Isaia

59 I NA, kare te rima o Iehova i poto i kore ei e tika iaia kia akaora; kare oki tona taringa i turi, i kore ei e tika kia akarongo.

2 Na ta kotou ra au ara i akataka ke ia kotou e to kotou Atua, e na ta kotou tuatua kino i uunaʼi aia i tona mata ia kotou, i kore ei aia i akarongo mai.

3 Kua viivii oki to kotou rima i te toto, e to kotou maikao-rima i te kino; kua tuatua pikikaa to kotou vaa, kua nanu ua to kotou arero i te tuatua kino.

4 Kare rava tetai i aruaru i te tuatua-tika, e kare rava tetai i māro i te tuatua-mou: te irinaki ra ratou i te puapinga kore, e te tuatua ra i te pikikaa; te nui ra ratou i te kino, e te anau maira i te ara.

5 Te akapana ra ratou i te ua vipera; e te raranga ra ratou i te pungaverevere o te tukutukuraonui: ko tei kai i to ratou ua, e mate ïa; e i tei ngaa ra kua puroro maira te vipera.

6 Kare to ratou pungaverevere e riro ei pona, kare oki ratou e pini i ta ratou angaanga kia tapoki; ta ratou au angaanga, e angaanga kino ïa, e te angaanga o te takinga-kino, tei roto ïa i o ratou rima.

7 Te ooro nei to ratou vaevae ki te kino, e te rapurapu nei ratou i te akamaringi i te toto ara kore ra: to ratou manako ra, e manako kino anake ïa; ko te pou, e te mate, tei to ratou ïa au aerenga.

8 Ko te ara au ra, kare ïa ratou i kite; e kare rava e tuatua-tau i to ratou au aerenga; kua anga ratou i te au ara mingi no ratou uaorai: ko tei na reira te aere ra, kare ïa i kite i te au.

9 I taka ke roa atu ei te tuatua-tau ia matou nei, e kare nei rai matou e rokoia e te tuatua-tika: te tapapa nei matou ki te mārama, e i na, e poiri; te kakā, e te aere ua nei ra matou na roto i te poiri.

10 Te aa ua nei matou ki te patu, mei te matapo ra; e te aa aere nei matou mei te mea e, kare e mata; te turorirori ua nei matou i te avatea mei te po ra; mei te aronga e mate ua i te ngai kai maata.

11 Te ngunguru nei matou katoa mei te daba ra, e te aue ua nei matou nei mei te kukupa ra: te tapapa nei matou ki te tuatua-tau ra, e kare akera; i te ora oki, e tei te atea ke atu rai ia matou nei.

12 Kua maata oki ta matou au ara ki mua ia koe, e te tapepe mai nei ta matou au ara ia matou: e tei ia matou nei rai ta matou au ara; e te kite nei matou i to matou au kino.

13 Kua meameaau matou, e kua pikikaa ia Iehova; e kua oki ki muri kare i aru i to matou Atua: kua tuatua i te tuatua kino, e te akatitima; kua kimi e kua tuatua ma te ngakau, i te tuatua pikikaa.

14 E kua oki te tuatua-tau ra ki muri, e te tu ua ra te tuatua-tika i te atea ke: kua turori ua oki te tuatua-mou i te arataa; e kare akera e tika i te tuatua tiratiratu ra kia tomo mai.

15 Koia ïa, kua kore ua te tuatua-mou; e ko tei akaruke i te kino ra, ko tei pou ïa i te āru. Kua akara mairā Iehova, e riri iora aia, no te mea, kare e tuatua-tau.

16 Kua akara iora aia e kare e tangata, va ua iora i te akatika kore: kua rave iora tona uaorai rima i te ora nana; e na tana uaorai tuatua-tika i tauturu iaia.

17 E kua aao iora aia i te tuatua-tika ei paruru umauma ra, e te pare ra o te ora tei runga i tona upoko; kua kakau iora aia i te kakau akaoko ei kakau nona, e kua vaî iora iaia uaorai ki te matutu mei te kakau pu ra.

18 Mei ta ratou i rave ra, ka pera rai tana kia tutaki ra, ei riri otooto to tona aronga ekai ra; ei oko to te au enemi nona ra; e tutaki atu rai aia i te au enua taatai ra.

19 E mataku oki to te opunga o te rā i te ingoa o Iehova, e to te itinga o te rā ra i tona kakā: kia tae mai te enemi mei te vai puke ra, na te Vaerua o Iehova e akatu i tetai reva kiaia ra.

20 E tae maira oki te Akaora ki Ziona, e kia ratou tei akaruke i te kino ki o Iakoba; te tuatua mairā Iehova.

21 Kareka au nei, te tuatua mairā Iehova, teia taku koreromotu ia ratou: Toku Vaerua i rungao ia koe na, e taku tuatua i tukuia e au ki roto i to vaa na, kare te reira e taka ke mei roto i to vaa ra, e te vaa katoa o toou ra uanga, e te vaa katoa o to ratou ra uanga, te tuatua mairā Iehova, teianei e tuatau ua atu.