Genese

24 KUA ruaine a Aberahama, kua manganui roa tona mataiti: i akameitaki ana oki a Iehova ia Aberahama i te au mea katoa ra.

2 Kua karanga aturā Aberahama ki te tavini pakari i tona ra ngutuare, tei iaia te tuatua i te au mea katoa nona ra, Ka tuku mai ana i to rima ki raro ake i taku ūā nei:

3 E akataputou atu au ia koe ia Iehova, i te Atua o te rangi, e te Atua o te enua nei, e auraka koe e rave i tetai vaine na taku tamaiti no roto i te au tamaine a te ngati Kanaana, taku e noo nei:

4 E aere ra koe ki toku enua ra, e toku kopu-tangata, ka rave ei i tetai vaine na taku tamaiti na Isaaka.

5 E kua tuatua maira taua tavini ra kiaia, Peneiake ko te kore e tika i te vaine i te aru mai iaku ki teianei enua: ka akaoki ainei au i taau tamaiti ki te enua no reira mai koe na?

6 Kua karanga aturā Aberahama, Auraka roa koe e akaoki i taku tamaiti ki reira.

7 Na Iehova, na te Atua no te rangi, ko tei arataki mai iaku mei te ngutuare mai o toku ra metua, e mei te enua maira a anau ei au ra, ko tei tuatua mai kiaku, e kua taputou mai oki kiaku, na ko maira, Ka oronga au i teianei enua no toou ra uanga; nana ïa e tono i tana angela na mua ia koe, e ka rauka ia koe tetai vaine na taku tamaiti i reira.

8 Kia kore ra e tika i taua vaine ra e aru maira ia koe na, kare rai koe e apa i taua taputou naku nei i reira: auraka roa ra koe e akaoki i taku tamaiti ki reira ra.

9 Kua tuku maira taua tavini ra i tona rima ki raro ake i te ūā o tona pu o Aberahama, kua taputou iora i taua tuatua ra.

10 Kua rave taua tavini ra i nga kamela a tona pu okotai ngauru, aere atura, tei tona rima oki te au apinga ravarai a tona pu, tu akera aia, aere atura ki Mesopotamia ki te oire o Nahora.

11 E kua akatuturi iora aia i te au kamela ki raro ki vao mai i taua oire ra, i vaitata ki tetai ruavai i te aiai, i te tuatau e tae mai ei te vaine tini e uti i te vai.

12 E kua karanga atura aia, E Iehova e, e te Atua no toku pu no Aberahama e, te pure nei au ia koe, e akamanuia mai koe iaku i teianei rā, e takinga-meitaki mai koe i toku pu ia Aberahama. 13 I na, te tu ua nei au i te ruavai nei; e te aere mai nei te au tamaine a te au tangata o te oire nei e uti i te vai:

14 E teianei, ko te vaine taku e karanga atu e, Ka tuku mai ana taau āriki vai kia inu au; e kia tuatua mai aia e, Ka inu, e ka akainu katoa au i te au kamela naau, kia riro aia i te vaine tikai i akonoia e koe na to tavini na Isaaka; ka kite oki au i reira e, kua takinga-meitaki mai koe i taku pu.

15 E i na, kare rai i mutu taua tuatua nana ra, kua aere mairā Rebeka, ta Betuela i anau, ta te tamaiti a Mileka, te vaine a Nahora, te tuakana o Aberahama ra, ma tana āriki vai i runga i tona pakuivi.

16 E mata meitaki roa to taua tamaine ra, e paretenia, kare oki i kiteia e te tangata. E aere atura aia ki raro i taua ruavai ra, e akaki iora i tana āriki vai, e kua aere maira ki runga.

17 Kua oro atura taua tavini ra kiaia, na ko atura, O mai ana i tetai manga vai e inu, i te āriki vai naau na.

18 Kua tuatua maira aia, Ka inu, e tama: kua tuku vave maira i tana āriki vai ki raro, ki runga i tona rima, kua akainu maira iaia.

19 E oti akera aia i te akainuia e ia, kua na ko maira, Ka uti katoa au i te vai na te au kamela naau, e kia iu anake ratou.

20 Kua riringi nui aia i tana āriki vai ki roto i te kumete, oro akaou atura ki te ruavai e uti rai i te vai, e kua uti oki na tana au kamela katoa ra.

21 Te va ua ra taua tangata ra iaia, ma te muteki ua, kia kite aia i te manuia anga i tona tere, e te kore anga, ia Iehova ra.

22 E kia inu anake taua au kamela ra e iu iora, kua rave akera taua tangata ra i te poe auro, e tau i te afa sekela, e nga tapeka auro e rua no te rima o taua vaine ra, e tau ïa i nga sekela okotai ngauru;

23 Kua karanga atura aia, E tamaine koe naai? e akakite mai ana koe kiaku. Ka o ainei matou ki te are o to metua kia moe?

24 Kua tuatua maira aia kiaia, E tamaine au na Betuela, te tamaiti a Mileka, tana i anau ia Nahora ra.

25 E kua na ko maira oki aia kiaia ra, E mauku ta matou, e te kai maata, e ka o oki i to matou are kia moe.

26 Kua tupou iora taua tangata ra ki raro, akamori iora ia Iehova,

27 Na ko atura, Kia akameitakiiā Iehova te Atua no toku pu no Aberahama, kare akenei aia i tukumoe i tona takinga-meitaki, e tana tuatua-mou i toku pu ra: ko au i te arataa ra, kua arataki mai a Iehova iaku i te ngutuare o te kopu-tangata a toku pu ra.

28 Kua oro atura taua tamaine ra, akakite atura ki to te ngutuare o tona metua vaine ra i taua au tuatua nei.

29 E tungane to Rebeka, ko Labana te ingoa: e kua oro iorā Labana ki vao ki taua tangata i te ruavai ra.

30 E kia akara maira aia i taua poe ra, e nga tapeka i runga i te rima o tona tuaine ra, e kia akarongo mai aia i te reo o tona tuaine ra o Rebeka, i te tuatua anga atu e, I na ko mai taua tangata ra kiaku; kua oro iora aia ki taua tangata ra; e i na, te tu ua ra aia i vaitata ki te au kamela i taua ruavai ra.

31 E kua karanga atura aia, Ka tapae mai ana, e tera tangata i akameitakiia e Iehova e; eaa koe e tu uaʼi ki vao? e are teateamamao toku, e vairanga oki to te au kamela.

32 Kua tomo maira taua tangata ra ki roto i te are: kua kiriti akera oki i te nooanga i runga i te au kamela, apai maira i te mauku, e te kai, na taua au kamela ra, e te vai ei orei i tona vaevae, e to te au tangata katoa no tona ra tere.

33 E tukuia atura oki te kai ki mua i tona aroaro; kua tuatua maira ra aia, Kare au e kai vave, e akakite ana ra au i toku nei tere. E kua karanga atura aia, Ka akakite mai.

34 Kua tuatua maira aia, E tavini au no Aberahama.

35 E kua akameitaki roa mai a Iehova i taua pu noku nei; e kua riro aia ei tangata maata: e kua oronga mai aia te mamoe, e te puaka-toro nana, e te ario, e te auro, e te tavini tane, e te tavini vaine, e te kamela, e te asini.

36 E e tamaiti ta taua pu noku nei, na tana vaine na Sara i anau i toku pu i tona ruaine anga ra: e kua orongaia e ia tana katoa ra au apinga, teia iaia.

37 E kua akataputou maira toku pu iaku, na ko maira, Auraka koe e rave i tetai vaine na taku tamaiti, no te au tamaine a te ngati Kanaana ra, no ratou te enua taku e noo nei.

38 E aere ra koe ki te ngutuare o toku metua, e ki toku kopu-tangata ra, ka rave ei i tetai vaine na taku tamaiti.

39 Kua karanga atura au ki taua pu noku ra, Peneiake ko te kore taua vaine ra e aru mai iaku.

40 E kua tuatua maira aia kiaku, Na Iehova, taku e na mua i te aaere nei, nana ïa e tono i tana angela na mua ia koe, ei akamanuia i tou tere; e ka rauka ia koe tetai vaine na taku tamaiti, no roto i toku uaorai kopu-tangata, e no te ngutuare o toku ra metua.

41 Kare ra koe e apa i taua taputou naku nei i reira, me tae koe ki toku kopu-tangata, e kare ratou e oronga mai i tetai vaine kia koe, kare rai koe e apa i taua taputou naku nei i reira.

42 I nakonei oki, kua tae mai au ki taua ruavai akera, e kua na ko oki au; E Iehova e, te Atua no toku pu no Aberahama, kia akamanuia mai koe i toku tere taku e aere nei:

43 I na, te tu ua nei au i teianei ruavai; e teianei, kia aere mai tetai paretenia e uti i te vai, e kia karanga atu au kiaia e, E o mai ana i tetai manga vai naku e inu, i te āriki vai naau na;

44 E kia tuatua mai aia kiaku e, Ka inu, e ka uti katoa au i te vai na te au kamela naau; kia riro aia i te vaine i akonoia e Iehova, na te tamaiti a toku pu nei.

45 E kare i mutu taku tuatua i roto iaku uaorai, i na, kua aere mairā Rebeka ma tana āriki vai i runga i tona pakuivi; aere atura aia ki raro i taua ruavai ra, kua uti iora i te vai: kua karanga atura au kiaia, O mai ana e inu au.

46 E kua tuku vave iora aia i tana āriki i runga i tona pakuivi ra, e kua na ko maira, Ka inu; e ka akainu katoa atu au i te au kamela naau: kua inu au; e kua akainu katoa iora aia i te au kamela.

47 E kua ui atura au kiaia, na ko atura, E tamaine koe naai? Kua tuatua maira aia, E tamaine au na Betuela, te tamaiti a Nahora ra, ta Mileka i anau iaia ra. Kua tuku atura au i te poe ki runga i tona putaiu, e nga tapeka ki runga i tona rima.

48 E tupou iora au ki raro, e akamori atura ia Iehova, e akameitaki atura au ia Iehova i te Atua no toku pu no Aberahama, ko tei arataki mai iaku na te ara tika kia rauka te tamaine a te tuakana o toku pu ra, ei vaine na tana tamaiti.

49 E teianei, kia tika ia kotou i te akono i te takinga-meitaki, e te tuatua-mou i toku pu, ka akakite mai; e kare ra, ka akakite mai; kia ariu au ki te rima katau, e kare ra, ki te rima kaui.

50 Kua tuatua mairā Labana raua ko Betuela i reira, na ko maira, Na Iehova taua tuatua nei; kare oki e tika ia matou kia tuatua ua atu i te meitaki, e te kino.

51 I na tera mai a Rebeka, tei mua i toou aroaro na, ka arataki, ka aere, ei vaine na te tamaiti a toou pu i ta Iehova i tuatua na.

52 E rongo akera te tavini o Aberahama i taua tuatua na ratou ra, kua tupou iora aia ki raro i te one, akamori atura ia Iehova.

53 E kua rave akera taua tavini ra i te poe ario, e te poe auro, e te kakau, e kua apai atura no Rebeka: kua apai katoa oki aia i te apinga meitaki no te tungane, e no te metua vaine nona ra.

54 Kua kaikai iora ratou i reira, e inu oki, koia e te au tangata katoa nona ra, e moe iora i taua po ra; e popongi akera, kia tu ratou ki runga ra, kua karanga atura aia ra, E tuku ake ana kotou iaku, e aere au ki toku pu.

55 Kua tuatua maira tona tungane e te metua vaine nona ra, E vaoo mai ana i te tamaine nei, e noo ana matou i etai puke rā, kia po ngauru; ei reira aia ka aere atu ai.

56 Kua karanga atura ra aia, Auraka e pupuru iaku, no te mea kua akamanuia mai a Iehova i toku tere nei; e tuku ake kotou iaku, ka oki au ki toku pu.

57 E kua tuatua maira ratou, E karanga atu na matou ki taua tamaine nei, ka ui atu ei kiaia uaorai.

58 E kua karanga atura ratou kia Rebeka, na ko atura kiaia, E aere katoa ainei korua ko taua tangata nei? Kua tuatua maira aia, Ka aere rai au.

59 Kua tuku maira ratou ia Rebeka to ratou tuaine kia aere, e tona ikiiki, e taua tavini o Aberahama ra, e tona ra au tangata.

60 E kua akaora maira ratou ia Rebeka, na ko maira kiaia, Ko to matou tuaine koe, kia riro koe ei mano tini kore, e kia riro te ngutupa oire o to ratou au enemi ki toou ra uanga.

61 E kua tu akerā Rebeka, e tona au tavini vaine, na runga atura ratou i te au kamela, e aru atura i taua tangata ra. Rauka iorā Rebeka i taua tavini ra, e aere atura aia.

62 Kua tae mairā Isaaka i te ara i Berelahai-roi; e noo oki aia i te pae enua i apatonga ra.

63 E kua aere aturā Isaaka ki vao i te kainga i te aiai e pure; kua nānā akera tona mata e akara, e i na, te aere maira te au kamela.

64 Kua nānā akera oki a Rebeka i tona mata, e kite atura aia ia Isaaka, kua eke iora ki raro mei runga mai i te kamela ra;

65 Kua karanga atura aia ki taua tavini ra, Koai tera ra tangata e aere mai na roto mai i te kainga e aravei ia tatou? Kua tuatua maira taua tavini ra, Ko toku pu ïa. Kua rave iora aia i tetai tapoki-mata, kua tapoki iora iaia uaorai.

66 Kua akakite atura taua tavini ra kia Isaaka i te au mea katoa tana i rave ra.

67 E kua arataki aturā Isaaka iaia ki roto i te puakapa o tona metua vaine o Sara, e akariro atura aia ia Rebeka ei vaine tikai nana; e e vaine inangaro oki aia nana ra: e i pumaana akerā Isaaka i te matenga o tona metua vaine ra.