Levitiku

18 KUA tuatua mairā Iehova kia Mose, na ko maira,

2 E karanga atu ki te tamariki a Iseraela, e na ko atu koe kia ratou, Ko au to kotou Atua ra ko Iehova.

3 Auraka kotou e rave i te au peu o te enua ra o Aiphiti, i ta kotou i noo ra: e auraka kotou e rave i te au peu o te enua nei o Kanaana, taku e arataki ia kotou nei; auraka katoa kotou e aaere i ta ratou au akonoanga:

4 Ko taku ra au tuatua-tau ta kotou ïa e rave, e taku ra au akonoanga ta kotou ï e tāpu, e na reira kotou i te aere: ko au to kotou Atua ra ko Iehova. 5 E tāpu oki kotou i taku au akonoanga, e taku ra au tuatua-tau; kia akono oki te tangata i te reira ra, ka ora aia i reira: ko au ko Iehova.

6 Auraka tetai o kotou e akavaitata e moe i te vaine i piri roa mai kiaia, i te kopu-tangata ra: ko au ko Iehova.

7 Auraka koe e moe i te vaine a to metua tane, e toou ra metua vaine mou; auraka koe e moe iaia; ko toou ïa metua vaine tikai. 8 Auraka koe e moe i te vaine a to metua tane: te moe ra oki toou metua tane iaia. 9 Auraka koe e moe i to tuaine, i te tamaine a to metua tane, e te tamaine a to metua vaine ra, ko tei anau i te ngutuare tikai, e ko tei anau i tetai ngai ke, auraka koe e moe ia ratou. 10 Auraka koe e moe i te tamaine a to tamaiti, e te tamaine a to tamaine ra: no roto oki raua ia koe na.

11 I te tamaine a te vaine a to metua tane, ta to metua tane i anau ra, e tuaine oki aia noou, auraka koe e moe iaia.

12 Auraka koe e moe i te tuaine o to metua tane: e tuaine oki aia no to metua tane.

13 Auraka koe e moe i te taeake o to metua vaine; e taeake oki aia no to metua vaine.

14 Auraka koe e moe i te vaine a te taeake o to metua tane ra, tana e moe ra: e metua vaine oki aia noou na.

15 Auraka koe e moe i to unonga vaine ra: e vaine ia aia na to tamaiti; auraka koe e moe iaia.

16 Auraka e moe i te vaine a to taeake, te moe ra oki to taeake iaia.

17 Auraka koe e moe kapipiti i te vaine e te tamaine a taua vaine ra, e auraka katoa koe e rave i te tamaine a tana tamaiti, e te tamaine a tana tamaine ra; te piri ua ra oki ratou iaia: e mea kino ïa.

18 E auraka koe e moe i te taeake o to vaine, ka taeko uaʼi i to vaine i te moe anga iaia, te ora ra to vaine ra. 19 Auraka koe e akavaitata ua atu e moe i te vaine, i te akataka angaia i tona viivii anga ra.

20 Auraka katoa koe e moe i te vaine na tetai ke, ka akaviivii ei koe ia koe uaorai kiaia.

21 Auraka takiri tetai o toou uanga e apaiia kia Moloka, auraka koe e akanoa i te ingoa o toou ra Atua: ko au ko Iehova.

22 Auraka koe e moe i te tane, mei te moe i te vaine ra: e mea viivii roa ïa.

23 Auraka koe e akaviivii ia koe uaorai i te moe anga i te puaka; auraka oki te vaine e oronga iaia uaorai ki te puaka: e mea viivii te reira.

24 Auraka kotou e akaviivii ia kotou uaorai i taua au mea katoa nei; ko te au mea oki teia i viivii ei te au iti-tangata taku e vaitata i te tuaru i mua ia kotou nei:

25 Kua viivii oki te enua: ka tutaki ei au i tana ara ki runga iaia uaorai, e na te enua uaorai e akaruaki i tona au tangata ki vao.

26 E tenana, e akono kotou i taku au akonoanga, e taku ra au tuatua-tau, e auraka rava te tangata tupu, e te tangata ke katoa e tuitarere ua ki roto ia kotou, e rave i taua au mea viivii katoa nei:

27 (Kua rave oki te au tangata no taua enua ra i taua au mea viivii katoa ra, ou kotou, e kua viivii te enua:)

28 Kia kore katoa te enua e akaruaki ia kotou ki vao, kia akaviivii kotou i taua enua ra, mei tana i akaruaki i te au iti-tangata ki vao, ou kotou ra. 29 Ko te ka rave oki i taua au mea viivii ra, taua aronga e rave ra, ka tipu keia ïa i to ratou ra iti-tangata.

30 E tenana, e akono kotou i taku akonoanga, e auraka rava kotou e rave ua atu i tetai i taua au peu viivii ra, i tei raveia i muatangana ra, ou kotou; auraka oki kotou e akaviivii ia kotou uaorai i te reira: ko au to kotou Atua ra ko Iehova.