Deuteronomi

33 TEIA te akameitaki ta te tangata o te Atua ra ta Mose i akameitaki i te tamariki a Iseraela, ka mate ei aia ra.

2 E kua karanga atura aia, Mei Sinai mai a Iehova, e kua mama maira aia ia ratou i Seira: kua kakā maira te maunga ra i Parana, ma te au urupu tapu ra i te aere mai; e no roto mai i tona rima katau ra te ture ai no ratou. 3 Koia ïa, kua aroa mai aia i te au tangata; tei toou ra rima te aronga tapu katoa nona ra: kua noo ratou ki raro i toou pae vaevae, e kua āriki ratou i taau tuatua, 4 I te ture ta Mose i akaue mai ia tatou, ei tuanga na te uipaanga ra na Iakoba. 5 Koia oki te ariki i Iesuruna, ka putuputu mai ei te aronga nunui o te au tangata ra, ko te au kopu o Iseraela ra. 6 Kia orā Reubena, auraka kia mate; auraka tona tangata kia iti. 7 E ko teia ta Iuda: e kua tuatua akera, E akarongo mai, e Iehova e, i te reo o Iuda, e akaoki mai iaia ki tona iti-tangata: kia rava ona puke rima iaia uaorai; e ei tauturu koe iaia i tona au enemi. 8 E kua tuatua aia ia Levi, To Tumima e to Urima, ei to tangata tapu ra ïa, taau i timata i Masa ra, i taau i kauvae atu i te vai ra i Meriba; 9 Ko tei tuatua ki tona metua tane e tona metua vaine, Kare au i akara iaia; ko tei kore i kite i tona uaorai ai taeake; e kare i kite i tana uaorai au tamariki; ko tei akamako i taau tuatua, e kua akono i taau ra koreromotu. 10 Na ratou e apii ia Iakoba i te tuatua-tau naau ra, e taau ture ia Iseraela: na ratou e tuku i te atinga kakara ki mua ia koe, e te atinga karakaratio katoatoa ki runga i to atarau. 11 E akameitaki koe, e Iehova, i tana katoa ra, kite mai oki koe i te angaanga a tona rima: ka ta koe i te taukupu o te aronga e māro mai iaia, e auraka ratou kia tu akaou. 12 E kua tuatua akera aia ia Beniamina, Ka noo ua tei akaperepereia e Iehova ma te ora: na Iehova aia e tamaru e po ua atu te rā, ka noo aia i rotopu i nga pakuivi nona.

13 E kua tuatua akera aia ia Iosepha ra, Kia akameitakiia tona enua e Iehova, i te meitaki ra, i te au no te rangi mai, e to te moana i ooraia ki raro ra, 14 I te au kai memeitaki i tupu i te rā ra, e te au mea memeitaki i tukuia mai e te marama ra, 15 E te au mea memeitaki no te au maunga taito ra, e te au mea memeitaki o te tuaivi vairanga mutu kore, 16 E te au mea memeitaki o te enua e to reira ki katoa ra; e kia iri mai te akaperepere nona, no tei noo i te pu ngangaere, ki runga i te mimiti o Iosepha, e ki runga i te take upoko o tei taka ke i tona ra ai tuakana. 17 E tau tona kakā ki to te puakatoro toa meitaki rava nana ra, e tona tara mei te tara o te puakatoro taetaevao ra; ka ueketu aia i te tangata i te reira, e tae ua atu ki te openga o te enua ra: ko te au ngauru anga o te tausani te reira o Epheraima, ko te au tausani oki te reira o Manase ra. 18 E kua tuatua akera aia ia Zebuluna ra, Ka rekareka, e Zebuluna, i toou aaere anga; e ko koe oki, e Isakara, i toou au are. 19 Na raua e tiki i te tangata e aere mai ki te maunga ra; ei reira ratou e apai ei i te atinga tika: ka rauka oki ta raua apinga maata i te moana, e te apinga i ngaro i raro i te one ra. 20 E kua tuatua akera aia ia Gada, Kia akameitakiia tei akamaata ia Gada ra: mei te liona tinana ra tona moetapapa, e etieti rai i te rima e te take upoko. 21 Kua akataka aia i tei meitaki ra ngai nona uaorai, no te mea, te reira tona ngai i vaooia e te tuku ture; e aere ra aia ma te ui rangatira o te au tangata; ka akatupu aia i te tuatua-tika a Iehova, e tana au tuatua-tau ia Ieseraela ra. 22 E kua tuatua akera aia ia Dana, E punua lionā Dana; mei Basana tona rere anga mai. 23 E kua tuatua akera aia ia Naphatali ra, Ko Naphatali ra, ko tei mareka i te takinga-meitaki ra, e kua ki oki i te meitaki o Iehova ra, ei ia koe a taatai, e te pae i apatonga ra. 24 E kua tuatua akera aia ia Asera ra, Ko Asera ra, e meitaki aia i tana ra au tamariki, e kiteia mai aia i rotopu i tona ra ai taeake; e ku tona vaevae i te inu. 25 E auri toou tamaka e te veo; e ka akaaiteiteia toou maroiroi kia arite ki oou puke rā. 26 Kare e arite ki te Atua o Iesuruna; ko tei na runga i te rangi ra te aere ei turu ia koe, e na runga oki i te tumurangi ma tona mana. 27 Ko te Atua mutu kore ra ko toou ïa punanga; e nga rima mate kore ra toou ïa mou: nana e tuaru ke i toou au enemi ki mua ia koe, e nana e tuatua e, Ka akapou. 28 Ka noo ua Iseraela, koia anake ra ma te ora; te punavai o Iakoba ra i te enua sitona e te wina: ka topatapata mai oki tona rangi i te au. 29 E ao toou, e Iseraela e! koai tei arite ia koe? e iti-tangata akaoraia e Iehova! ko toou ïa turu, e te paruru, e te koke meitaki rava noou ra! e tatomo mai toou au enemi kia koe ra: e to ratou au ngai teitei ra, naau ïa e takatakai.