2 Samuela

19 E KUA akakiteia aturā Ioaba, I na, te aue ra te ariki, te eva ra ia Abasaloma.

2 E kua akariroia taua ora no ratou i taua rā ra ei aue anga no te tangata katoa: rongo akera oki te au tangata i taua rā ra e, te aue ra te ariki i te tamaiti nana ra.

3 Kua aere keia ua atura te au tangata i taua rā ra ki roto i te oire, mei te tangata e oro i te akama kia ati i te tamaki ra.

4 E kua puroku te ariki i tona mata, e kua kakaoa ua iora te ariki ma te reo maata, E taku tamaiti e, e Abasaloma e! e Abasaloma e! e taku tamaiti, e taku tamaiti!

5 Kua aere aturā Ioaba ki roto i te are o te ariki ra, e kua karanga atura, Kua akama to au tavini ravarai ia koe i teianei rā, ko tei akaora io nei ia koe, e to au tamaroa, e to au tamaine, e to au vaine, e to au vaine tavini;

6 Ko koe kare inangaro atu i toou au taunga, i anoano atura koe i to au enemi; kua akakite pu mai oki koe i teianei ra, e kare koe i akono mai i te aronga mamaata ia koe nei, e te au tavini; kua kite oki au i teianei ra, naringa te ora nei a Abasaloma, e ko matou nei tei mate i teianei rā, e mea tika ïa ia koe.

7 E teianei, ka tu ki runga, ka aere ki vao, ka akapapa i te ngakau o to au tavini: te taputou nei oki au ia Iehova e, kia kore koe e tae ki vao ra, kare rava tetai tangata e toe ia koe i teianei po; e kino maata oki te reira ia koe i te au mea katoa i rokoiaʼi koe ra, mei to mea ngiti anga mai e teia noaʼi.

8 Kua tu maira te ariki kua noo maira i te ngutupa. E akakiteia atura te au tangata katoa e, i na, te noo maira te ariki i te ngutupa. Kua aere maira te tangata ravarai ki mua i te ariki; kua ati anake oki Iseraela ki tona are, ki tona are.

9 Kua tauetono iora te au tangata katoa i te au kopu katoa i Iseraela, na ko akera, I akaora io nei oki te ariki ia tatou i te rima o to tatou au enemi, e nana oki tatou i akaora i te rima o te Philiseti; e teianei, kua oro ke aia i te enua nei ia Abasaloma.

10 E ko Abasaloma ra oki, ko tei akatainuia ïa e tatou no runga ia tatou nei, kua mate ïa i te tamaki. E teianei, eaa i kore ei kotou e tuatua i te ariki e akaoki mai.

11 Kua tono akera te ariki ra ko Davida i te karere ki nga taunga ra kia Zadoka raua ko Abiatara ra, i te tuatua anga e, E karanga atu ki te aronga pakari i Iuda ra, na ko atura, Eaa kotou i taope ei i te akaoki anga mai i te ariki ki tona are? ko tei tae rava akenei te tuatua a Iseraela katoa ki te ariki, ki tona are ra.

12 Ko toku ra oki ai taeake, ko kotou ïa, ko toku ïa ivi, ko toku ïa kiko: eaa oki kotou i taope ei i te akaoki mai i te ariki ra?

13 E karanga katoa atu kia Amasa, Ko toku ïa ivi, e ko toku ïa kiko, ko koe: kia pera mairai te Atua kiaku nei, e kia maata mairai, kia kore koe e akariroia ei rangatira no te nuku i mua i toku aroaro, ei tupau ake ia Ioaba, e tuatau ua atu.

14 Riro maira te ngakau o te ngati Iuda ravarai mei te ngakau o te tangata okotai ra: i tono ei ratou i te karere ki te ariki ra, i tuatuaʼi e, E oki mai koe e to au tavini katoa ra.

15 Kua oki maira te ariki, e kua tae ki Ioridana. E kua aere maira Iuda ki Gilagala, kia aere e aravei i te ariki ra, e arataki i te ariki ki tera pae Ioridana.

16 E ko Simei te tamaiti a Gera, e ngati Beniamina i Bahurima, aere viviki atura aia, e to Iuda katoa ra, kia aravei i te ariki ra ia Davida.

17 E to Beniamina okotai tausani katoa: e ko Ziba, e tavini no te ngutuare o Saula, e ana au tamariki okotai ngauru ma rima ra, e te au tavini tai takau ra; e kua na mua ratou i te ariki ra i te aere na runga i te vai ra ko Ioridana.

18 I oeia oki tetai vaka ei apai i te ngutuare o te ariki, e te rave oki i ta te ariki e anoano ra. E tipapa iorā Simei te tamaiti a Gera ki mua i te aroaro o te ariki ra, iaia i tae mai ki tetai pae Ioridana;

19 E kua tuatua maira aia ki te ariki, Auraka taku pu e uri mai i taku ara ki runga iaku nei, auraka oki koe e manako i tei rave māroia e to tavini nei, i te rā ka riro mai ei taku pu ra te ariki nei, mei Ierusalema maira, kia akono te ariki i te reira i tona ngakau.

20 Kua kite oki to tavini nei e kua ara au: e i na, i teianei, ko au to te ngutuare katoa o Iosepha i na mua mai i teianei rā kia aravei atu i taku pu i te ariki ra.

21 Kua tuatua maira te tamaiti a Zeruia ra ko Abisai, na ko maira, Aurakā Simei kia taia i taua mea nei, koia i akakino i tei akatainuia e Iehova ra?

22 Kua karanga aturā Davida, Eaa atu au ia kotou, e te au tamariki a Zeruia, kia riro mai oki kotou ei enemi noku i teianei rā? E mate ainei oki tetai tangata i Iseraela i teianei rā? Kare ainei tei kite au e ko au te ariki i rungao ia Iseraela i teianei rā?

23 Kua karanga atura te ariki kia Simei i reira, Kare koe e mate. Kua taputou atura te ariki kiaia.

24 Kua aere maira te utaro o Saula ra, ko Mephiboseta, kia aravei i te ariki ra; kare rai i rapakau i tona vaevae, kare oki aia i akamanea i tona kumikumi, kare oki i orei i ona kakau, mei te rā mai i riro ei te ariki ra, e tae ua akera ki te rā i oki mai ei ma te au.

25 Iaia oki i aere mai ki Ierusalema, e aravei i te ariki ra, kua karanga atura te ariki kiaia, Eaa i kore ei koe i aru mai iaku ra, e Miphiboseta?

26 Kua tuatua maira aia, E taku pu e te ariki, kua pikikaaia au e taku tavini nei: kua karanga oki to tavini e, Ka akauta ana i tetai nooanga noku ki runga i te asini ei noo anga noku, e aru au i te ariki ra; no te mea e pirikoki to tavini nei.

27 Kua tapepe pikikaa ra aia i to tavini kia koe, e taku pu e te ariki: e tau ra taku pu i te ariki ra, ki tetai angela a te Atua, e tenana, e rave koe i taau e inangaro ra.

28 No te mate anake to te ngutuare katoa o toku tupuna ki mua ia koe, e taku pu e te ariki: e kua akanoo oki koe i to tavini nei i rotopu katoa i te aronga i kai i taau orai kaingakai. E tika aina oki iaku kia karanga akaou atu rai au ki te ariki?

29 Kua karanga atura te ariki kiaia, Eaa oki koe i tuatua akaou mai ei i taau tuatua? Tei taku tuatua, E rave korua ko Ziba e tua i taua kainga ra.

30 Kua tuatua mairā Mephiboseta ki te ariki, E rave katoatoa atu aia, i na, kua tae mai taku pu te ariki ki tona uaorai ngutuare ma te au.

31 E kua aere mairā Barezilai i Gileada mei Rogelima mai, e aere katoa raua ma te ariki ki tetai pae Ioridana, kua arataki atura iaia ki tetai pae Ioridana.

32 Kua ruaine rava rā Barezilai, kua tae ki te varu o te ngauru anga o te mataiti: i angai ua ana aia i te ariki iaia i noo i Mahanaima; e tangata taoiau oki aia.

33 Kua karanga atura te ariki kia Barezilai, Taki aere katoa taua, e naku koe e angai i Ierusalema.

34 Kua tuatua mairā Barezilai ki te ariki, Mei te aa ra te roa o toku nei aʼo, ka tae katoa atu ei taua ko te ariki ki Ierusalema.

35 Kua tae au ki te varu ngaru anga o toku nei mataiti i teianei rā: e kite ainei au i te meitaki e te kino? e kite ainei oki to tavini i taku e kai nei e taku e inu nei? e tika aina oki au kia akarongo i te imene tane e te imene vaine? Eaa e tikaʼi kia riro rai to tavini ei teiaa ki taku pu ki te ariki? spelling mistake in Rabi <u22>ngaru<u22> should be <u22>ngauru<u22>

37 Teia taku tuatua kia koe, ka tuku koe i to tavini, kia oki ua ana, kia mate atu au i toku uaorai oire, i vaitatao i te tanumanga o toku metua tane e toku metua vaine ra. Ka akara ana ra i to tavini ia Kimihama; koia te ka aere atu i to tere, e taku pu e te ariki; ka rave ei koe i taau e inangaro iaia.

38 Kua karanga atura te ariki, Ko kimihana te ka aere ko maua katoa, e ko taau e anonao ra, ko taku ïa e rave iaia: e ko taau e anoano iaku nei, ko taku ïa e rave ia koe na.

39 Kua aere te tangata katoatoa ki tetai pae i Ioridana. E tae atura te ariki ki tetai pae, kua ongi akera te ariki ia Barezilai, e kua akaora atura iaia; oki iora aia ki tona ngai.

40 Riro atura te ariki ki Gilagala, e Kimihama katoa i te aere katoa anga: e to Iuda katoa i te arataki anga i te ariki e ko tetai pae o to Iseraela katoa.

41 E i na, kua aere maira to Iseraela ravarai ki te ariki ra, e kua tuatua maira ki te ariki, Eaa ra to matou ai taeake ko to Iuda nei i rave keia ua mai ei ia koe, e kua arataki mai i te ariki e tono ngutuare, e te au tangata katoa i o Davida ki teia pae Ioridana?

42 Kua karanga atura to Iuda katoa ra ki to Iseraela, No te mea e piri maata to te ariki ia matou nei: eaa oki kotou i riri ei i te reira? I kai ana ainei oki matou i ta te ariki kai, e e apinga ainei tana i o mai na matou nei?

43 Kua tuatua maira to Iseraela ki to Iuda, na ko maira, Okotai ngauru matou i te piringa atu i te ariki, e piri maata to matou ia Davida i to kotou: eaa iora oki kotou i akavaavaa mai ei ia matou nei, kare akera i akaaiteite katoa ana i te tuatua ia matou nei e akaoki mai i to tatou ariki? E viviki maata ra to te tuatua a to Iuda ki ta to Iseraela.