Numero

18 KUA tuatua mairā Iehova kia Aarona, Ei runga ia koe, e aau puke tamariki, e te ngutuare o toou metua, te ara i te ngai-tapu nei; ei runga ia koe, e aau puke tamariki katoa, te ara i ta kotou na taoonga taunga ra.

2 E to au taeake katoa no te kopu o Levi ra, te kopu o to metua na, e tiki koe, e kapiti mai kia koe ra, kia kapiti katoaia mai ratou kia koe ra, kia tauturu ratou ia koe; kareka koe e aau puke tamariki, e rave ïa kotou i te angaanga ki mua i te Are kite ra. 3 E ka akono ratou i taau e iku ra, e tei ikuia mai i te Are katoa ra: auraka ra ratou e akavaitata mai ki te au mea no te ngai-tapu ra, e i te atarau, ka mate aea kotou, e ratou katoa.

4 E ka kapiti katoaia mai ratou kia koe ra, ka akono ei i tei iku naia mai i te Are uipaanga, no te au angaanga katoa i te Are ra; e auraka roa ei tangata ke e akavaitata mai kia kotou.

5 E ei ia kotou te akono anga i tei iku naia mai i te ngai-tapu, e tei iku naia, mai i te atarau ra, kia kore e tupu akaou te riri i te tamariki a Iseraela ra.

6 I na oki ko au, kua raveia e au to kotou au taeake ngati Levi, no roto i te tamariki a Iseraela ra: e kua orongaia ratou kia kotou, ei apinga na Iehova, ei rave i te angaanga i te Are uipaanga ra. 7 E teianei, e akono koe e taau tamariki katoa i te taoonga taunga ra, i te au mea katoa i te atarau ra, e i roto mai i te paruru ra, na kotou oki e rave: kua oronga oki au i te taoonga taunga ei mea oronga uaia kia kotou anake ra; e te tangata ke e akavaitata maira, ka tamateia ïa. 8 Kua tuatua mairā Iehova kia Aarona, I na, ei ia koe katoa te akono anga i taku au atinga apaiia ki runga, kua orongaia e au kia koe no roto i te au mea tapu katoa a te tamariki a Iseraela; kua orongaia e au naau no to akatainu angaia, e na taau tamariki, ei akonoanga vaoo tamou roa ïa. 9 Ko teia oki taau ra, no roto i te au mea tapu roa no te atinga ai ra; no te au atinga katoa na ratou ra, e ta ratou au atinga kai katoa, e ta ratou au tarangaara ravarai, e ta ratou au tutakingaara katoa, ta ratou e apai mai kiaku ra, ei mea tapu roa ïa te reira naau, e nga tamariki aau. 10 Ei roto i te ngai-tapu roa ra koe ka kai ei i te reira; ko te au tane katoa ra te ka kai: e mea tapu ïa naau ra. 11 E naau katoa oki teia; ko ta ratou atinga apaiia ki runga oronga ra, e te au atinga ruru katoa a te tamariki a Iseraela ra; kua orongaia e au naau, e na taau au tamariki tamaroa, e taau au tamaine katoa, ei akonoanga vaoo tamou roa ïa: ko te aronga viivii kore katoa i roto i toou are, e tika ïa kia kai i te reira.

12 Tei meitaki i te inu ra, e tei meitaki i te wina ra, e te sitona ra, ta ratou e apai ei popo kia Iehova ra, kua oronga au i te reira naau.

13 Te au kai katoa o to ratou enua e para ana, ta ratou e apai mai kia Iehova ra, naau ïa; e tika te aronga viivii kore katoa o toou ngutuare ra kia kai i te reira. 14 Ko te au mea katoa i akatakaia i Iseraela nei, naau ïa.

15 Ko te au tama mua o te au mea ora katoa, ta ratou e apai kia Iehova ra, to te tangata, e to te au puaka, naau ïa; ko ta te tangata ra tama mua ra, e oko tikai koe i te reira, e e oko katoa ïa te anaunga mua o te puaka viivii ra. 16 E te aronga e okoia ra, tei tae ki te marama okotai ra, e oko koe i te reira, kia tau ki taau ra akaaiteite anga, ki nga sekela ario e rima ra, i te sekela i te ngai-tapu ra, koia oki nga gera okotai takau.

17 Kareka te anaunga mua o te puakatoro, e te anaunga mua o te mamoe, e te anaunga mua o te puakanio ra, auraka koe e oko i te reira; kua tapu ïa; ka pîpî koe i te toto no te reira ki runga i te atarau, e ka taʼu i te tongaua ei atinga ai aunga kakara na Iehova ra.

18 Kareka te kiko ra, naau ïa, mei te uma atinga ruru ra, e mei te ua mua katau, naau rai ïa.

19 Te au atinga apaiia ki runga katoa no te au mea tapu ra, ta te tamariki a Iseraela e apai kia Iehova ra, kua orongaia e au naau, e na taau au tamariki tamaroa, e taau au tamaine katoa ra, ei akonoanga vaoo tamou roa ïa: ei koreromotu tai mutu kore te reira naau, e na toou katoa ra uanga, ki mua i te aroaro o Iehova.

20 Kua tuatua mairā Iehova kia Aarona, Auraka toou ei kainga i roto i to ratou enua, auraka toou ei tuanga i roto ia ratou ra; ko au taau ra tuanga e toou ra kainga i roto i te tamariki a Iseraela.

21 E i na, kua orongaia e au te ngauru o te au mea katoa i Iseraela nei, na te tamariki a Levi, ei tuanga ïa no ta ratou angaanga e rave ra, te angaanga i te Are uipaanga ra.

22 Kare atura oki te tamariki a Iseraela e tika i teianei kia akavaitata ki te Are uipaanga, ko te araia aea oki ratou, ko te mate aea.

23 Na te ngati Levi oki e rave i te angaanga i te Are uipaanga, e ei runga ia ratou uaorai oki ta ratou ara; ei akonoanga vaoo tamou ïa e ope ua ake to kotou au uki ra; auraka ra to ratou ei tuanga kainga i roto i te tamariki a Iseraela ra. 24 Kareka te ngauru a te tamariki a Iseraela, ta ratou e apai ei atinga apaiia ki runga kia Iehova ra, kua orongaia e au ei tuanga na te ngati Levi: i karanga atu ei au kia ratou e, Auraka ta ratou ei tuanga kainga i roto i te tamariki a Iseraela nei. 25 Kua tuatua mairā Iehova kia Mose, na ko maira,

26 E karanga atu koe ki te ngati Levi, e na ko atu kia ratou, Kia rauka ia kotou i te tamariki a Iseraela ta ratou ngauruanga i orongaia e au ei tuanga na kotou, e apai kotou i tetai ngauruanga no roto i taua au ngauruanga ra, ei atinga apaiia ki runga na Iehova i reira.

27 E ka riro taua atinga apaiia ki runga pa kotou ra, mei te sitona o te ngai pāpā sitona katoa ra, e mei to roto i te taomianga vine i ki ra.

28 Ei atinga apaiia ki runga katoa oki ta kotou e apai na Iehova, i ta kotou katoa au ngauruanga e rauka i te tamariki a Iseraela; e ta Iehova atinga apaiia ki runga no te reira ra, na kotou e apai ki te taunga ra kia Aarona.

29 Ei atinga apaiia ki runga ta kotou e apai kia Iehova, no ta kotou apinga orongaia maira, no roto i tei meitaki ra, te pae i akatapuia ra.

30 E tenana, e karanga atu koe kia ratou, Kua apai anakeia e kotou tei meitaki o te reira ra, ka riro ïa te reira mei to te ngai pāpā sitona, e mei to roto i te taomianga vine, ki te au ngati Levi ra.

31 E kai oki kotou i te reira i te au ngai katoa ra, kotou e to kotou ngutuare katoa ra: e tutaki oki te reira na kotou i ta kotou angaanga i te Are uipaanga ra.

32 E kua apai anakeia e kotou tei meitaki i taua au mea ra, kare ïa kotou e araia i taua au mea ra i reira; kare oki kotou e akaviivii i te au mea tapu a te tamariki a Iseraela i reira, e kare oki e mate.