topa iorā Ieremia ki roto i taua vari ra.

7 Akarongo akerā Ebede-meleka, ngati Kusa ra, tetai o te au eunuka i roto i te are o taua ariki ra, e kua uri ratou ia Ieremia ki raro i te vaarua; te noo ua ra te ariki i te ngutupa ki o Beniamina ra;

8 Kua aere iorā Ebede-meleka ki vao i te are o te ariki ra, e kua karanga atura ki te ariki, na ko atura,

9 E taku atu, e te ariki, e takinga-kino to teianei au tangata i te au mea katoa ta ratou i rave i te peroveta nei ia Ieremia, tei uriia e ratou ki roto i te vaarua; e mate takiri oki aia i reira i te pongi, kare atura o te oire nei e manga.

10 Kua akaue atura te ariki ia Ebede-meleka ngati Kusa ra, na ko atura, E rave katoa koe i te tangata kia toru ake ngauru, ka uuti mei ei i te peroveta ra ia Ieremia ki runga, mei roto mai i te vaarua ra, ka mate aea aia.

11 Kua rave aturā Ebede-meleka i taua au tangata ra, aere atura ki roto i te are o te ariki ra, i raro ake i te pia apinga ra; kua rave iora i te kakau motumotu, e te ngaengae, e kua tataura iora i te tuku anga ki raro kia Ieremia ki roto i te vaarua ra.

12 Kua karanga aturā Ebede-meleka ngati Kusa kia Ieremia, Ka tuku ana i tenana aeaenga kakau e te motumotu ra ki raro ake i to keke ra, ki raro ake i te taura ra: kua pera aturā Ieremia.

13 Kua uuti iora ratou ia Ieremia ki runga i taua taura ra, rave akera iaia mei roto mai i taua vaarua ra: noo ua iorā Ieremia ki roto i te paepae i taua are tapeka anga ra.

14 Kua tono akera te ariki ra ko Zedekia, e kua arataki maira i te peroveta ra ia Ieremia kiaia uaorai, ki roto i te toru o te tomoanga, ki roto i te are o Iehova. Kua tuatua maira te ariki kia Ieremia ra, Ka ui au kia koe i tetai mea; auraka koe e uuna iaku.

15 Kua karanga aturā Ieremia kia Zedekia, Kia akakite atu au kia koe ra, kare ainei koe e tamate rava mai iaku? e kia ako atu au ia koe ra, kare koe e akarongo mai iaku.

16 Kua taputou poiri ua ra te ariki ra ko Zedekia kia Ieremia, na ko atura, Te ora rā Iehova, tei anga i to taua nei vaerua, kare au e ta ia koe, kare oki au e tuku atu ia koe ki te rima o teianei au tangata, tei kimi mai ia koe kia mate.

17 Kua karanga aturā Ieremia kia Zedekia, Te na ko maira te Atua Sabaota ra, ko Iehova, te Atua o Iseraela; Kia tika ia koe kia aere atu ki te ui ariki ki o te ariki o Babulonia, e ora to vaerua i reira, e kare teianei oire e ka i te ai i reira; ka ora oki koe, e to kopu-tangata katoa ra:

18 Kia kore ra e tika ia koe kia aere atu ki te ui ariki ki o te ariki o Babulonia, e tukuia teianei oire i reira ki te rima o te Kaledea, e na ratou e tutungi ki te ai, e kare rai oki koe e ora i to ratou rima.

19 Kua tuatua maira te ariki ra ko Zedekia kia Ieremia, Te mataku nei au i te au ngati Iuda i uri ki o te Kaledea, ko te tukuia aea atu e ratou ki to ratou ra rima, e ko te akainainaia aea au e ratou.

20 Kua karanga aturā Ieremia, Kare ratou e tuku ia koe. E akarongo mai ana koe i tenana i te reo o Iehova, taku e karanga atu kia koe nei: e meitaki ïa toou i reira ra, e ka ora oki toou vaerua.

21 Kia kore ra e tika ia koe kia aere, teia ta Iehova tuatua i akakite mai iaku nei:

22 I na oki, te au vaine katoa i toe ki roto i te are o te ariki o Iuda, e aratakiia mai ïa ki te ui ariki ki o te ariki o Babulonia, e na ko mai oki taua au vaine ra, Na to au oa akaperepere koe i akakoko, e kua tupu ta ratou ia koe: kua piritia to vaevae ki roto i te vari ra, e kua kotoe akenei ratou ki muri.

23 E arataki mai oki ratou i taau au vaine katoa, e taau au tamariki ki te Kaledea: kare katoa koe e ora i to ratou rima o te ariki o Babulonia: e noou e ka ai teianei oire ki te ai.

24 Kua tuatua mairā Zedekia kia Ieremia i reira ra, Auraka rava teianei au tuatua e akakiteia ki tetai tangata nei, e kare oki koe e mate.

25 Kia kite ra te ui ariki nei e, i tuatua ua ana taua, e kia aere mai ratou kia koe ra, e kia tuatua mai e, E akakite mai kia matou i taau i tuatua ki te ariki ra, auraka e uuna ia matou nei, kare oki koe e mate ia matou; e ta te ariki oki i tuatua mai kia koe ra;

26 Ei reira koe ka karanga atu ei kia ratou, I tuku akaaka ua atura au i taku pati anga ki mua i te aroaro o te ariki ra, e auraka aia e akaoki iaku ki te are o Ionatana, kia mate i reira.

27 Kua aere anake maira te ui ariki kia Ieremia ra, e kua ui maira kiaia: e kua akakite atura aia kia ratou i taua au tuatua katoa nei, mei ta te ariki i akaue mai kiaia ra, Akaruke muteki ua maira ratou iaia: kare atu taua mea ra i kitea.

28 Noo ua aturā Ieremia ki roto i te paepae o te are tapeka anga ra, e tae ua atura ki te rā i raveiaʼi Ierusalema: ei reira oki aia i te rave anga ia Ierusalema ra.