Salamo

63 E TE Atua, ko koe oki toku Atua: ka kimi vave au ia koe: te kaki nei toku vaerua ia koe: te anoano nei toku kopapa ia koe, i te enua marō nei, e te kaki vai, e te vai kore,

2 Kia kite au i to mana e to kakā, mei iaku i kite ia koe i te ngai-tapu ra.

3 E meitaki maata oki tei to takinga-meitaki i tei te ora, ka akameitaki ei toku vaa ia koe.

4 Ka pera rai au i te akameitaki ia koe i toku nei ora anga; ka apai au i oku puke rima i toou ra ingoa.

5 Ka merengo toku vaerua mei tei te tongaua e te matu ra, ka akapaapaa oki toku vaa ia koe ma te ngutu rekareka;

6 Kia manako au ia koe i runga i toku roi, kia akamaara au ia koe i te au atianga ra.

7 Ko koe oki tei tauturu mai iaku ra: e teianei ka rekareka au i roto i to maru peau ra.

8 Te topiri tikai nei toku vaerua kia koe: e te mouia nei au e to rima katau ra.

9 Ko te aronga ra e kimi mai iaku kia mate ra, ka riro ïa ratou ki raro roa i te enua ra.

10 Ka tukuia ratou na te ririnui o te koke ra; ka riro ratou ei tuanga na te suoli.

11 Ka rekareka ra te ariki i te Atua: te aronga ravarai e taputou iaia ra, ka rekareka ïa; e te vaa o tei tapikipiki ra, ka momaniia ïa.