Te Au Akava

2 KUA aere maira tetai karere na Iehova mei Gilagala mai ki Bokima, e kua tuatua maira, I arataki mai au ia kotou mei Aiphiti mai, e kua tae kotou iaku ki te enua, taku i taputou atu ki to kotou ai metua ra; e kua tuatua oki au e, Kare rava taku nei koreromotu ia kotou na e akaatikauia e au e tuatau ua atu: 2 Auraka ra kotou ei akaaiteite anga tuatua i to teianei enua, e vavaʼi ra kotou i ta ratou au atarau; kare akenei ra kotou i akarongo i toku reo; eaa kotou i peraʼi?

3 E teianei, teia katoa taku tuatua kia kotou, kare au e tuaru ke atu ia ratou na mua ia kotou ra, ka riro ra ratou ei tara i to kotou kaokao, e to ratou au atua ka riro ïa ei ereere ia kotou. 4 E ope akera teia katoa nei au tuatua i te karangaia e taua karere a Iehova ki te au tamariki ravarai a Iseraela ra, kua akateitei atura te tangata katoa i to ratou reo, aue atura.

5 Tapa iora ratou i taua ngai ra ia Bokima. E kua apai ratou i te atinga na Iehova i reira.

6 I te tuku angaia e Iosua taua au tangata ra, aere anake atura te tamariki a Iseraela e noo i te enua, ki tana uaorai tuanga, ki tana uaorai tuanga, e pini ua ake taua au tangata ra.

7 Kua akamori oki te tangata ia Iehova e ope rava akera to Iosua au rā, e ope rava akera oki te au rā o te aronga pakari i toe i te ao i muri ake ia Iosua ra, ko tei kite i te au angaanga mamaata ta Iehova i rave ia Iseraela ra.

8 E mate iora taua tavini o Iehova ra ko Iosua te tamaiti a Nuna ra, okotai anere okotai ngauru ona mataiti.

9 E kua tanu iora ratou iaia i te pae o tona kainga i Timenata-heresa, i te maunga ra ko Epheraima, i te pae i apatokerau o te tuaivi ra ko Gaasa.

10 E ope rava akera oki te reira uki i te kapiti katoaia ki to ratou ai metua; e tupu akera oki tetai uki i muri ake ia ratou, kare ïa i kite ia Iehova, e tana katoa ra au angaanga i rave ia Iseraela ra.

11 Kua rave iora te tamariki a Iseraela i te kino ki mua i te mata o Iehova, kua araara i te au Baala ra:

12 Akaruke atura ratou i te Atua o to ratou ai metua ra ia Iehova, ko tei arataki mai ia ratou mei te enua maira mei Aiphiti, e kua aru ratou i te au atua ke, i te au atua no te au tangata i vaitata ia ratou e pini ua ake, kua tupou atura ratou kia ratou, e akakoko atura ia Iehova kia riri.

13 Akaruke iora ratou ia Iehova, e araara atura ia Baala e te au Asetoreta ra.

14 E otooto akera to Iehova riri ia Iseraela, e kua tuku atura aia ia ratou ki te rima o te aronga noni, i tei noni mai ia ratou ra, e kua oko aia ia ratou ki te rima o to ratou au enemi ra e pini ua ake; kare rava atura ratou i mou ki mua i to ratou au enemi ra.

15 E te au ngai katoa ta ratou i aere ra, kua marōrō te rima o Iehova ia ratou kia kino, mei ta Iehova i tuatua maira, i tana oki i taputou mai kia ratou ra; e kua tumatetenga rava ratou ra.

16 Kua akatupu rā Iehova i te au akava, ko tei akaora ia ratou i te rima o te aronga i noni mai ia ratou.

17 Kare rai ratou i akarongo ki to ratou au akava; tatipake atura ra i te aru anga i te au atua ke ra, e kua tupou atura kia ratou. Kua akaruke vave iora ratou i te arataa i aereia e to ratou ai metua, tei akono i te au akauenga a Iehova ra; kare ratou i pera.

18 Kia akatupu oki a Iehova i te au akava no ratou ra, e tu a Iehova i vaitata i taua akava ra, e kua akaora aia ia ratou i te rima o to ratou au enemi, e ope ua atu te au rā o taua akava ra, i tataraara oki a Iehova i to ratou aue i te aronga i tinai-mate mai ia ratou, e te akaao ia ratou ra.

19 Kia mate ra taua akava ra, kua oki akaou rai ratou, e kua rave i te kino, iti ake ta to ratou ai metua i rave, i te aru anga i te au atua ke, i te araara anga, e te tupou anga ki raro kia ratou ra; kare ratou i akaruke i ta ratou ravenga kino e to ratou aerenga māro. 20 I otooto ei te riri o Iehova ia Iseraela; e kua tuatua akera aia, No te mea kua ara teianei aronga i taku nei koreromotu i taku i akaue atu ki to ratou ai metua, e kare akenei i akarongo mai i toku nei reo;

21 Kare atura au e tuaru i te au iti-tangata i vaooia e Iosua, ka mate ei aia ra, na mua ia ratou;

22 Kia kitea ia ratou ta Iseraela akono anga i te arataa o Iehova, me aere ratou na reira, mei ta to ratou ai metua i akono ra, e te kore anga.

23 I vaooiaʼi e Iehova taua au iti-tangata ra i kore ei i tuaru vave ia ratou; kare oki ratou i tukuia mai e ia ki te rima o Iosua.