Ieremia

20 AKARONGO akera te taunga ra ko Pasahura, te tamaiti a Imera, ko te tutara oki aia o te are o Iehova, i te au tuatua ta Ieremia i totou ra:

2 Kua ta iorā Pasahura i te peroveta ra ia Ieremia, e tuku atura iaia ki roto i te patiti, i te ngutupa teitei i o Beniamina ra, i vaitatao i te are o Iehova.

3 E ao akera, tukuia iorā Ieremia e Pasahura mei roto mai i te patiti ra. Kua karanga aturā Ieremia iaia i reira, Kua tapaia toou ingoa e Iehova, auraka ia Pasahura, ko Mataku-takapini ra.

4 Te na ko maira oki a Iehova, I na, ka akariro au ia koe ei mataku anga naau uaorai, e na to au oa katoa ra; e inga oki ratou i te koke a to ratou au enemi, ka akara oki o mata: e e oronga oki au ia Iuda ravarai ra i te rima o te ariki no Babulonia, e nana ratou e apai ki Babulonia ei tuikaa, e e ta oki ia ratou ki te koke.

5 E naku e oronga i te ririnui o teianei oire, e tana au angaanga katoa ra, e tona au mea memeitaki katoa ra, e te au apinga katoa o te au ariki no Iuda; ko taku ïa e oronga ki roto i te rima o to ratou au enemi, te ka āru ia ratou, ka rave oki ia ratou, e ka apai ia ratou ki Babulonia.

6 E ko koe oki, e Pasahura e, e te aronga katoa e noo i to are ra, e aere anake ïa ei tuikaa: e tomo oki koe ki Babulonia, e ei reira koe e mate ei, e ei reira koe e tanumiaʼi, ko koe, e to au oa katoa, te aronga oki taau i totou atu ma te pikikaa.

7 Kua akanauru mai koe iaku, e Iehova e, e kua vare iora au: ko koe tei ririnui iaku, e ko taau atura tei tupu; kua riro au ei kataanga i te au rā katoa nei, e te aviri maira te tangata katoa iaku nei.

8 Mei te tuatau oki i tuatuaʼi au, ko te aue, ko te kapiki i te takinga-kino, e te ārunga ra, taku; kua akariroia oki te tuatua a Iehova ei akakino anga iaku, e ei akavaavaa anga i te au rā katoa.

9 Karanga iora ra au e, kare au e akaiki iaia, e kare au e tuatua akaou i tona ra ingoa; riro atura ra mei te ai ka i roto i toku ngakau ra, kua popaniia ki roto i toku ra au ivi; roiroi akera au i te akakoromaki ua anga, e kare atura e tika kia akatupua ua.

10 Kua akarongo oki au i te akakino anga o te tangata katoa e manganui, e te mataku e pini ua ake. Te na ko ra ratou, E akakite mai koe, e na matou rai e akakite atu. Te tapapa anake maira taku au oa ra i toku inga anga: te na ko ra ratou, Peneiake ko te akanauruia aia, ka autu ei tatou iaia, ka tutaki atu ei tatou iaia.

11 Tei iaku rā Iehova, ei toa rikarika ïa; e riro ei te aronga takinga-kino iaku ra i te turori, kare oki ratou e autu: kua akama roa ratou, kare oki ta ratou i manuia: ei akama mutu kore to ratou, kare e ngaro.

12 E Iehova Sabaota ra e, ko tei timata i tei tuatua-tika ra, ko tei akara i te manako i roto, e te ngakau ra; kia kite au i to riri akaoko ki runga ia ratou: kua tuku ua oki au i taku tuatua kia koe ra.

13 Ka imene ia Iehova, ka akapaapaa ia Iehova, no te mea, kua akaora aia i te vaerua o tei akaaka, i te rima o te takinga-kino ra.

14 Kia taumaaia te rā i anau mai ei au ra: auraka te rā i anau mai ei taku metua vaine iaku ra kia akameitakiia:

15 Kia taumaaia te tangata ko tei akakite ki taku metua tane, i te na ko atu e, Kua anau mai taau e tamaroa; ei akarekareka nui anga atu iaia.

16 Kia riro te reira tangata mei te au oire i tatipokiia e Iehova, e kare i tataraara: kia kite aia i te aue i te popongi, e te aoa i te avatea.

17 Koia kare i ta iaku i roto i te kopu; e kia riro taku metua vaine ei vaarua noku, e kia vai ua rai tona kopu i te nui anga iaku.

18 Eaa te mea i anau mai ei au mei roto mai i te kopu ra, kia kite i te roiroi e te aue, e kia ope rava oku puke rā i te akama?