2 Paraleipomeno

19 TE OKI ra te ariki o Iuda ko Iehosaphata ki tona ngutuare i Ierusalema ma te au.

2 Kua aere maira te tamaiti a Hanani ko Iehu akara ra, e aravei iaia, e kua tuatua maira ki te ariki ra kia Iehosaphata, E tika ainei kia tauturu koe i te aronga kino; e anoano rai koe i tei makitakita ia Iehova? i tupu ei te riri ia koe no ko mai ia Iehova.

3 Te vai nei rai te au mea meitaki i roto ia koe ra, ko koe i apai ke i te au Asetoreta i te enua nei, e kua akonokonoia oki toou ngakau i te kimi i te Atua.

4 E kua noo iorā Iehosaphata i Ierusalema, e kua oki aia kua aere na roto i te au tangata, mei Bere-seba e tae ua atura ki te maunga ra ki Epheraima, e kua akaoki mai ia ratou ki te Atua o to ratou ai metua kia Iehova.

5 E kua akono atura aia i te aronga akava i te enua ra; i te au oire katoa i akaketaketaia i Iuda ra, i tera oire, i tera oire.

6 Kua karanga atura aia ki taua aronga akava ra, Kia matakite i ta kotou e rave na; kare na te tangata ta kotou e akava na, na Iehova ra, tei vaitata oki aia ia kotou i te tuatua akava anga ra.

7 E tenana, kia vai rai te mataku ia Iehova ki runga ia kotou, kia matakite, e akono tikai: kare oki e ngai apa i to tatou Atua ia Iehova, kare e akono anga i te tu o te tangata, kare e rave anga tutaki.

8 Kua akono atura oki a Iehosaphata i tetai papaki i Ierusalema i te au ngati Levi, e tetai pae taunga, e tetai pae i te au mataiapo tutara i Iseraela, ei akava i te tuatua ia Iehova ra, e te tuatua i tauetonoia, ka oki ei ratou ki Ierusalema.

9 E kua ikuiku atura aia ia ratou, na ko atura, E pera rai kotou ma te mataku ia Iehova, ma te tuatua-mou, e te ngakau apa kore.

10 Kia apaiia mai te tuatua a to kotou ai taeake e noo i roto i to ratou au oire; i te toto e te toto, e te ture e te akauenga ra, e te au akonoanga, e te au tuatua-tau ra; e ako kotou ia ratou kia kore ratou e tatipake ia Iehova ra, ko te tae mai aea te riri ki runga ia kotou, e ki runga katoa i to kotou ai taeake: e akapera kotou, e kare kotou e tatipake.

11 E i na, ia Amaria i te taunga maata tei runga ïa ia kotou i te au tuatua ravarai a Iehova; e ko Zebadia te tamaiti a Isemaela te tutara i te ngutuare o Iuda, ei te au tuatua ïa a te ariki ra: ei aronga rangatira oki te au ngati Levi ki mua ia kotou. E akamaroiroi, e ka rave, e ei vaitatā Iehova i te aronga meitaki.