2 Paraleipomeno

36 KUA rave iora to te enua ia Iehoahaza te tamaiti a Iosia, e kua akaariki atura iaia ei tupau i tona metua i Ierusalema.

2 Tei te mataitai tai takau ma toru o Ieoahaza i ariki ei aia, e toru oki ona marama i te ariki anga i Ierusalema.

3 E apai keia aia i Ierusalema e te ariki o Aiphiti, e kua tuku iora te taūnga ki runga i te enua, okotai anere taleni ario, okotai oki taleni auro.

4 Kua akariro atura te ariki o Aiphiti i tona taeake ia Eliakima ei ariki no Iuda e Ierusalema, e ruri akera i tona ingoa ia Iehoiakima. Kua rave iorā Neko i te tuakana ia Iehoahaza, e kua apai atura ki Aiphiti.

5 Tei te mataiti tai takau ma rima o Iehoiakima i ariki ei aia, okotai ngauru ma tai ona mataiti i te ariki anga i Ierusalema; e kua rave aia i te kino i mua i te aroaro o tona Atua o Iehova.

6 Kua aere maira te ariki o Babulonia ko Nebukaneza e tamaki iaia, e kua tapeka iaia ki te tapeka veo, e kua apai ki Babulonia.

7 E kua apai katoaia e Nebukaneza tetai pae apinga no te are o Iehova ki Babulonia, e kua tuku iora ki roto i te iero nona i Babulonia.

8 E te toenga o te tuatua ia Iehoiakima, e te au mea viivii tana i rave, e tei kitea i roto iaia, i na, kua tataia ïa i roto i te tuatua a te au ariki o Iseraela e no Iuda: tupauia akera aia i te au e tana tamaiti ra e Iehoiakina.

9 Tei te mataiti varu ra o Iehoiakina i ariki ei aia, e toru oki ona marama okotai ngauru rā i te arikii anga i Ierusalema: kua rave aia i te kino i mua i te aroaro o Iehova.

10 E ope akera te mataiti, kua tono maira te ariki ra ko Nebukaneza, e kua kave mai iaia ki Babulonia, e te au apinga memeitaki no te are o Iehova, e kua akariro atura i tetai taeake nona ko Zedekia ei ariki no Iuda e Ierusalema.

11 Tei te mataiti tai takau ma tai o Zedekia i ariki ei aia, okotai ngauru ma tai ona mataiti i te ariki anga i Ierusalema.

12 Kua rave aia i te kino i mua i te aroaro o tona Atua o Iehova, kare oki i taakaaka iaia orai i mua i te peroveta ia Ieremia, i te tuatua anga mai no ko i te vaa o Iehova.

13 Kua kaitamaki oki aia i te ariki ra ko Nebukaneza, tei akataputou atura iaia i te Atua: kua akaketaketa iora ra aia i tona kaki, e kua akamārokiakia atura i tona ngakau, kare akerai i anga mai ki te Atua o Iseraela kia Iehova.

14 Maata rava atura oki ta te kau taunga mamaata katoa ra ara, e te au tangata, i te au ravenga viivii a te etene; e kua akaviivii i te are o Iehova tei akatapuia e ia i Ierusalema.

15 Kua tono maira te Atua o to ratou ai metua ko Iehova i te rima o te au karere nona kia ratou ra, kare i tukumoe i te tono anga; no te mea te aroa ra aia i tona iti-tangata e tona uaorai nooanga:

16 Kua taitoito ra ratou i te au karere a te Atua, e kua akavaavaa i tana tuatua, e kua takinga-kino i te au peroveta nana, e tupu rava akera te riri o Iehova i tona tangata, e kare rava akera e ravenga e oraʼi.

17 I tuku mai ei aia i te ariki o te Kaledea, tei ta ua i to ratou au tangata ou ki te koke, i roto i te are, i to ratou ngai-tapu, kare rava i aroa i te tangata ou, e te potiki tamaine ou, i te tangata metua, e tei piko ki raro i te ruaine: tuku katoaia atura e ia ki roto i tona rima.

18 E te au āriki katoa o te are o te Atua, te mea maata e te mea rikiriki, e te apinga tini no te are o Iehova, e no te apinga a te ariki, e ta te ui mataiapo katoa, kua apai katoatoaia e ia ki Babulonia.

19 Kua tutungi oki ratou i te are o te Atua ki te ai, e kua vavaʼi i te patu i Ierusalema, kua tutungi oki i te au are ariki ki te ai, e kua vavaʼi i te au apinga memeitaki ravarai ra.

20 E te aronga i ora i te koke ra, kua kave aia ia ratou ki Babulonia; e riro atura ei tavini nona, e no tana au tamariki, e tae rava akera ki te au i te basileia ra i Peresia:

21 Kia tupu te tuatua a Iehova i te vaa o Ieremia, kia vaoo uaia ta taua enua ra sabati; te vai tanea ua ra oki, te akono rai ia i te sabati, e e itu ngauru anga i te mataiti.

22 Tae akera ki te mataiti mua o te ariki o Peresia ra ko Kuro, kia tupu te tuatua a Iehova i te vaa o Ieremia, i akaaraara atu ei a Iehova i te ngakau o te ariki o Peresia ra o Kuro, kia tataia tetai ture, e kia tutu aereia e pini ua ake tona enua, na ko atura.

23 Te na ko maira te ariki o Peresia ko Kuro, Kua oronga mai te Atua no te rangi ko Iehova i te au basileia katoa o te ao nei kiaku; e kua ikuiku mai aia iaku e akatu i tetai are nona i Ierusalema, i Iuda ra. Koai tei toe i roto ia kotou na i tona au tangata katoa? Kia piri mai oki tona Atua ra ko Iehova iaia, e aere aia ki runga.