Ieremia

21 TE TUATUA i tae mai kia Ieremia, no ko mai ia Iehova ra, ka tono atu ei te ariki ra ko Zedekia ia Pasahura, te tamaiti a Malekia, e ia Zephania, te tamaiti a Maaseia taunga ra, kiaia, i te na ko anga atu e,

2 Teia taku tuatua kia koe, Ka ui atu koe kia Iehova ia matou nei; no te mea, te tamaki nei te ariki o Babulonia ko Nebukanesa ia matou nei; peneiake ko te rave mai a Iehova ia matou i tana katoa ra au ravenga taka ke, e kia oki atu aia ia matou nei.

3 Kua tuatua mairā Ieremia kia ratou, E na ko atu kotou kia Zedekia:

4 Te na ko maira te Atua o Iseraela ra, ko Iehova, I na, e ruri ke au i te au taoonga tamaki i roto i to kotou rima, ta kotou e tamaki atu ki te ariki o Babulonia, e ki to Kaledea ra, tei na vao mai i te au patu ra i te akapini mai ia kotou, e akaputuputu au ia ratou ki rotopu i teianei oire.

5 Ko au uaorai te tamaki atu ia kotou, ma te rima akatikaia, e ma te rima marōrō, ma te riri, e ma te riri otooto, e ma te riri viviki maata.

6 E ta oki au i to teianei oire, i te tangata e te puaka: ka mate oki ratou i te maki ririnui.

7 E muri ake i te reira, te tuatua mairā Iehova, ko te ariki o Iuda ra ko Zedekia, e tona ra au tavini, e te au tangata, e tei toe i te oire nei, no te makimate, e no te koke, e no te onge, taku ïa e tuku atu i te rima o te ariki o Babulonia, ia Nebukanesa, e te rima o to ratou au enemi, e te rima o te aronga i kimi mai ia ratou kia mate; e nana ratou e ta ki te mata koke; kare rava aia e aroa ia ratou, kare e akaperepere, kare oki e tangi atu.

8 E karanga atu koe ki teianei iti-tangata, Te na ko mairā Iehova; I na, te tuku nei au i te ara ora ki mua ia kotou,e te ara mate.

9 Ko te noo ki roto i teianei oire, e mate ïa i te koke, e te onge, e te maki-mate: e te aere ra ki vao, e kua oronga iaia uaorai ki te rima o te Kaledea e akapini mai ia kotou ra, e ora ïa aia, e riro tona ora ei apinga nana.

10 Kua tuku oki au i toku mata ki runga i teianei oire kia kino, auraka kia meitaki, te tuatua mairā Iehova. e tukuia te reira ki te rima o te ariki o Babulonia, e ka taʼu aia i te reira ki te ai.

11 Kareka te are o te ariki o Iuda ra, E akarongo mai kotou i te tuatua a Iehova;

12 E te ngutuare o Davida, te na ko mairā Iehova, Ka rave vave na i te tuatua-tau, ka akaora atu i tei āruia i te rima o te takinga-kino ra; ko te riro atu aea taku riri otooto mei te ai ra, e ka atura, e kare e tamate, no te kino o ta kotou au ravenga ra.

13 I na, kare au e tau ia koe, e tei noo i te o ra, te mato i te ngai mataataa, te tuatua mairā Iehova; ko kotou ko tei karanga e, Koai te ka eke mai ki raro ia tatou nei? naai e tomo mai i to tatou au are?

14 E tutaki atu au ia kotou kia tau i ta kotou ravenga, te tuatua mairā Iehova: e tutungi au i te ai i tona ra vaorakau, e e pou katoatoa oki ïa e pini ua ake.