Exodo

29 TERA taau mea e rave ia ratou, ei akatapu anga atu ia ratou, kia rave ratou i te taoonga taunga ki mua iaku nei: E rave koe i tetai puakatoro ou, e nga mamoe toa kino kore e rua,

2 E te kai akaopue koreia ra, e te areto akaopue kore irokia ki te inu ra, e te uefa akaopue kore i tainuia ki te inu; ei faraoa sitona anake ïa kia anga koe ra.

3 Ka tuku ei koe i te reira ki roto i te kete okotai, ka apai mai ei i roto rai i te kete ra, e te puakatoro e nga mamoe toa e rua ra.

4 E ka arataki mai koe ia Aarona e tana au tamariki ki te ngutupa o te Are uipaanga ra, ka paî ei ia ratou ki te vai,

5 Ka rave ei i te kakau ra, ka akakakau ei koe ia Aarona ki te piriaro, e te pona roroa o te tiputa, e te tiputa, e te tapoki-umauma, ka tamou ei i te tiputa ki runga iaia, i te tatua manea o te tiputa ra.

6 Ka tuku ei koe i te pare ki rungao i tona mimiti, ka tuku ei oki i te korona tapu ki rungao i te pare.

7 Ei reira koe e rave ei i te manongi tainu ra, ka riringi ei ki runga i tona mimiti, ei akatainu iaia ra.

8 E arataki mai oki koe i te au tamariki nana, ka akakakau ei ki te au piriaro.

9 Ka akatatuaʼi koe ia ratou ki te tatua ko Aarona, e tana au tamariki, e tuku oki i te pare ki runga ia ratou; e ka akonoia te taoonga taunga ei peu tikai no ratou: e pera koe i te akataoonga anga ia Aarona e tana au tamariki.

10 E taki mai koe i te puakatoro ki te ngutupa o te Are uipaanga ra; e tuku oki a Aarona e tana au tamariki i to ratou rima ki runga i te mimiti o taua puakatoro ra.

11 E naau e ta i taua puakatoro ra.

12 Ka rave ei koe i tetai manga toto o taua puakatoro ra, ka tuku ei ki runga i te au tara o te atarau i to matikao-rima na, ka riringi ei i taua toto katoa ra ki raro i te tumu o te atarau ra.

13 Ka rave oki koe i te ekaeka tongaua katoa ki rungao i te au mea i roto ra, e tei piri ki rungao i te ate ra, e nga pukuatu ra, e te tongaua e piri ki te reira ra, ka taʼu ei ki te ai ki runga i te atarau ra.

14 Kareka te kiko o taua puakatoro ra, e te kiri, e te repo ra, e taʼu koe i te reira ki te ai i vao mai i te puakapa ra: e atinga no te ara ïa.

15 E rave oki koe i tetai mamoe toa ra; e tuku oki a Aarona e tana au tamariki i to ratou rima ki runga i te mimiti o taua mamoe toa ra.

16 Ka ko oki koe i taua mamoe toa ra, e rave oki koe i te toto, ka pîpî ei e pini ua ake taua atarau ra.

17 E kotikoti rikiriki oki koe i taua mamoe toa ra, ka orei ei i te au mea i roto ra, e nga vaevae katoa, ka akaputu ei, e taua au kotinga rikiriki ra, e te mimiti:

18 Ka taʼu ei e kia pou takiri roa taua mamoe toa ra ki runga i te atarau ra: e atinga karakaratio na Iehova; ei mea aunga kakara, e atinga ai ïa, na Iehova.

19 E rave katoa oki koe i tetai mamoe toa; e tuku oki a Aarona e tana au tamariki i to ratou rima ki rungao i te mimiti o taua mamoe toa ra.

20 Ei reira koe e ko ei i taua mamoe toa ra, ka rave ei i tetai manga toto, ka tuku ei ki runga i te tapa o to Aarona taringa katau, e ki runga i te tapa o to te au tamariki ra taringa katau, e ki runga i te matikao maata o to ratou ra rima katau, e ki runga i te maikao maata o to ratou ra vaevae katau, ka pîpî ei i te toto ra ki runga i te atarau e pini ua ake.

21 E rave oki koe i tetai manga toto i rungao i te atarau ra, e tetai manga manongi tainu ra, ka pîpî ei ki runga ia Aarona, e ki runga i tona kakau, e ki runga i tana au tamariki, e ki runga katoa i te kakau o taua au tamariki nana ra; tapu atura oki aia, e tona ra kakau, e tana au tamariki, e te takau katoa o te au tamariki nana ra.

22 E rave oki koe i te matu e te iku o taua mamoe toa ra, e te tongaua i rungao i te au mea i roto ra, e te ekaeka ki rungao i te ate ra, e nga pukuatu ra, e te tongaua e piri ki te reira, e te ūā mua katau ra; e mamoe toa akatoonga oki te reira:

23 E okotai oki areto, okotai oki areto tainuia ra, okotai oki uefa no roto rai i te kete kai akaopue koreia ra i mua i te aroaro o Iehova ra:

24 Naau e tuku i taua au mea katoa ra ki roto i te rima o Aarona, e ki roto i te rima o tana au tamariki; kia ruruia taua au mea ra ei atinga-ruru ki mua ia Iehova ra.

25 Ei reira koe e rave ei i taua au mea ra i to ratou rima, ka taʼu ei ki te ai ki rungao i te atarau, ki runga i te atinga karakaratio ra, ei mea aunga kakara ki mua ia Iehova: e atinga ai ïa na Iehova.

26 E rave oki koe i te uma i te mamoe toa akataoonga anga ia Aarona, ka ruru ei ei atinga-ruru ki mua ia Iehova ra: ko taau ïa tuanga te reira ra.

27 E akatapu koe i te uma i ruruia ei atinga-ruru, e te ūā i apaiia ki runga ei atinga-apaiia ki runga, no te mamoe toa i akataoongaiaʼi a Aarona, e tana au tamariki ra:

28 Na Aarona te reira e na tana au tamariki ei akonoanga e tuatau ua atu, ta te tamariki a Iseraela ïa: e atinga-apaiia ki runga te reira: ei atinga-apaiia ki runga na te tamariki a Iseraela, no ta ratou au atinga akameitaki ra, ko ta ratou ïa atinga-apaiia ki runga na Iehova ra.

29 E riro oki te kakau tapu o Aarona ra no tana au tamariki i muri ake iaia, to ratou ïa kakau kia akamainuia ratou e kia akataoongaia.

30 E te tamariki nana ko tei paʼu iaia ei taunga ra, kia po itu aia i te kakau anga i taua kakau ra, ka aere ei aia ki roto i te Are uipaanga, ka rave ei i te taoonga i roto i te ngai tapu ra.

31 Ei reira koe ka rave ei i te mamoe toa akataoonga ra, ka tunu ei i tona kiko ki roto i tetai ngai tapu.

32 E na Aarona e na nga tamariki nana e kai i te kiko o taua mamoe toa ra, e te areto i roto i te kete ra, ei te ngutupa o te Are uipaanga ra kai ei.

33 Na ratou e kai i te reira, tei akariroia ïa ei tapokiangaara, ei akataoonga, e ei akatapu ia ratou: kare rava ra tetai tangata ke atu e kai, no te mea e mea tapu ïa.

34 E kia toe tetai manga i taua kiko akataoonga ra, e te areto, kia popongi ake, e taʼu koe i taua vaʼi i toe ra ki te ai; auraka e keingaia, no te mea e mea tapu.

35 E akapera atu koe ia Aarona, e nga tamariki nana, i te au mea katoa taku i akaue atu kia koe na; kia po itu koe i te akataoonga anga ia ratou.

36 Ei puakatoro tarangaara taau e oronga i te au rā katoa ra, ei tapokiangaara; e ka tamā koe i taua atarau ra; kia oti taau tapokiangaara i te apai no taua atarau ra, ei reira koe akatainu ei i te reira kia tapu.

37 Kia po itu koe i te apai anga i te tapokiangaara ki runga i te atarau, kia tapu ïa, e ka riro ei atarau tapu roa: ko te akatukia ua atu i taua atarau ra, ka tapu ïa.

38 Teia taau e apai ki rungao i taua atarau ra; kia rua punua mamoe mataiti okotai, auraka ei rā e tukua.

39 Tetai punua mamoe, ei te popongi koe apai ei; e tetai punua mamoe ra, ei te aiai koe apai ei i te reira:

40 E to tei muatangana punua mamoe ra, e kapiti atu i tetai omera faraoa i irokia ki te inu reruia okotai kuata ina; e tetai kuata ina wina ei atinga-inu.

41 E tetai punua mamoe ra, ei te aiai koe apai ei, e te atinga-kai katoa mei taau i apai i te popongi ra, e te atinga-inu katoa o te reira ra, e atinga ai aunga kakara ïa na Iehova.

42 Ei atinga karakaratio tamouia teia e ope ua atu to kotou au uki ra, ei te ngutupa o te Are uipaanga ra ki mua i te aroaro o Iehova; ei reira au e aravei ei ia kotou, ka tuatuaʼi oki kia koe.

43 E ei reira au e aravei ei i te tamariki a Iseraela, e ka tapu taua ngai ra i toku kakā.

44 E akatapu oki au i te Are uipaanga ra, e te atarau: e akatapu katoa oki au ia Aarona e tana au tamariki, kia rave ratou i te taoonga taunga iaku nei.

45 E ka noo au i rotopu i te tamariki a Iseraela, e ei Atua au no ratou.

46 E kite oki ratou e, ko au to ratou Atua ko Iehova, ko tei arataki mai ia ratou mei te enua maira mei Aiphiti, kia noo au i rotopu ia ratou: ko to ratou ïa Atua ko au, ko Iehova.