2 Ariki

9 KUA karanga aturā Elisaia peroveta ki tetai i te au tamariki peroveta ra, e kua na ko atura kiaia, Ka tatua ana i to taukupu, ka rave ei i teianei ue manongi i to rima, ka aere ei ki Ramota-gileada:

2 E kia tae koe ki reira, ka kimi ei ia Iehu te tamaiti a Iehosaphata te tamaiti a Nimesi, ka aere koe ki roto, ka akatu mai koe iaia i rotopu i te au taeake nona ra, arataki ei ki roto i tetai pia ki roto rava ra;

3 Ka rave ei i taua ue manongi ra, ka riringi atu ei ki runga i tona mimiti ra, ka karanga atu ei, Te na ko mairā Iehova, Te akatainu nei au ia koe ei ariki no Iseraela. Ka eeu ei koe i te pa, ka oro ei, auraka e noo.

4 Aere atura taua tangata ou ra, taua tangata ou ra te peroveta, ki Ramota-gileada.

5 E tae atura aia ra, i na, te noo maira te au rangatira o te nuku ra; kua karanga atura aia, E tuatua taku kia koe, e te rangatira. Kua tuatua mairā Iehu, Kiaai ia matou katoa nei? Kua karanga atura aia, Kia koe, e te rangatira e.

6 Kua tu akera aia, aere atura ki roto i te are; kua riringi atura aia i te manongi ki runga i tona mimiti, e kua karanga atura kiaia, Te na ko maira te Atua o Iseraela, ko Iehova, Te akatainu nei au ia koe ei ariki i runga i te au tangata o Iehova, i runga ia Iseraela.

7 E naau e ta i te ngutuare o to pu ra o Ahaba, kia tutaki au i te toto o toku ra au tavini, to te au peroveta, e te toto o te au tavini ravarai o Iehova, i te rima o Iezebela.

8 Ka ope takiri oki te ngutuare o Ahaba i te pou; ka tipu atu au i te au tane i o Ahaba, momani uaiaʼi e kia ngaro i Iseraela nei:

9 Ka akariro au i te ngutuare o Ahaba, mei te ngutuare o Ieroboama te tamaiti a Nebata, e mei te ngutuare o Baasa te tamaiti a Ahia ra:

10 E na te puaka aoa e kai ia Iezebela i te kainga i Iezereela, kare e tanumia. Kua eeu akera aia i te pa, e kua oro maira.

11 Kua aere mairā Iehu ki vao ki te au tavini o tona ra pu: kua karanga atura tetai kiaia, Te meitaki na? eaa tera ra neneva i aere mai ei kia koe na? Kua tuatua maira aia kia ratou, Kua kite kotou i taua tangata nei e tana tuatua.

12 Kua karanga atura ratou, Taeke ua; e akakite maira i tenana kia matou nei. Kua tuatua maira aia, Kua akapera maira aia kiaku, tuatua maira, Te na ko mairā Iehova, Te akatainu nei au ia koe ei ariki i runga ia Iseraela.

13 Kua rave viviki atura te tangata katoa i tona kakau, tonao, tonao, kua tuku iora ki raro ake iaia i te kakeanga ki runga ra, kua akatangi iora i te pu, karanga atura, Ko Iehu te ariki.

14 Kua kotikoti kupenga iorā Iehu, te tamaiti a Iehosaphata, te tamaiti a Nimesi, e ta ia Iorama. I tiaki ua anā Iorama e Iseraela katoa ia Ramota-gileada, no te ariki o Arama no Hazaela.

15 Kua oki ra taua ariki ra ko Iorama ki Iezereela kia akaoraia aia i te au puta i putaʼi aia i to Arama ra, ka tamaki ei aia i te ariki o Arama ra ia Hazaela. Kua tuatua akerā Iehu, Kia tika ia kotou ra, auraka rava ei tangata kia riro ki vao mai i teianei oire, kia aere e akakite i teianei tuatua i Iezereela.

16 Kua oro iorā Iehu na runga i te kariota, aere atura ki Iezereela; tei reira oki a Iorama te noo anga. E kua tae mai oki te ariki o Iuda ko Ahazia ki raro, e atoro ia Iorama.

17 Te tu ra tetai tiaki i runga i te punanga i Iezereela ra, e kua kite aia i te pouou tangata o Iehu i te aere anga mai, e kua tuatua akera, E pouou tangata tera ake. Kua tuatua akerā Iorama, Ka rave tetai tangata akaoro oroenua, ka unga atu ei kia aravei ia ratou. ka karanga atu ei e, E tere au tena?

18 Aere atura tetai tangata ki runga i te oroenua, e e aravei atu iaia, e kua karanga atura, Te na ko maira te ariki, E tere au tena? Kua tuatua mairā Iehu. Ei au oki toou? e na muri mai koe iaku. Kua tuatua maira taua tiaki ra, na ko maira, Kua tae rava oki taua karere kia ratou ra, e kare ua i oki mai.

19 Kua tono atura aia i tetai, ko te toko rua ïa, na runga i te oroenua ra, e kua tae atura kia ratou ra, karanga atura, Te tuatua maira te ariki, E tere au tena? Kua tuatua maira Iehu, Ei au oki toou? e na muri mai koe iaku.

20 Kua tuatua maira taua tiaki ra, na ko maira, Kua tae katoa aia kia ratou ra, e kare ua i oki mai: mei te oro o Iehu te tamaiti a Nimesi ra tona oro; te oro viviki maira oki.

21 Kua tuatua akerā Iorama, E akonokono. Kua akonokonoia iora te kariota nona ra. Kua aere iora te ariki o Iseraela ko Iorama, e te ariki o Iuda ko Ahazia, na runga i o raua kariota; e aere raua aravei ia Iehu, e kua aravei iaia i roto i te kainga o Nabota i Iezereela ra.

22 E kite akerā Iorama ia Iehu, kua karanga atura aia, E tere au toou, e Iehu? Kua tuatua maira aia, Eaa tena au, te maata rava ra te akaturi e te purepure o to metua vaine ra o Iezebela?

23 Kua akaanga akerā Iorama i ona rima, kua oro iora, e kua tuatua akera kia Ahazia, E kotikoti kupenga, e Ahazia e.

24 Kua totō akerā Iehu i te ao o tana ana ma tona ririnui katoa, tu iorā Iorama i te tua, mama atura te kakao na roto i te pukuatu, kua topa iora aia i roto i tona kariota.

25 Kua karanga aturā Iehu ki te rangatira nona kia Bidekara, E rave, e titiri ki roto i tetai pae i te kainga o Nabota i Iezereela ra: e akamaara oki koe, ia taua i oro na muri i te metua nona ia Ahaba, kua tuku iorā Iehova i teianei apainga ki runga iaia, na ko akera,

26 Te tuatua mairā Iehova, mei taku i kite i nanai i te toto o Nabota, e te toto o ana puke tamariki; ka tutaki tikai au ia koe i roto rai i teianei kainga, ko ta Iehova ïa tuatua. E tenana e rave ka titiri iaia ki roto i tenana kainga ta Iehova oki i tuatua maira.

27 Kia akara ra te ariki o Iuda ko Ahazia i te reira, kua oro iora aia na te ara o te are o te kainga ra. Kua aru aturā Iehu iaia, e kua tuatua akera, Ka ta katoa iaia i roto i te kariota. Kua pera atura ratou i te kake anga i Gura, i vaitata i Ibeleama. Kua oro iora aia ki Megido, mate iora i reira.

28 Apai akera tona au tavini iaia i roto i te kariota ki Ierusalema, tanumia iora aia ki roto i tona uaorai tanumanga ki o tona ai metua i te oire o Davida.

29 Tei te mataiti okotai ngauru ma tai to Iorama te tamaiti a Ahaba, i riro ei a Ahazia ei ariki i runga ia Iuda.

30 E tae mairā Iehu ki Iezereela, kite akerā Iezebela; kua amo iora i tona tuke-mata i te peni, e kua akamanea i tona rauru, e kua akara maira na roto i te māramārama.

31 Te tomo rā Iehu na te ngutupa, kua tuatua akera aia, E au ainei to Zimeri tei ta i tona pu?

32 Kua nānā akera tona mata ki runga i taua māramārama ra, e kua tuatua akera, Koai, Koai tei toku nei pae? Kua akara maira e tokotai puke eunuka.

33 Kua karanga atura aia, Ka uri mai iaia ki raro nei. Kua uri maira ratou iaia ki raro: kua î ua maira tona toto ki runga i te patu, e ki runga katoa i te au oroenua, ko tei takatakai mai ki runga iaia.

34 Kua tomo akera aia ki roto, kua kai iora aia e kua inu oki, e kua tuatua akera, E aere i tenana, e akara i taua vaine taumaaia nei, ka tanu atu ei: e tamaine oki aia na te ariki.

35 Kua aere oki ratou e tanu iaia: e kare rava i kitea, mari ra ko te ipu katu, e nga tapuae, e nga kapu-rima.

36 Kua oki akaou maira ratou, kua akakite maira kiaia. Kua tuatua maira aia, Ko ta Iehova teia tuatua, tana i tuatua mai i tona tavini ia Elia i Tisibi ra, ka na ko mai ei ra e, Ei te tapere ei Iezereela e kai ei te puaka aoa i te kopapa o Iezebela:

37 Ka riro oki te ivi o Iezebela mei te teita ki runga i te kainga i taua tapere ra ko Iezereela; kare oki ratou e tuatua e, Teiā Iezebela.