Genese

25 KUA akaipoipo akaou aturā Aberahama i tetai vaine, ko Ketura tona ingoa.

2 E anau akera tana iaia ko Zimerana, e ko Iokasana, e ko Medana, e ko Midiana, e ko Isabaka, e ko Sua.

3 E anau akera ta Iokasana ko Seba, e ko Dedana: e ko ta Dedana ra au tamariki, ko te Asuri ïa, e te Letusi, e te Leumi.

4 E ta Midiana ra tamariki; ko Epha ïa, e ko Ephera, e ko Hanoka, e ko Abida, e ko Eledaa. E tamariki anake ïa na Ketura.

5 Kua apai aturā Aberahama i tana au apinga katoa na Isaaka.

6 Kareka nga tamariki a Aberahama, a nga vaine tavini nana ra, e apinga ta Aberahama i oronga atu kia ratou; e te ora ra aia, i tono ke ei aia ia ratou ki te pae i te itinga o te rā ra, kia taka ke ratou i tana tamaiti ia Isaaka, i te enua i te itinga o te rā.

7 Teia te au rā o to Aberahama au mataiti i te ora anga nei, okotai anere e itu ngauru e rima ara i te mataiti.

8 Unui rava akerā Aberahama, mate rava akera i te ruaine meitaki anga ra; kua ruaineia te tangata, kua maata roa tona mataiti; e kapiti katoaia atura aia ki tona uaorai iti-tangata ra. 9 E na nga tamariki nana, na Isaaka raua ko Isemaela, aia i tanu ki roto i te ana i Makapela; i te kainga o Epherona te tamaiti a Zohara ngati Heta ra, ko tei anga tika ia Mamera ra;

10 I te kainga i okoia e Aberahama i te ngati Heta ra. I reira to Aberahama tanu angaia, e tana vaine ia Sara.

11 E mate aturā Aberahama, kua akameitaki maira te Atua i tana tamaiti ia Isaaka; e noo oki a Isaaka i Berelahai-roi. 12 Teia te tuatua ia Isemaela, te tamaiti a Aberahama, ta te vaine Aiphiti, ta Hagara, te tavini o Sara, i anau ia Aberahama.

13 Teia oki te ingoa o nga tamariki a Isemaela ra, i to ratou au ingoa, i to ratou ra anau anga; ta Isemaela tama mua ra, ko Nebaiota ïa; e ko Kedara, e ko Adabeela, e ko Mibesama,

14 E ko Misema e ko Duma, e ko Masa,

15 E ko Hadara, e ko Tema, e ko Ietura, e ko Naphisa, e ko Kedema:

16 Ko nga tamariki ïa a Isemaela, ko to ratou teia au ingoa, i to ratou au oire, e to ratou au punanga; tino ngauru ma rua, e ariki anake i to ratou au enua.

17 Teia to Isemaela au mataiti i te ora anga, okotai anere e toru ngauru e itu ara mataiti; unui akera, mate atura; e kapiti katoaia atura ki tona uaorai iti-tangata ra.

18 Mei Havila atu to ratou nooanga, i te arataa e aere tika atu ei ki Asura ra, e tae ua atu ki Sura, i te pae i Aiphiti ra: i topa oki tana tuanga i mua i te aroaro o tona katoa ra ai taeake.

19 Teia te tuatua i te tamaiti a Aberahama ra, ko Isaaka; anau akera ta Aberahama ko Isaaka.

20 E tae akera ki te a o te ngauru anga o to Isaaka mataiti, rave iora aia ia Rebeka, te tamaine a Betuela, e ngati Arama no Padanaarama, e tuaine no Labana ngati Arama ra, ei vaine nana.

21 E kua pure iorā Isaaka ia Iehova i te vaine nana ra, no te mea e pa aia; e kua akarongo mairā Iehova i tana pure, e kua to iora tana vaine ko Rebeka.

22 E kua keukeu iora nga tamariki i roto iaia; e kua karanga atura aia, Ko te tu ainei teia, eaa au i akaperaia mai ei? E aere atura aia e ui kia Iehova.

23 E kua tuatua mairā Iehova kiaia, E rua katoa iti-tangata i to kopu na, e ka taka ke aua nga pae tangata e rua ra mei to kopu maira: e ririnui to tetai i tetai; e e tavini te tuakana ki te teina.

24 E tae akera ki te tuatau e anau ei aia ra, i na, e maanga tei roto i tona kopu.

25 E ko tei anau mai ana ki vao ra e tangata muramura ïa, e mei te kakau uruuru e pini roa akera; tapa iora ratou i tona ingoa ia Esau.

26 E i muri ake anau maira te teina, te mou ua ra tona rima i te poo vaevae o Esau; i tapaiaʼi tona ingoa ko Iakoba. Kua tae oki a Isaaka ki te ono o te ngauru anga o tona mataiti i anau ei a Rebeka ia raua ra.

27 E tupu atura taua nga tamariki ra: riro aturā Esau ei tangata kite i te arumaki manu, e tangata noo ngangaere; karekā Iakoba e tangata maru ïa, e te noo puakapa.

28 E akaperepere aturā Isaaka ia Esau, no te mea kua kaki aia i te manu nana ra: karekā Rebeka, akaperepere atura aia ia Iakoba ra.

29 Te tunu rā Iakoba i te kai: kua aere mairā Esau mei te ngangaere mai, e kua mate i te pongi:

30 E kua tuatua mairā Esau kia Iakoba, E angai mai koe iaku ki tenana kai muramura, kua mate oki au; i tapaiaʼi tona ingoa ko Edoma.

31 E kua karanga aturā Iakoba, E oko mai koe i taau taoonga mataiapo i tenana.

32 E kua tuatua mairā Esau, I na, kua vaitata au i te mate; eaa oki naku teianei taoonga mataiapo?

33 E kua karanga aturā Iakoba, Ka taputou mai ana i tenana; e kua taputou maira aia kiaia, e kua oko maira i tana taoonga mataiapo, tei ia Iakoba maira.

34 Kua apai aturā Iakoba i te areto e te pipi na Esau; e kua kai iora aia, e kua inu, tu akera aia ki runga, e aere atura: akavaavaa aturā Esau i te taoonga mataiapo ra.