Deuteronomi

19 KIA pou rava te au etene i to Atua ra ia Iehova, no ratou te enua ta to Atua ta Iehova e oronga mai noou nei, e tupauia iora ratou e koe ra, noo iora i to ratou au oire, e i roto i to ratou au are ra;

2 E akataka koe i e toru puke oire noou ra i rotopu i to enua, ta to Atua ta Iehova e oronga mai noou ra ei nooanga.

3 Naau e akataka i te kotinga o toou ra enua, ta to Atua ta Iehova e oronga noou ei nooanga, kia toru oki kotinga, ka anga ai i te arataa kia oro te ta tangata ra ki reira.

4 Teia oki te tuatua i te ta tangata e oro ki reira kia ora aia ra: Ko tei ta kite kore ua i tona tangata tupu, kare i makitakita iaia i muatangana ra;

5 Kareka mei te tangata kia aere raua ko tona tangata tupu ki te ngai vaorakau, e tipu i te rakau ra, e kua aae akera aia i tona rima i te tarapa, kua tipu iora i taua rakau ra, manuku atura te tarapa i te kakau, pa atura ki runga i tona tangata tupu, mate iora aia ra; ka oro aia ki tetai i aua nga oire ra kia ora aia:

6 Ko te aruaru mai aea te akamoupuku i taua ta tangata ra, i te otooto anga o te riri o tona ngakau; e no te mamao o taua ngai i aereia ra, rokoia iora aia, ta atura iaia; kare ra te mate e tau iaia, no te mea kare aia i makitakita iaia i muatangana ra. 7 I akaue atu ei au ia koe, i te na ko anga atu e, E akataka koe i te toru puke oire noou ra.

8 E kia akamaataia toou kotinga e to Atua ra e Iehova, tana oki i taputou mai i to ai metua ra, e kua oronga mai i te enua katoa noou, tana i tuatua mai ki to ai metua ra e, e oronga mai aia;

9 Kia akono koe i teia katoa nei au akauenga e kia rave tikai i te reira, taku e akaue atu kia koe i teianei rā; kia inangaro koe i to Atua ra ia Iehova ma te aere tamou na tona arataa ra; ka akataka rai koe i e toru rai puke oire noou, kua taka katoa oki nga oire e toru nei:

10 Kia kore oki te toto ara kore e taʼe i toou enua ra, ta to Atua ta Iehova e oronga mai noou ei nooanga, ko te iri aea te toto ki runga ia koe ra.

11 Kia makitakita ra tetai tangata ki tona tangata tupu; e kua moetapapa iaia, e kua tu aia ki runga i ta iaia, e kua mate takiri iora aia; ka oro ei ki tetai i eianei puke oire;

12 Na te aronga pakari o tona oire ra e unga i te tangata e tiki iaia e arataki mai, ka tuku atu ei iaia ki te rima o te akamopuku, kia mate aia ra.

13 Auraka to mata e akara aroa atu iaia; e akataka ke ra koe i te ara ra i te toto ara kore ra ia Iseraela; kia meitaki oki koe ra.

14 Auraka koe e kiriti i te kena kainga o to taeake, i ta te aronga taito i tanu i toou na kainga, te ka rauka ia koe i te enua ta to Atua ra ta Iehova e oronga mai noou ei nooanga.

15 Kare e tika kia tu ua mai te kite okotai i te tangata nei no te au kino katoa e te au ara katoa, i te au ara ravarai i ara ai aia ra: tei te tuatua a nga kite toko rua, e tei te tuatua rai a nga kite toko toru ra, ka riro ei taua mea ra ei tuatua-mou.

16 Kia tu ua mai te kite pikikaa ki tetai tangata, e kua tapepe maira iaia i te ara;

17 E tu katoa aua nga tangata, na raua taua tuatua ra, ki mua ia Iehova, ki mua i te aroaro o te kau taunga, e te au akava i te reira tuatau;

18 E na te au akava e akamakitoro marie: e i na, e kite pikikaa taua kite ra, e kua tuatua pikikaa aia i tona taeake;

19 Mei tana i manako e rave i tona taeake ra, e pera katoa kotou iaia: pou atura ia koe i reira te kino i rotopu ia kotou.

20 Ka riro oki tetai papaki i te kite, e riro i te mataku; e kare atura e rave akaou i taua kino ra i rotopu ia kotou ra.

21 Auraka to mata e akara aroa atu; i te mate takiri rava ra kia mate katoa ïa, e mata ra ei mata katoa ïa, e nio ra ei nio katoa ïa, e rima ra ei rima katoa ïa, e vaevae ra ei vaevae katoa ïa.